নগাঁও, ২৭ ছেপ্টেম্বৰ : অসমৰ বিদেশী সমস্যা সমাধানৰ অৰ্থে হোৱা অসম চুক্তি আৰু অৱসৰপ্ৰাপ্ত ন্যায়ধীশ বিপ্লৱ শৰ্মাৰ প্ৰতিবেদন কাৰ্যকৰী কৰা বিষয়টোক লৈ মুখ্যমন্ত্ৰী ড৹ হিমন্ত বিশ্ব শৰ্মা এখোজ-দুখোজকৈ আগবঢ়াৰ সময়তেই বিষয়টোৱে স্থান লাভ কৰিলে ৰাষ্ট্ৰসংঘৰ মজিয়াত । অসমৰ বিদেশী সমস্যা সমাধান আৰু অসম চুক্তি ৰূপায়ণৰ প্ৰসংগ ৰাষ্ট্ৰসংঘৰ মজিয়াত উত্থাপন কৰিলে নগাঁৱৰ ধিঙৰ এগৰাকী যুৱকে ।
যুৱকজনৰ নাম হীৰকজ্যোতি বৰা । নগাঁৱৰ হীৰকজ্যোতি বৰা নামৰ যুৱকজনে ৰাষ্ট্ৰসংঘৰ মানৱাধিকাৰ পৰিষদৰ অধিৱেশনত অসম তথা ভাৰতৰ অন্যতম প্ৰতিনিধি হিচাপে উপস্থিত থাকি অসমৰ বিদেশী সমস্যাৰ সন্দৰ্ভত ৰাষ্ট্ৰসংঘৰ দৃষ্টি আকৰ্ষণ কৰিবলৈ সক্ষম হৈছে । ভাৰতৰ মুঠ পাঁচগৰাকী প্ৰতিনিধিয়ে অংশগ্ৰহণ কৰা ৰাষ্ট্ৰসংঘৰ মানৱাধিকাৰ পৰিষদৰ অধিৱেশনত অসমৰ পৰা হীৰকজ্যোতি বৰাসহ মুঠ দুজন প্ৰতিনিধিয়ে অংশগ্ৰহণ কৰা বুলি ই টিভি ভাৰতক ফোনযোগে জনাই হীৰকজ্যোতি বৰাই ।
বিগত ২৫ ছেপ্টেম্বৰত ৰাষ্ট্ৰসংঘৰ মজিয়াত অসমৰ বিদেশী সমস্যাৰ প্ৰসংগ উত্থাপন কৰে হীৰকজ্যোতি বৰাই । বিদেশী আগ্ৰাসনৰ ফলত অসমৰ থলুৱা লোক সন্মুখীন হোৱা সমস্যাৰ লগতে বিদেশী সমস্যাৰ ফলত অসমৰ সামাজিক, সাংস্কৃতিকৰ লগতে অৰ্থনৈতিক ক্ষেত্ৰত পেলোৱা প্ৰভাৱ সন্দৰ্ভতো ৰাষ্ট্ৰসংঘৰ মানৱ অধিকাৰ অধিৱেশনত উত্থাপন কৰে হীৰকজ্যোতি বৰাই ৷
হীৰকজ্যোতি বৰাৰ পৰিচয়:
নগাঁৱৰ ধিঙত জন্মগ্ৰহণ কৰা হীৰকজ্যোতি বৰাই কটন বিশ্ববিদ্যালয়ৰ পৰা উচ্চশিক্ষা গ্ৰহণ কৰি জড়িত হৈ পৰে সমাজসেৱাত । সাংস্কৃতিক ক্ষেত্ৰৰ সৈতেও জড়িত হীৰকজ্যোতি বৰাই Touch of Humanity নামৰ এটি স্বেচ্ছাসেৱী সংস্থাৰ জৰিয়তে ৰক্তদান কৰাকে ধৰি বিভিন্ন ক্ষেত্ৰত সমাজৰ প্ৰতি সেৱা আগবঢ়াই আহিছে । শেহতীয়াকৈ অসমৰ বিদেশী নাগৰিকৰ সমস্যাক লৈয়ো সৰৱ হৈ পৰিছে সমাজকৰ্মী হীৰকজ্যোতি বৰা ।
অসমৰ আৰু কি কি বিষয় উত্থাপিত হ’ব ৰাষ্ট্ৰসংঘৰ মজিয়াত ?
বিগত ২৫ ছেপ্টেম্বৰত অসমৰ বিদেশী সমস্যাক ৰাষ্ট্ৰসংঘৰ মজিয়াত উত্থাপন কৰা নগাঁৱৰ হীৰকজ্যোতি বৰাই অসমৰে আৰু তিনিটা বিষয় উত্থাপন কৰিব ৰাষ্ট্ৰসংঘৰ মানৱাধিকাৰ পৰিষদৰ অধিৱেশনত । কি কি বিষয় উত্থাপন কৰিব সেয়া উত্থাপনৰ পূৰ্বেই ৰাজহুৱা কৰিব নোৱাৰে বুলি হীৰকজ্যোতি বৰাই ই টিভি ভাৰতক জানিবলৈ দিয়ে যদিও ইতিমধ্যেই ৰাজ্য জোকাৰি যোৱা ধিঙৰ কিশোৰী ধৰ্ষণকাণ্ড উত্থাপন কৰাৰ পূৰ্ণ সম্ভাৱনা আছে । ইয়াৰোপৰি ধিঙৰ স্প্ৰে গেং প্ৰসংগও হীৰকজ্যোতি বৰাই উত্থাপন কৰাৰ সম্ভাৱনা আছে ।
লগতে পঢ়ক : ৬ নং দফা কাৰ্যকৰীকৰণ : শিল ঘঁহিয়েই থাকিব আছুৱে
বিপ্লৱ শৰ্মা সমিতিৰ ৬৭ টা পৰামৰ্শৰ ভিতৰত কোনকেইটা অসম চৰকাৰৰ দায়িত্বত ? জনালে মুখ্যমন্ত্ৰীয়ে
পুনৰ আশাৰ ৰেঙণি : অসম চুক্তিৰ ছয় নং দফা আৰু ইয়াৰ দীঘলীয়া পৰিক্ৰমা
