গুৱাহাটী,৩০ জুলাই: ৰাজ্যৰ প্ৰশাসন ব্যৱস্থাৰ সংস্কাৰ সাধনৰ উদ্দেশ্যৰে সোমবাৰে পুৱাৰ পৰা নিশা প্ৰায় ১২ বজালৈ ১৪ ঘণ্টাজুৰি চলা সন্মিলনৰ পাচত মঙলবাৰে পুনৰ পুৱাৰ পৰা আৰম্ভ হয় জিলা আয়ুক্তসকলৰ সন্মিলন । মুখ্যমন্ত্রী হিমন্ত বিশ্ব শৰ্মাৰ পৌৰোহিত্যত অনুষ্ঠিত হোৱা জিলা আয়ুক্তৰ সন্মিলনৰ দ্বিতীয় তথা অন্তিম দিনাও নিশা ১২-১ বজালৈ অনুষ্ঠিত হোৱাৰ সম্ভাৱনা আছে ।
প্ৰশাসনক ৰাইজৰ কাষলৈ নিয়াৰ উদ্দেশ্য:
লক্ষণীয় বিষয় যে প্ৰশাসনক ৰাইজৰ কাষলৈ নিয়াৰ লগতে চৰকাৰী আঁচনিসমূহৰ সুবিধা যাতে ৰাইজে নিয়াৰিকৈ লাভ কৰিব পাৰে তাৰ বাবে নিয়মীয়াকৈ এই সন্মিলন অনুষ্ঠিত কৰি অহা হৈছে । সোমবাৰৰ দৰে দ্বিতীয় দিনাও সন্মিলনত জিলা আয়ুক্তসকললৈ বহুকেইটা প্ৰসংগত মুখ্যমন্ত্রীয়ে কেতবোৰ নিৰ্দেশ দিয়ে । অসম চৰকাৰে এক লাখ নিযুক্তিৰ পাচত পুনৰ ৫০ হাজাৰ চাকৰিত নিযুক্তি দিয়াৰ বাবে পদক্ষেপ গ্ৰহণ কৰিছে ।
স্বচ্ছ-নিকা আৰু ত্ৰুটিবিহীনভাৱে নিযুক্তি:
এই ৫০ হাজাৰ নিযুক্তি যাতে স্বচ্ছ-নিকা আৰু ত্ৰুটিবিহীনভাৱে সম্পন্ন কৰিব পাৰে তাৰ বাবে মুখ্যমন্ত্রীয়ে এই সন্মিলনত বিশদভাৱে আলোচনা কৰি জিলা আয়ুক্তসকলক কেতবোৰ নিৰ্দেশনা দিয়ে । একোটা পৰীক্ষাত ১২-১৩ লাখ প্ৰাৰ্থী অৱতীৰ্ণ হ'ব আৰু এই পৰীক্ষাসমূহ সুচাৰুৰূপে অনুষ্ঠিত কৰাৰ ব্যৱস্থা কৰিব লাগিব জিলা আয়ুক্তসকলে । আনহতে চৰকাৰী বিভিন্ন আঁচনি ৰূপায়ণৰ ক্ষেত্রতো মুখ্যমন্ত্রীয়ে জিলা আয়ুক্তসকলক নিৰ্দেশ দিয়ে ।
বসুন্ধৰা আঁচনিৰ তৃতীয় পৰ্যায়:
আনহাতে ২ অক্টোবৰৰ পৰা আৰম্ভ হ'ব বসুন্ধৰা আঁচনিৰ তৃতীয় পৰ্যায়। অৰ্থাৎ বসুন্ধৰা-৩ । এই সন্দৰ্ভত সন্মিলনত মুখ্যমন্ত্রীয়ে আয়ুক্তসকলক কেতবোৰ নীতি-নিৰ্দেশনা প্ৰদান কৰে । বসুন্ধৰা-৩ ৰ যোগেদি সামৰি ল'বলগীয়া বিষয়সমূহৰ ওপৰত সন্মিলনত আলোচনা কৰা হয় । ৰাজ্যত নৱেম্বৰ-ডিচেম্বৰত বাল্যবিবাহৰ বিৰুদ্ধে পুনৰ বিশাল অভিযান আৰম্ভ হ'ব । বাল্য বিবাহৰ বিৰুদ্ধে চলিবলগীয়া এই ডাঙৰ অভিযানৰ বাবে মুখ্যমন্ত্রীয়ে জিলা আয়ুক্তসকলক সাজু হোৱাৰ বাবে দিহা-পৰামৰ্শ দিয়ে ।
নিযুত মইনা আঁচনি ৰূপায়ণ:
আনহাতে চৰকাৰে বাজেটত কৰা ঘোষণা কৰা অনুসৰি শিক্ষাৰ্থীসকলৰ বাবে নিযুত মইনা আঁচনি ৰূপায়ণৰ কাম আৰম্ভ কৰা হ'ব । সেইদৰে মুখ্যমন্ত্রীৰ মহিলা উদ্যমিতা আঁচনিও আৰম্ভ হ'ব । তদুপৰি বহু হিতাধিকাৰী সামৰি অৰুণোদয়-৩.০ আঁচনিখন সম্প্ৰসাৰণ কৰা হ'ব । এই আঁচনিসমূহৰ সফল ৰূপায়ণৰ দিশতো এই সন্মিলনত বিশদ আলোচনা কৰা হয় । যাতে প্ৰকৃত হিতাধিকাৰীয়ে আঁচনিসমূহৰ সুবিধা লাভ কৰিব পাৰে তাৰ বাবে উপযুক্ত ব্যৱস্থা গ্ৰহণৰ বাবে মুখ্যমন্ত্রীয়ে জিলা আয়ুক্তসকলক নিৰ্দেশ দিয়ে ।
উপ-জিলা গঠন:
অসমৰ ১২৬ টা সমষ্টি একোটাকৈ মহকুমা নাইবা উপ-জিলা গঠন কৰা হ'ব । ইয়াৰে প্ৰথম বেটচটো ২ অক্টোবৰৰ পৰা আৰম্ভ কৰা হ'ব । সেই সম্পৰ্কেও জিলা আয়ুক্তৰ সন্মিলনত আলোচনা কৰা হয় । আজিৰ সন্মিলনত বহুকেইটা দিশ সামৰি নিশাপৰ্যন্ত আলোচনা অব্যাহত আছে । সন্মিলনত জিলা আয়ুক্তসকলৰ উপৰি মন্ত্রী আৰু চৰকাৰী শীৰ্ষ বিষয়াসকল উপস্থিত আছে । উল্লেখ্য যে সোমবাৰে প্ৰায় ১৪ ঘণ্টা ধৰি চলা সন্মিলনত মুখ্যমন্ত্রীয়ে জিলা আয়ুক্তসকলক বহু কেইটা দিশত নিৰ্দেশনা প্ৰদান কৰে ।
