তিনিচুকীয়া, ১৩ এপ্ৰিল : ‘‘ন-বৰষুণত নৈৰ পানী বাঢ়িলে,
টুপাই বুৰ মাৰিলে শিহু ।
চাওঁতে চাওঁতে আজি আহি পালেহি ঐ
ব'হাগৰ বিহু ।৷’’
আজি গৰু বিহু ৷ আজি ৰাজ্যজুৰি অতি উলহ-মালহেৰে পালন কৰিছে গৰু বিহু । প্ৰতি বছৰে অসমীয়া বছৰৰ চ’ত মাহৰ শেষৰ দিনটোত পালন কৰা হয় এই গৰু বিহু ৷ কালি উৰুকা, আজি গৰু বিহু আৰু কাইলৈ মানুহ বিহু ৷ উৰুকাৰ নিশা গৃহস্থই গৰু বিহুৰ প্ৰস্তুতি কৰে ৷ গৰুক গা ধুৱাবলৈ মাহ-হালধি খুন্দি সাজু কৰাৰ লগতে গৰুক খোৱাবৰ বাবে লাও, বেঙেনা, হালধি, থেকেৰাৰে চাত বনায় । সমান্তৰালভাৱে গৰুক পিন্ধাৰ বাবে তৰা গছেৰে পঘাও বনোৱা হয় ৷
বিহু এক কৃষিভিত্তিক উৎসৱ ৷ আৰু গৰু কৃষি কৰ্মত এক এৰাব নোৱৰা ভূমিকা আছে ৷ সেয়ে গৰু বিহু উপলক্ষে আজি পুৱাই গোহালিৰ গৰুক মাহ হালধিৰে গা ধুৱাই আৰু লাও, বেঙেনা, হালধি, থেকেৰা খোৱায় ৷ লগতে গৃহস্থই গায় - লাও খা, বেঙেনা খা, থেকেৰা খা, হালধি খা বছৰে বছৰে বাঢ়ি যা ৷ মাৰে সৰু বাপেৰে সৰু তই হবি বৰ বৰ গৰু ৷
এনেদৰে গীত জুৰি গৃহস্থই গৰুৰ দীৰ্ঘায়ু আৰু শ্ৰীবৃদ্ধি কামনা কৰে ৷ তাৰ পাছতে গৰুৰ গাত থকা মাখি খেদাবৰ বাবে দীঘলতী আৰু মাখিয়তিয়ে গাত কোবোৱা হয় ৷ লগতে গৃস্থই গায় - দীঘলতী দীঘল পাত গৰু কোবাও জাক জাক, মাখিয়তিৰ মাখি পাত মাখি মাৰো জাত জাত ৷
লগতে পঢ়ক : গৰুৰ বিহুত 101 এবিধ শাক কিয় খোৱা হয় জানেনে ? - Rangali Bihu 2024
গৰু বিহুত বহুলোকে নিজৰ গোহালিতেই গৰু-গাইক গা ধুৱাই পৰম্পৰা পালন কৰাৰ বিপৰীতে বহু স্থানত ৰাইজে একত্ৰিত হৈ সমজুৱাকৈ নদী, বিল কিম্বা পুখুৰীৰ পাৰলৈ লৈ যায় গা ধুৱাবলৈ ৷ গৰুক গা ধুৱাৰ লগতে ৰাইজে মিলি কণী যুঁজো খেলে ৷ কণী যুঁজ গৰু বিহুৰ এক পৰম্পৰা ৷ ৰাজহুৱাকৈ ইজনে সিজনৰ লগত কণী যুঁজ খেলি সেইসমূহ কণীখিনিৰ লগত আমৰলি পাৰি তাৰে সৈতে এসাঁজ খায় ৷
পৰম্পৰা আছে যে গৰু বিহুৰ দিনটোত মানুহে ১০১ বিধ শাকেৰে এসাঁজ খায় ৷ আজিৰ দিনটোত ১০১ বিধ খালে শৰীৰ সুস্থ হৈ থাকে ৷ বহুতে কয় যে ১০১ বিধ শাক-পাচলি যিহেতু সহজতে নাপায়, গতিকে আমৰলি খালে ১০১ বিধ শাক খোৱাৰ দৰে হয় ৷ কাৰণ আমৰলিয়ে সকলো খায় ৷ সেই গতিকে গৰু বিহুৰ দিনা আমৰলি আৰু কণী খোৱাৰ এক পৰম্পৰা আছে ।
গৰু বিহুৰ দিনা আবেলি নিজৰ গৰু বিচাৰি আনি গোহালিত নতুন পঘাৰে বান্ধি গৰুক পিঠাপনা খোৱা হয় ৷ তাৰ পাছতে মানুহে খায় বিহুৰ পিঠাপনা । সাধাৰণতে আজিৰ যান্ত্ৰিকতাৰ দিনত যুৱ প্ৰজন্মই পাহৰি পেলাইছে গৰু বিহুৰ এনে পৰম্পৰাসমূহ । নাজানে গৰু বিহুৰ প্ৰাসংগিকতা ৷
গাঁৱসমূতো এতিয়া গৰুৰ সলনি টেক্টৰেৰে খেতি কৰিবলৈ আৰম্ভ কৰাৰে পৰা নাইকিয়া হৈ পৰিছে আগৰ দৰে গৰু ৷ তাৰ মাজতো আজিও বিশেষকৈ গাঁওসমূহত দেখা যায় গৰু বিহুৰ এক বিনন্দীয়া পৰিৱেশ ৷
লগতে পঢ়ক : ৰঙালীৰ ৰঙেৰে সাজি উঠিছে বৰঝাৰ বিমান বন্দৰ - Bohag bihu 2024
