নগাঁও/হোজাই, ৩১ মে’: হোজাইত পুনৰ গৰজি উঠিল আৰক্ষীৰ বন্দুক । ড্ৰাগছ মাফিয়াৰ বিৰুদ্ধে আৰক্ষীৰ এই গৰ্জন । হোজাই আৰক্ষীৰ গুলীত আহত হৈছে এটা ড্ৰাগছ মাফিয়া । ঘটনাৰ বিৱৰণি অনুসৰি হোজাই জিলাৰ লংকাৰ ন খুটিত সংঘটিত হৈছে এই ঘটনাটো । বিগত কেইবামাহ ধৰি জিলাখনৰ বিভিন্ন ঠাইত ড্ৰাগছ মাফিয়াই তাণ্ডৱ চলাই আহিছে । সেয়েহে আৰক্ষীয়ে এই মাফিয়াৰ বিৰুদ্ধে চলাইছে অভিযান । এই অভিযানৰ মাজতেই পুনৰ গৰজি উঠিল আৰক্ষীৰ মাৰণাস্ত্ৰ ।
বৃহস্পতিবাৰে নিশা হোজাই জিলাৰ আৰক্ষীয়ে এক গোপন সূত্ৰৰ তথ্য লাভ কৰাৰ পাচতেই লংকা আৰক্ষীৰ এটা দলে চলালে অভিযান । আৰক্ষীয়ে অভিযান চলাই গ্ৰেপ্তাৰ কৰিবলৈ সক্ষম হয় চাহাব উদ্দিন নামৰ এটা ড্ৰাগছ বেপাৰীক । আৰক্ষীয়ে কৰায়ত্ব কৰাৰ পাচতেই আৰক্ষীৰ দলটোক আক্ৰমণ কৰি পলায়নৰ চেষ্টা কৰে ড্ৰাগছ বেপাৰী চাহাব উদ্দিনে । আৰক্ষীৰ বেহু ভেদ কৰি পলাবলৈ চেষ্টা কৰাৰ লগে লগে ড্ৰাগছ বেপাৰীটোলৈ লক্ষ্য কৰি গুলীচালনা কৰে অভিযানকাৰী দলটোৱে । আৰক্ষীৰ গুলীত আহত হয় চাহাব উদ্দিন ।
আৰক্ষীৰ গুলীত আহত হৈ পৰাৰ পাচতেই আৰক্ষীৰ দলটোৱে পুনৰ গ্ৰেপ্তাৰ কৰে চাহাব উদ্দিনক । পুনৰ গ্ৰেপ্তাৰ কৰা চাহাব উদ্দিনক চিকিৎসাৰ বাবে নগাঁও চিকিৎসা মহাবিদ্যালয় হাস্পতালত ভৰ্তি কৰোৱা হয় । সম্প্ৰতি নগাঁও চিকিৎসা মহাবিদ্যালয়ত চিকিৎসাধীন চাহাব উদ্দিন সংকটমুক্ত বুলিও জানিব পৰা গৈছে । ধৃত চাহাব উদ্দিনৰ পৰা ড্ৰাগছভৰ্তি দহটাকৈ চাবোনৰ বাকচ উদ্ধাৰ কৰে আৰক্ষীৰ দলটোৱে। বৰ্তমানে হোজাই আৰক্ষীৰ উচ্চপদস্থ বিষয়াসকলে তদন্ত অব্যাহত ৰাখিছে ।
