তেজপুৰ/বিশ্বনাথ, ২ মে’ : অদ্ভুত! অবিশ্বাস্য! সততে নেদেখা-নুশুনা এক ঘটনা সংঘটিত হৈছে বিশ্বনাথ জিলাৰ গহপুৰৰ এখন গাঁৱত । বিজ্ঞান প্ৰযুক্তি বিদ্যাৰ দিনতো বহু সময়ত বিভিন্ন ঠাইত এনে কিছুমান ঘটনাৰ সংঘটিত হোৱাৰ শুনিবলৈ বা দেখিবলৈ পোৱা যায় । বহুলোকে এইধৰণৰ ঘটনা বিশ্বাস নকৰিলেও আওপকীয়াকৈ এনেধৰণৰ ঘটনাক প্ৰাধান্য দিয়া দেখিবলৈ পোৱা যায় ।
এনে এক ঘটনাই সংঘটিত হৈছে গহপুৰৰ এখন গাঁৱত । গাঁওখনৰ নাম জালুকবাৰী । গাঁওবাসীৰ বিশ্বাস অনুসৰি স্বয়ং ভগবানৰ ৰূপত আহিছে দুটা বগা ঘোঁৰা । বগা ঘোঁৰা দুটা দেখি ৰাইজৰ মাজত লাগিল হুৱা-দুৱা । গাঁওখনৰ ৰাইজ একগোট হৈ ভক্তিত গদগদ হৈ ঘোঁৰা দুটাৰ গাত চেলেং, গামোচা দি ধূপ-ধূনা জ্বলাই প্ৰাৰ্থনা কৰি পূজা আগবঢ়াইছে ।
উল্লেখ্য যে বুধবাৰৰ এই ঘটনাৰ আচল কাহিনী এমাহ পূৰ্বৰ । ৰাইজৰ মন্তব্য অনুসৰি গাঁওখনত সাতগৰাকী মহিলাৰ গাত আই লম্ভিছিল । সেই সাতগৰাকী মহিলাই ৰাইজক কৈছিল যে বুধবাৰৰ দিনটোতেই দুগৰাকী ডাঙৰীয়াৰ আৰ্বিভাব হ'ব । সেই অনুসৰি বুধবাৰে ৬ বজাত জালুকবাৰীৰ প্ৰশান্ত বৰাৰ বাসগৃহৰ পিচফালে খেৰৰ মেজিত খেৰ খাই থকা অৱস্থাত প্ৰত্যক্ষ কৰে আৰু লগে লগে গাঁৱৰ ৰাইজক অৱগত কৰোৱায় ।
তাৰ পিচতে ৰাইজে ভগৱানৰ আৱিৰ্ভাৱ বুলি ভাবি ভক্তিত গদগদ হৈ আঁঠু কাঢ়ি, মাটিত বাগৰি প্ৰাৰ্থনা কৰি আছে । আনহাতে আইলম্ভা সাতগৰাকী মহিলা আহি অদ্ভূতধৰণৰ মন্তব্য কৰি মূৰত বাটি লৈ, মাটিত বাগৰি অদ্ভূতধৰণৰ আচৰণ কৰে । এইদৰে বৰ্তমান সময়লৈকে কথাটো শুনি বহু লোকৰ সমাগম ঘটিছে আৰু পূজা অৰ্চনা কৰা দেখিবলৈ পোৱা গৈছে ।
বিজ্ঞান-প্ৰযুক্তিবিদ্যাৰ দ্ৰুত বিকাশৰ সময়ত এনেদৰে ঘোঁৰাৰ ৰূপত ভগৱানৰ অৱতাৰ কিমান যুক্তিসংগত সেয়া এতিয়া বহুতৰে বাবে হৈ পৰিছে চিন্তাৰ কাৰণ ৷
লগতে পঢ়ক: বিশ্ব শান্তিৰ মানসেৰে পদব্ৰজে কেদাৰনাথ যাত্ৰা গহপুৰৰ চন্দনৰ
