গুৱাহাটী,১১ এপ্ৰিল : ৰাজ্যৰ চৌদিশে ঈদ-উল-ফিটৰক লৈ ব্যাপক প্ৰস্তুতি চলি থকাৰ মাজতে বুধবাৰে নিশা গুৱাহাটীৰ মাজমজিয়াত সংঘটিত হৈছে ভয়ংকৰ ঘটনা । অচিনাক্ত লোকে ৰাজপথত পেলাই থৈ গ'ল ৰক্তক্ষয়ী যুৱতীক । মহানগৰীৰ গান্ধীবস্তিত সংঘটিত হৈছে এই চাঞ্চল্যকৰ ঘটনাটো ।
স্থানীয় একাংশ লোকে জনোৱা মতে নিশা ৰাজপথত যুৱতীগৰাকীক এজন যুৱকে চোকা অস্ত্ৰৰে আক্ৰমণ কৰে । চোকা অস্ত্ৰৰ আঘাতত গুৰুতৰভাৱে আহত যুৱতীগৰাকীক পিচত ৰাজপথতে পেলাই থৈ আক্ৰমণকাৰী যুৱকজনে পলায়ন কৰে । অভিযুক্ত যুৱকজনক ইব্ৰাহিম বুলি সন্দেহ কৰা হৈছে । কিন্তু কি কাৰণত ইব্ৰাহিমে যুৱতীগৰাকীক আক্ৰমণ কৰিলে সেয়া এতিয়াও ৰহস্যৰ আৱৰ্তত ।
নিশা প্ৰায় ৮ মান বজাত এই ঘটনা সংঘটিত হোৱাৰ সন্দেহ কৰিছে স্থানীয় ৰাইজে । ইফালে তেজেৰে লুতুৰি-পুতুৰি অৱস্থাত স্থানীয় ৰাইজে যুৱতীগৰাকীক উদ্ধাৰ কৰে । তাৰ পিচতে স্থানীয় ৰাইজৰ তৎপৰতা আহত যুৱতীগৰাকীক নিশাই গুৱাহাটী চিকিৎসা মহাবিদ্যালয় হাস্পতালত ভৰ্তি কৰোৱা হয় । ইফালে নিশাই ঘটনাস্থলীত উপস্থিত হৈ চানমাৰি আৰক্ষীয়ে ঘটনাৰ তদন্ত আৰম্ভ কৰে ।
স্থানীয় লোকে জনোৱা মতে ইব্ৰাহিম আৰু যুৱতীগৰাকীৰ মাজত প্ৰেমৰ সম্পৰ্ক আছিল । কিছুদিনৰ পৰা ইব্ৰাহিমে সেই অঞ্চলটোত অস্থায়ীভাৱে বাস কৰি আছিল । আনহাতে বিগত কিছুদিনৰ পৰা দুয়োৰে মাজত কিছু বাক-বিতণ্ডা চলি থকাৰো ইংগিত দিছে স্থানীয় লোকে । সেয়েহে প্ৰশ্ন হৈছে প্ৰেমৰ বাবে নে অন্য কাৰণত অভিযুক্ত ইব্ৰাহিমে যুৱতীগৰাকীক আক্ৰমণ কৰিলে ? ইয়াৰ আঁৰত কি আছে ? যুৱতীগৰাকী ইব্ৰাহিমে আক্ৰমণ কৰিছিল নে আন কোনো লোক জড়িত আছিল এই ঘটনাত ? আৰক্ষীৰ তদন্তৰ পাচতহে সকলো তথ্য পোহৰলৈ আহিব ।
লগতে পঢ়ক :মাতৃৰ সন্মুখৰ পৰাই দুবছৰীয়া শিশুক অপহৰণ কৰিলে অবৈধ প্ৰেমিকে - Guwahati Kidnapping Case
