তেজপুৰ, ৩ জুলাই: ৰাজ্যৰ আন ঠাইৰ লগতে বানৰ কবলত পৰিছে শোণিতপুৰ জিলাৰো বিস্তীৰ্ণ অঞ্চল । ব্ৰহ্মপুত্ৰ নদীৰ পানী কিছু পৰিমাণে কমিছে যদিও বিপদসীমাৰ ওপৰেৰে বৈ আছে । যোৱা ২৪ ঘণ্টাত বানপানীৰ ফলত তিনিজন লোকে প্ৰাণ হেৰুৱাইছে ৷ জীয়াভৰলী নদীৰ সোঁতত দুলাবাৰীৰ আবচনা বেগম নামৰ এগৰাকী মহিলা উটি যায় ৷ বুঢ়াচাপৰিৰ সিংহবীৰ ছেত্ৰী আৰু তেজপুৰ কলিবাৰীৰ মোলান দাস নামৰ লোক দুজন ব্ৰহ্মপুত্ৰৰ সোঁতত উটি যায় ৷ ইয়াৰে ছেত্ৰীৰ মৃতদেহ নদীৰ পাৰত উদ্ধাৰ হয় আৰু দাসৰ মৃতদেহ উদ্ধাৰ হোৱা নাই ।
ইফালে তেজপুৰৰ কলিবাৰীত বনৰীয়া হাতীয়ে মঙলবাৰৰ দিনটো ত্ৰাস চলোৱাৰ পিচত বুধবাৰে পুৱা বনৰীয়া হাতীকেইটা গাঁৱৰ পৰা আঁতৰাই নিবলৈ সক্ষম হয় যদিও হাতীৰ জাকটোৱে দপৰ্বতীয়া অঞ্চলত প্ৰৱেশ কৰে ৷ আনফালে তেজপুৰৰ কটন ৰোড কুমাৰ গাঁৱত বনৰীয়া ম’হে চলাইছে সন্ত্ৰাস ।বনৰীয়া ম’হৰ আক্ৰমণৰ ফলত মহিলাসহ আহত হয় তিনিগৰাকী ৷ আহত লোক কেইগৰাকী হৈছে - কুমাৰ গাঁৱৰ বিমল দাস(৬০), কটন ৰোডৰ নিভা সৰকাৰ (৫১) আৰু জাহাজঘাটৰ দুখী মাঝি (৫৬) ৷ আটাইকে তেজপুৰ কনকলতা অসমাৰিক চিকিৎসালয়লৈ অনা হৈছে ৷
লগতে পঢ়ক: বিপদৰ সময়ত আমাক মাত এষাৰ দিবলৈও আহৰি নাই স্থানীয় বিধায়কৰ: বন্যাৰ্ত - Assam Flood 2024
ব্ৰহ্মপুত্ৰৰ বাঢ়নী পানীত উটি অহা ম’হটোক লৈ শংকিত হৈ পৰিছে স্থানীয় লোক ৷ বৰ্তমান ম’হটোৱে কুমাৰ গাঁৱৰ এটা হোলাত অৱস্থান কৰিছে ৷
আনহাতে তেজপুৰ দ-পৰ্বতীয়া মইনা চুবুৰীত চাৰিটা বনৰীয়া হাতীয়ে ত্ৰাস চলাই দুজন লোকৰ ঘৰৰ গেট ভাঙি তহিলং কৰে । হাতী পোৱালি আৰু হাতীকেইটা বৰ্তমানেও সেই অঞ্চলতে অৱস্থান কৰি আছে ।
শোণিতপুৰ জিলাৰ ২৬ খন গাঁও বানৰ কবলত পৰিছে । জৰাসৰ নৈৰ পানী কিছু কমিছে যদিও ব্ৰহ্মপুত্ৰৰ লগতে জীয়াভৰলী নৈৰ পানী এতিয়াও বিপদসীমাৰ ওপৰেৰে বৈ আছে । ব্ৰহ্মপুত্ৰ, জীয়াভৰলী, জৰাসৰ, বেলশিৰি, ডিপোটা, পাঁচনৈ আৰু ঘগৰা নৈৰ বানত জিলাখনৰ ২৬ খন গাঁও প্লাবিত হৈছে । বৰছলা সমষ্টিৰ ১ নং বচাশিমলু, ২ নং বচাশিমলু, চিতলমাৰীৰ লগতে বৰছলাৰ বিস্তীৰ্ণ অঞ্চল বানৰ কবলত ।
লগতে পঢ়ক: জাঁজীৰ বাঢ়নী পানীয়ে ভাবুকি কঢ়িয়াইছে টীয়কৰ বনাই নপমুৱাৰ ৰিং বান্ধলৈ - ASSAM FLOOD 2024
অনাহাৰ অনিদ্ৰাত দিন কটাইছে বানাক্ৰান্তই ৷ বহু লোকে ইতিমধ্যে আশ্ৰয় লৈছে মথাউৰিত ৷ বৰ্তমান পৰ্যন্ত সেই অঞ্চলত বানাক্ৰান্তই চৰকাৰী কোনো সুবিধা লাভ নকৰাৰ অভিযোগ ৷ আনহাতে, জিলা প্ৰশাসনে বালিপৰাৰ অমিয় ভৱন আৰু তেজপুৰৰ লুথেৰাণ হাইস্কুলত আশ্ৰয় শিবিৰ স্থাপন কৰিছে ।
জিলাখনত মুঠ ৫ টা ৰাজহ চক্ৰৰ ভিতৰত ৬৫,০৬১ জন লোক বানৰ কবলত পৰিছে ৷ ইয়াৰ ভিতৰত ২৭,৬৩৩ জন পুৰুষ, ২১,৮৭৯ গৰাকী মহিলা আৰু ১৫, ৫৪৯ টি শিশু আছে । জিলাখনত ৬৩৭.১ হেক্টৰ কৃষি ভূমি বানৰ কবলত ক্ষতিগ্ৰস্ত হয় । জিলা প্ৰশাসনে বৰ্তমানলৈকে ১ টা সাহায্য শিবিৰ আৰু ১০ সাহায্য বিতৰণ কেন্দ্ৰ স্থাপন কৰিছে বুলি জানিবলৈ দিয়ে জিলা দুৰ্যোগ প্ৰশমন বিভাগে ।
ব্ৰহ্মপুত্ৰ নদীৰ জলপৃষ্ঠ তেজপুৰ গণেশ ঘাটত বিপদসীমা 65.23 ছেঃমিঃ অতিক্ৰম কৰি 66.10 ছেঃমিঃ ওপৰেৰে বৈ আছে ৷ খলিহামাৰিত 73.50 ছেঃমিঃৰ বিপৰীতে 73.22 ছেঃমিঃ, জীয়া ভৰলী নদী বিপদসীমাৰ 78.00 ছেঃমিঃৰ বিপৰীতে 78.87 ছেঃমিঃ ওপৰেৰে বৈছে ।
আনহাতে ব্ৰহ্মপুত্ৰ নদীৰ উপনৈসমূহৰ ভিতৰত শোণিতপুৰ জিলাত বেলশিৰি, গাভৰু নদী, ডিপোতা, পাঁচনৈ নদী, জৰাসৰ নদী আৰু ঘিলাধাৰী নদী বিপদসীমাৰ তলেৰে বৈ আছে যদিও এই নদীসমূহৰ জলস্তৰ বৃদ্ধিৰ সম্ভাৱনা আছে ৷
লগতে পঢ়ক: এফালে বান-আনফালে বাঘ : নগাঁৱত বাঘৰ আক্ৰমণত আহত দুজন - Tiger scare in Nagaon
