ৰহা, 25 জুন: ৰহাৰ আমচৈত বন বিভাগৰ জ্ঞাতসাৰে চলিছে অবৈধভাবে শিল খনন । অভিযোগ অনুসৰি আমচৈ শিৱকুণ্ড টঙীয়া ভিলেজত অবৈধভাবে পাহাৰৰ শিল কাটি ৰমৰমীয়া ব্যৱসায় চলাইছে একাংশ চোৰাং ব্যৱসায়ীয়ে ।
স্থানীয় লোকে তোলা অভিযোগ অনুসৰি বিগত বহু বছৰ ধৰি চৰকাৰ তথা বন বিভাগৰ অনুমতি অবিহনে এনেদৰে শিল খনন কৰাৰ লগতে ইয়াৰ চোৰাং বেহা চলাই থকা হৈছে । শিল খনন আৰু বিক্ৰীৰ বাবে বিভাগীয় কোনো অনুমোদন লাভ নকৰাকৈয়ে এনেদৰে চোৰাং কাৰবাৰ চলাই থকা কাৰ্যত ক্ষোভ প্ৰকাশ কৰিছে স্থানীয় লোকে ।
লগতে পঢ়ক: জাঁজী নৈত কৰ ফাঁকিৰে বালি খনন চলাই যোৱাৰ অভিযোগ অসমীয়া যুৱ মঞ্চৰ - Illegal Sand Mining In Amguri
স্থানীয় ৰাইজে এই সন্দৰ্ভত প্ৰতিক্ৰিয়া প্ৰকাশ কৰি কয়, "এনেকৈ বছৰ বছৰ ধৰি প্ৰায় প্ৰতিদিনে একাংশ চোৰাং ব্যৱসায়ীয়ে পাহাৰৰ শিল খনন কৰি গৈছে যদিও কোনো কাণষাৰ নাই সংশ্লিষ্ট কৰ্তৃপক্ষৰ । স্থানীয় ব্যক্তি জড়িত হৈ আছে এই চোৰাং কাৰ্যৰ সৈতে । আনকি শিল খননৰ পাচত আমচৈ খণ্ড বন বিষয়াৰ কাৰ্যালয়ৰ সমুখেৰেই নিৰাপদে কঢ়িয়াই লৈ যোৱা হয় এই গাড়ীবোৰ । বন বিভাগ আৰু চোৰাং শিল ব্যৱসায়ীৰ গোপন মিতিৰালিৰ বাবে সম্ভৱ হৈছে এই অবৈধ শিল খনন কাৰ্য ৷"
সমগ্ৰ ঘটনা সন্দৰ্ভত সংশ্লিষ্ট বন সংমণ্ডলৰ ভূমিকাক কঠোৰ ভাষাৰে সমালোচনা কৰে স্থানীয় ৰাইজে ৷ আনকি বিষয়টো সন্দৰ্ভত কেবাবাৰো বিভাগত অভিযোগ দাখিল কৰাৰ পাছতো কোনো পদক্ষেপ গ্ৰহণ কৰা হোৱা নাই বুলি চাঞ্চল্যকৰ ভাষ্য সংবাদ মাধ্যমৰ আগত প্ৰকাশ কৰে স্থানীয় লোকে ।
উল্লেখ্য যে, বনাঞ্চলৰ পৰিমাণ হ্ৰাস হৈ অহাৰ ফলত অঞ্চলটোত বন্যহস্তীৰ মুক্ত বিচৰণ বৃদ্ধি পাইছে বুলি স্থানীয় লোকে জনায় ৷ যিয়ে শংকিত কৰি তুলিছে স্থানীয় লোকসকলক ৷
