গুৱাহাটী: গুৱাহাটীত শিহৰণকাৰী ঘটনা । যুৱকৰ ছুৰিকাঘাতত এগৰাকী যুৱতীৰ মৃত্যু । বৃহস্পতিবাৰে আগবেলা গুৱাহাটীৰ দিছপুৰ লাষ্টগেটত সংঘটিত হৈছে এই ঘটনা । এখন চাৰিচকীয়া বাহনত অহা এজন যুৱকে দিছপুৰ লাষ্টগেটৰ নাহৰণি পথত যুৱতীগৰাকীক ছুৰিকাঘাত কৰে ।
যুৱতীগৰাকীক গুৱাহাটী মেডিকেল কলেজ হাস্পতাললৈ লৈ যোৱা হয় যদিও চিকিৎসকে তেওঁক মৃত ঘোষণা কৰে । চিকিৎসকৰ মতে পেটত, ডিঙি আৰু হাতত আঘাত প্ৰত্যক্ষ কৰা হৈছে । প্ৰায় ১২ বজাত যুৱতীগৰাকীক জি এম চি এইচত মৃত ঘোষণা কৰা হয় ।
জি এম চি এইচৰ অধীক্ষক অভিজিৎ শৰ্মাই জনাইছে এই কথা । ছুৰিকাঘাতত মৃত্য হোৱা যুৱতীগৰাকী টিংখাঙৰ মৌচুমী গগৈ বুলি চিনাক্ত কৰা হয় । ঘাতকজনৰ নাম ভূপেন দাস । ভূপেনৰ ঘৰ নলবাৰীত । বশিষ্টত বাস কৰি আহিছিল অভিযুক্ত ভূপেন দাসে ।
মৌচুমীক ছুৰিকাঘাত কৰিয়েই নিজকে শেষ কৰি দিয়াৰ চেষ্টা চলাই অভিযুক্ত ঘাতক ভূপেন দাসে । আৰক্ষীয়ে অভিযুক্ত ঘাতকক আটক কৰি চিকিৎসাৰ বাবে লৈ আনে জি এম চি এইচলৈ । এই প্ৰসংগত ৰাজ্যৰ আৰক্ষী সঞ্চালক প্ৰধানেও সামাজিক মাধ্যম X যোগে যুৱতীগৰাকীক ছুৰিকাঘাত কৰা ঘটনাৰ লগতে যুৱকজনে আত্মহত্যাৰ বাবে চলোৱা প্ৰচেষ্টাৰ কথা সদৰী কৰে ।
আৰক্ষী সঞ্চালক প্ৰধানগৰাকীয়ে X ত উল্লেখ কৰে,“গুৱাহাটীত এগৰাকী ছোৱালীক ছুৰিকাঘাত কৰা প্ৰসংগত এজন দুৰ্বৃত্তক আটক কৰা হৈছে । তেওঁ নিজকে ছুৰীৰে আঘাত কৰিছে আৰু চিকিৎসালয়ত ভৰ্তি কৰোৱা হৈছে ।”
আনহাতে, ঘটনাৰ পিছতেই ঘটনাস্থলীত উপস্থিত হয় আই জি পি পাৰ্থসাৰথি মহন্তকে ধৰি উচ্চপদস্থ আৰক্ষী বিষয়া । ঘটনা প্ৰসংগত আই জি পিগৰাকীয়ে কয়,“নাহৰণি পথৰ হাউচ নম্বৰ ১৪ত যুৱতীগৰাকীয়ে যোৱা এমাহ ধৰি ভাৰা লৈ আছিল । যুৱতীগৰাকীৰ বয়স ২৪/২৫ বছৰমান । এটা এন জি অ’ত ছোৱালীগৰাকীয়ে কাম কৰে, পুৱা ১০.৩০-১১ .০০ বজাত কামলৈ তেওঁ ওলাই যায় । আজি কামলৈ ওলাই যাওতেই ছুৰী মৰা ঘটনাটো সংঘটিত হ’ল । গেটৰ সন্মুখত এজন ল’ৰাই আক্ৰমণ কৰাত ডিঙি, পেট আৰু হাতত বেয়াকৈ আঘাতপ্ৰাপ্ত হয় ।”
ঘটনাস্থলীত উপস্থিত হৈ আৰক্ষীৰ স্পেচিয়েল তদন্তকাৰী দলে চিচি কেমেৰাৰ ফুটেজ সংগ্ৰহ কৰে ৷ ঘাতক যুৱকজনে নিজৰ পেটতো ছুৰীৰে আঘাত কৰে । আই জি পি পাৰ্থ সাৰথি মহন্তই জনায়,“ল’ৰাজনে নিজৰ পেটতো আঘাত কৰিছে । হয়তো নিজকে শেষ কৰাৰ চেষ্টা কৰিছিল ৷ ল’ৰাজনক এখন গাড়ীত পোৱাৰ পিছত হাস্পতাললৈ লৈ যোৱা হৈছে ।”
প্ৰেমৰ সম্পৰ্কই মৃত্যুৰ কাৰণ :
প্ৰেমৰ সম্পৰ্ক এৰাই চলাৰ বাবেই যুৱতীগৰাকীৰ প্ৰাণ গ’ল ঘাতকৰ হাতত । আৰক্ষীৰ প্ৰাথমিক তদন্ত অনুসৰি ঘাতক ভূপেন দাসে নিহত যুৱতীগৰাকীৰ সৈতে প্ৰেমৰ সম্পৰ্ক ৰক্ষা কৰিব বিচাৰিছিল । কিন্তু যুৱতীগৰাকীয়ে সেয়া বিচৰা নাছিল । যাৰ বাবে যুৱতীগৰাকীক এই পৃথিৱীৰ পৰাই হত্যা কৰি বিদায় দিলে আচামী ভূপেন দাসে ।
শীৰ্ষ আৰক্ষী বিষয়া পাৰ্থসাৰথি মহন্তই সংবাদ মধ্যমক জনাই, “এতিয়ালৈকে পোৱা তথ্য অনুসৰি সেই ল’ৰাজনে যুৱতীগৰাকীৰ লগত এটা ৰোমাণ্টিক সম্পৰ্ক স্থাপন কৰিব বিচাৰিছিল । কিন্তু ছোৱালীজনীয়ে সেই সম্পৰ্ক বিচৰা নাছিল । সেয়ে ল’ৰাজনে ছোৱালীজনীক সম্পৰ্ক স্থাপনৰ বাবে বাৰে বাৰে হেঁচা প্ৰয়োগ কৰি আহিছিল ৷ ল’ৰাজনৰ নাম ভূপেন দাস । নলবাৰীৰ তেওঁ ৷ যিহেতু ছোৱালীজনীয়ে প্ৰেম প্ৰত্যাখান কৰিছিল ৷ শেষত এই ঘটনাটো সংঘটিত হ’ল ।”
আচামী ভূপেনৰ লগত কোন আছিল ?
এতিয়া প্ৰশ্ন উঠিছে যে ঘটনাটো সংঘটিত কৰি আত্মহননৰ চেষ্টা চলোৱা আচামীজন অকলেই আছিলনে ? নে লগত কোনো আন ব্যক্তি আছিল ? গাড়ীখন নিজে চলাই আহিছিল, নে আন কোনোবাই চলাই আহিছিল ? এই কথা এতিয়াও নিশ্চিত হোৱা নাই । আৰক্ষীৰ মতে মূল আচামীজনক গ্ৰেপ্তাৰ কৰা হৈছে যেতিয়া সময়ত সবিশেষ সোনকালেই গম পোৱা যাব ৷ তদন্ত অব্যাহত আছে ৷
ঘাতকৰ অত্যাচাৰৰ বিৰুদ্ধে আৰক্ষীক গোচৰো দিছিল মৌচুমীয়ে :
নৃশংস উন্মাদৰ একপক্ষীয় প্ৰেমিকৰ হাতত এগৰাকী যুৱতীৰ মৃত্যু প্ৰসংগত সাঙোৰ খাইছে আৰক্ষীৰ দুৰ্বল ভূমিকাৰ কথাও । কিয়নো ঘাতক ভূপেনৰ বিৰুদ্ধে পাণবজাৰ থানাত কিছুদিন পূৰ্বে গোচৰ দিছিল যুৱতীগৰাকীয়ে । তেওঁৰ আত্মীয়ই জনোৱা অনুসৰি ইতিমধ্যে কেইবাবাৰো যুৱতীগৰাকীক হত্যাৰ ভাবুকি দিছিল ভূপেন দাসে । আনকি জালুকাবাৰীত হাতত চোকা অস্ত্ৰ লৈ যুৱতীগৰাকীক খেদি যোৱাৰো তথ্য জনাইছে আত্মীয়ই ।
সেয়ে যুৱতীগৰাকীৰ মৃত্যুৰ প্ৰসংগত চৰ্চালৈ আহিছে আৰক্ষীৰ ভূমিকাও । চৰ্চা হৈছে সময়ত আৰক্ষীয়ে পদক্ষেপ লোৱাহ’লে যুৱতীগৰাকীৰ অপমৃত্যু নহ’লেহেঁতেন । এই প্ৰসংগত আৰক্ষীৰ শীৰ্ষ বিষয়া আই জি পি পাৰ্থসাৰথি মহন্তই জনাই ,“যুৱতীগৰাকীয়ে পাণবজাৰ থানাত এটা গোচৰ দিছিল । এনেকুৱা গোচৰৰ ক্ষেত্ৰত যিবোৰ কৰণীয় সকলো পাণবজাৰ আৰক্ষীয়ে কৰিছিল । এই গোচৰৰ ক্ষেত্ৰতো আমি সবিশেষ চাম ।”
