গুৱাহাটী, 6 আগষ্ট: শাৰীৰিক প্ৰতিবন্ধকতাকো নেওচি জীৱন সংগ্ৰাম অব্যাহত ৰাখিছে মহানগৰীৰ এজন লোকে ৷ এখন ভৰিৰে এটা পৰিয়ালৰ ভৰণ-পোষণৰ দায়িত্ব বহন কৰি আহিছে গুৱাহাটী মহানগৰীৰ বিৰুবাৰীৰ বাবলু পাল চৌধুৰীয়ে ৷ নিষ্ঠা, সততা আৰু একাগ্ৰতাকে সাৰথি কৰি এখন ভৰি নথকাৰ পাচতো হাৰ মনা নাই জীৱন যুঁজত ৷
বিভিন্ন ঘাত-প্ৰতিঘাতক নেওচি তেওঁ সদায় পুৱাৰে পৰা নিশালৈ কেৱল কর্ম কৰি গৈছে একমাত্ৰ পৰিয়ালটোৰ বাবে ৷ বিৰুৱাৰীৰ এটা ভাৰাঘৰত বাস কৰা বাবলুৱে ফাৰ্ণিচাৰৰ বিপণিত কাম কৰি পত্নী, এজন চাৰিবছৰীয়া পুত্ৰ সন্তানসহ তিনিজনীয়া পৰিয়ালটোৰ ভৰণ-পোষণৰ দায়িত্ব বহন কৰি আহিছিল ৷
লগতে পঢ়ক : দুভৰি হেৰুৱায়ো জীৱন যুঁজত নাভাগৰা এগৰাকী অক্লান্ত সৈনিকৰ এক জীয়া কাহিনী - Success story of Gopal Nag
কিন্তু বিগত বৰ্ষত বাবলুৰ জীৱনলৈ নামি আহিল এক ডাঙৰ বিপর্যয় ৷ মধুমেহ ৰোগত আক্ৰান্ত হোৱাৰ ফলত তেওঁৰ বাঁওভৰিখনত ঘা লাগিবলৈ ধৰে ৷ প্ৰথমে তেওঁ সাধাৰণ বেমাৰ বুলি চলি থাকিল যদিও ক্ৰমান্বয়ে বেছি হ’বলৈ ধৰাত চিকিৎসকৰ কাষ চাপে ৷
চিকিৎসকে তেওঁক শীঘ্ৰেই গুৱাহাটী চিকিৎসা মহাবিদ্যালয় হাস্পতালত ভৰ্তি হোৱাৰ পৰামৰ্শ দিয়ে ৷ সেই মতে তেওঁ হাস্পতালত ভৰ্তি হয় যদিও ঘা হোৱা ভৰিখনত মধুমেহ ৰোগে ভয়ানক ৰূপ ধাৰণ কৰে ৷ ফলত বাঁওভৰিখন সম্পূর্ণৰূপে কাটি পেলাবলগীয়া হয় বাবলুৰ ৷
পৰৱৰ্তী সময়ত চিকিৎসকে সেই ভৰিখনৰ ঠাইত এখন কৃত্ৰিম ভৰি সংৰোপন কৰে ৷ পূৰ্বৰ কাম বাদ দি পৰিয়ালটোৰ স্বার্থতে তেওঁ ঋণত এখন ই-ৰিক্সা লৈ বিভিন্ন অসুবিধাৰ মাজেৰে সেই ৰিক্সাখনেৰে প্ৰায় ৬ মাহ পূৰ্বে নতুনকৈ জীৱন সংগ্ৰাম আৰম্ভ কৰিলে ৷
এনেদৰে বৰ্তমান তেওঁ বহু কষ্ট কৰি পুৱাৰ পৰা সন্ধিয়ালৈ ই-ৰিক্সা চলাই পোৱা ধনেৰে ৰিক্সাৰ ঋণৰ কিস্তি পৰিশোধ কৰাৰ লগতে পৰিয়ালটোৰ ভৰণ-পোষণৰ দায়িত্ব পালন কৰি আহিছে ৷ বাবলুৱে শাৰীৰিক প্ৰতিবন্ধকতা থকা ব্যক্তিসকলক হতাশ নহৈ নিজৰ সামৰ্থ অনুসৰি কাম কৰিবলৈ আহ্বান জনায় ৷
লগতে পঢ়ক : অভাৱৰ জোলোঙাটো পূৰাবলৈ শালিকী পুৱাতে ওলাই যায় এজন যুঁজাৰু - Specially abled rickshaw driver
