টীয়ক, ২৬আগষ্ট : আজি শ্ৰীকৃষ্ণৰ জন্মাষ্টমী । দেশৰ বিভিন্ন প্ৰান্তৰ লগতে অসমতো কৃষ্ণৰ জন্মাষ্টমীৰ ব্যাপক আয়োজন কৰা হৈছে । ৰাজ্য়ৰ বিভিন্ন মন্দিৰ, নামঘৰ আদিত কৃষ্ণৰ জন্মাষ্টমীৰ আয়োজনক লৈ পুৱাৰে পৰাই ভক্তসকলৰ মাজত দেখা গৈছে ব্য়স্ততা । ভাগৱতত উল্লেখ থকা অনুসৰি ভগৱান কৃষ্ণৰ জন্ম ভাদ মাহৰ কৃষ্ণ পক্ষৰ ৰোহিনী নক্ষত্ৰ অষ্টমী তিথিত হৈছিল ।
- মইনাপৰীয়া নামঘৰত জন্মাষ্টমী :
টীয়কৰ ঐতিহাসিক নৃসিংহ মহাপ্ৰভুখ্যাত মইনাপৰীয়া নামঘৰত জন্মাষ্টমী উপলক্ষত পুৱাই নাম প্ৰসংগৰে আৰম্ভ কৰে দিনযোৰা কাৰ্যসূচীৰ । দুপৰীয়াৰ পুনৰ নাম প্ৰসংগৰ লগতে জন্মাষ্টমী উপলক্ষত সন্ধিয়ালৈ স্থানীয় মহিলাসকলৰ দ্বাৰা দিহা নাম প্ৰদৰ্শনৰ দিহা কৰিছে ।
উল্লেখ্য যে, নৃসিংহ মহাপ্ৰভুখ্যাত এই পীঠলৈ ৰাজ্যৰ বিভিন্ন প্ৰান্তৰ ভকত বৈষ্ণৱৰ পুৱাৰে পৰা জন্মাষ্টমী উপলক্ষে হাতে হাতে শৰাই নৈবদ্য লৈ আগমণ ঘটিছে । সকলোৱে নিজ নিজ মনোকামনা পুৰণৰ মানসেৰে নেদেখাজনৰ চৰণত শৰণাপন্ন হৈছে ।
- ঢেকীয়াখোৱা বৰনামঘৰত ঘোষাপাঠ :
ইপিনে, আজি পুৱাৰে পৰা ঢেকীয়াখোৱা বৰনামঘৰত নাম প্ৰসংগৰ উপৰি খোল প্ৰসংগ কৰে । ৰাজ্যৰ বিভিন্ন প্ৰান্তৰ পৰা অহা ভক্তৰ সমাগমত দ্বিতীয় বৈকুণ্ঠলৈ পৰিণত হৈছে ঢেকীয়াখোৱা বৰনামঘৰ । জাতি,ধৰ্ম,বৰ্ণ নিৰ্বিশেষে সকলোৱে হাতে হাতে ধূপ নৈবদ্য লৈ নেদেখাজনৰ চৰণত শৰণাপন্ন হয় ।
পুৱা প্ৰাতঃপ্ৰসংগকে ধৰি কৃষ্ণ নৃত্য, দিহানাম আদি বিভিন্ন আধ্যাত্মিক অনুষ্ঠান অনুষ্ঠিত কৰাৰ পাচতে মূল নাম আৰু সন্ধিয়ালৈ জন্মাষ্টমী উপলক্ষে ঘোষাপাঠ কাৰ্যসূচী ৰূপায়ণ কৰিব । বৰনামঘৰ পৰিচালনা সমিতিয়ে অক্ষয় বন্তিৰ পৰা সকলোকে আজিৰ এই বিশেষ দিনটোত আশীৰ্বাদ প্ৰদান কৰিছে ।
