মৰাণ, 2 জুলাই: ৰাজ্যৰ বিভিন্ন প্ৰান্তৰ দৰে ডিব্ৰুগড় জিলাতো আহাৰৰ বানে গ্ৰহণ কৰিছে ভয়ংকৰ ৰূপ । ইয়াৰ মাজতে ডিব্ৰুগড় জিলাৰ 12 জনকৈ মাছমৰীয়া ব্ৰহ্মপুত্ৰৰ চাপৰিত আৱদ্ধ হৈ পৰিছিল । ব্ৰহ্মপুত্ৰৰ পানী হঠাৎ বৃদ্ধি পোৱাত ব্ৰহ্মপুত্ৰৰ চাপৰিত আৱদ্ধ হ'বলগীয়া হৈছিল মাছমৰীয়াসকল ।
ঘটনা সন্দৰ্ভত অৱগত হোৱাৰ পাচত সোমবাৰৰ দিনটো পৰ্যন্ত মাছমৰীয়াসকলক উদ্ধাৰ কৰিবৰ বাবে SDRF য়ে চেষ্টা চলাইছিল যদিও ব্ৰহ্মপুত্ৰৰ প্ৰৱল সোঁতৰ বাবে সেয়া সম্ভৱপৰ হৈ উঠা নাছিল ৷ উদ্ধাৰ কাৰ্যত সফল হ'ব পৰা নাছিল SDRF বাহিনী ।
ঘটনা সন্দৰ্ভত অৱগত হোৱাৰ পাচতে ডিব্ৰুগড় জিলাৰ আয়ুক্তগৰাকীয়ে মাছমৰীয়াকেইজনক উদ্ধাৰৰৰ বাবে সেনা বাহিনীৰ সহায় লয় আৰু মঙলবাৰে হেলিকপ্টাৰেৰে বায়ুসেনাই অভিযান চলাই উদ্ধাৰ কৰিবলৈ সক্ষম হয় আৱদ্ধ হৈ থকা 12 জনকৈ মাছমৰীয়াক । তিনিদিনে ব্ৰহ্মপুত্ৰৰ চাপৰিত আৱদ্ধ হৈ থকা মাছমৰীয়াসকলক অৱশেষত জীৱন্তে উদ্ধাৰ কৰিবলৈ সক্ষম হয় বায়ু সেনাই ।
দলটোক উদ্ধাৰ কৰি মোহনবাৰী বায়ু সেনাৰ শিবিৰলৈ লৈ যায় বায়ু সেনাই । ডিব্ৰুগড়ৰ চাৰখুলীয়া চাপৰি আৰু হাতীয়ালী চাপৰিৰ পৰা ব্যক্তিকেইজনক উদ্ধাৰ কৰি লগে লগে স্বাস্থ্য পৰীক্ষা কৰোৱা হয় । মাছমৰীয়াসকল বৰ্তমান সুৰক্ষিত বুলি জানিবলৈ দিছে জিলা আয়ুক্তগৰাকীয়ে ।
