লখিমপুৰ, ১৬ ফেব্ৰুৱাৰী : শুকুৰবাৰৰ পৰা আৰম্ভ হ'ল হাইস্কুল শিক্ষান্ত পৰীক্ষা । এইবাৰ লখিমপুৰ জিলাত ১৭ হেজাৰ ৭১১ গৰাকী পৰীক্ষাৰ্থী অৱতীৰ্ণ হৈছে । জিলাখনৰ মুঠ ৬০ টা কেন্দ্রত অনুষ্ঠিত হৈছে এই হাইস্কুল শিক্ষান্ত পৰীক্ষা । উচ্চতৰ মাধ্যমিক পৰীক্ষাৰ দৰে হাইস্কুল শিক্ষান্ত পৰীক্ষাও নিয়াৰিকৈ অনুষ্ঠিত কৰিবলৈ জিলা প্ৰশাসন, শিক্ষা বিভাগ, আৰক্ষী আদিয়ে বিভিন্ন ব্যৱস্থা গ্ৰহণ কৰিছে । আৰক্ষী,আৰক্ষীৰ বিশেষ শাখাৰ লোকক পৰীক্ষা কেন্দ্র সমূহত নিয়োগ কৰা হৈছে । ফ্লায়িং স্কোৱাডো গঠন কৰা হৈছে ।
পৰীক্ষা সুকলমে অনুষ্ঠিত কৰিবলৈ জিলা দণ্ডাধীশে পৰীক্ষা কেন্দ্র সমূহৰ এশ বৰ্গ মিটাৰ ব্যাসাৰ্ধত ১৪৪ ধাৰা জাৰি কৰি কেতবোৰ নিষেধাজ্ঞা আৰোপ কৰিছে । জিলা আয়ুক্তৰ কাৰ্যালয়ে ৰাজহ চক্র বিষয়া সকলৰ নেতৃত্বত একোটাকৈ ফ্লায়িং স্কোৱাডো গঠন কৰিছে । ৬০ টা পৰীক্ষা কেন্দ্রত ৬০ গৰাকী ছুপাৰভাইজিং বিষয়া নিয়োগ কৰা হৈছে । কেন্দ্র সমূহত আৰক্ষী নিয়োগ কৰাৰ লগতে আৰক্ষীৰ বিশেষ শাখাই চোকা দৃষ্টি ৰাখিছে । পৰীক্ষা সুকলমে অনুষ্ঠিত কৰিবলৈ কেন্দ্ৰৰ বাহিৰে- ভিতৰে চি চি টি ভি কেমেৰা সংস্থাপন কৰা হৈছে । মূলতঃ নকল ৰোধৰ বাবেই এই কঠোৰ ব্যৱস্থা গ্ৰহণ কৰা হৈছে ।
ইপিনে, শিক্ষা বিভাগে হাইস্কুল শিক্ষান্ত পৰীক্ষা বিলোপ কৰাৰ সিদ্ধান্তক একাংশ অভিভাৱকে আদৰণি জনাইছে । তেওঁলোকে কয় যে উচ্চতৰ মাধ্যমিকৰ পৰীক্ষাইহে ছাত্র- ছাত্রীৰ জীৱনৰ গতি নিৰ্ণয় কৰে, হাইস্কুল শিক্ষান্ত পৰীক্ষাই নহয় । সেয়ে মেট্ৰিক পৰীক্ষা বিলোপ কৰাৰ সিদ্ধান্ত আদৰণীয় বুলি এইসকল অভিভাৱকে কয় । আজিৰ পৰা আৰম্ভ হোৱা অন্তিমটো হাইস্কুল শিক্ষান্ত পৰীক্ষা প্ৰথম দিনা পুৱাবেলা নিজৰ সন্তানক পৰীক্ষা কেন্দ্ৰত থবলৈ আহি এনেদৰে নিজৰ অনুভব প্ৰকাশ কৰে একাংশ অভিভাৱকে ।
লগতে পঢ়ক:যোৰহাটত হাইস্কুল শিক্ষান্ত পৰীক্ষাত অৱতীৰ্ণ ১১,৫৪১ গৰাকী পৰীক্ষাৰ্থী
