গুৱাহাটী, ২৫ আগষ্ট : দেশ জোঁকাৰি যোৱা কলকাতাৰ মহিলা চিকিৎসকৰ ধৰ্ষণ আৰু হত্যাকাণ্ড সমান্তৰালভাৱে ৰাজ্যত শেহতীয়াকৈ সংঘটিত কেবাটাও নাৰীজনিত অপৰাধৰ ঘটনাই ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰিছে । বিভিন্ন দল-সংগঠন, ৰাইজ সৰৱ হৈ থকাৰ সময়তে মুখ্যমন্ত্ৰী ড৹ হিমন্ত বিশ্ব শৰ্মাই যোৱা ২৪ বছৰত ৰাজ্যত ধৰ্ষণৰ বিৰুদ্ধে ৰুজু হোৱা গোচৰৰ তথ্য সামাজিক মাধ্যম এক্সযোগে সদৰী কৰিছে ।
২০০১ চনৰ পৰা চলিত বৰ্ষৰ জুলাইলৈকে ৰাজ্যত ৰুজু হোৱা ধৰ্ষণৰ গোচৰৰ তথ্য প্ৰকাশ কৰিছে । মুখ্যমন্ত্ৰী ড৹ শৰ্মাই প্ৰকাশ কৰা তথ্য অনুসৰি চলিত বৰ্ষৰ জুলাইলৈকে ৰাজ্যত ৫৮০ টা ধৰ্ষণৰ গোচৰ ৰুজু হৈছে । ২০২৩ চনত ৯৮৯ টা গোচৰ ৰুজু হৈছে ৷
| চন | ধৰ্ষণৰ গোচৰ | চন | ধৰ্ষণৰ গোচৰ | চন | ধৰ্ষণৰ গোচৰ |
|---|---|---|---|---|---|
| ২০০১ | ৮১৭ | ২০১০ | ১৭২১ | ২০১৯ | ৩৫৪৬ |
| ২০০২ | ৯৭০ | ২০১১ | ১৭০০ | ২০২০ | ১৬৫৭ |
| ২০০৩ | ১০৯৫ | ২০১২ | ১৭১৬ | ২০২১ | ১৭৩৩ |
| ২০০৪ | ১১৭১ | ২০১৩ | ১৯৩৭ | ২০২২ | ১১১৩ |
| ২০০৫ | ১২৩৮ | ২০১৪ | ১৯৮০ | ২০২৩ | ৯৮৯ |
| ২০০৬ | ১২৪৪ | ২০১৫ | ১৭৩৩ | ২০২৪ (জুলাইলৈকে) | ৫৮০ |
| ২০০৭ | ১৪৩৭ | ২০১৬ | ১৭৭৯ | ||
| ২০০৮ | ১৪৩৮ | ২০১৭ | ৩৫৪৪ | ||
| ২০০৯ | ১৬৩১ | ২০১৮ | ৩২৯৬ |
এই তথ্য প্ৰকাশ কৰি মুখ্যমন্ত্ৰী ড৹ শৰ্মাই উল্লেখ কৰে যে ধৰ্ষণৰ সকলো ঘটনাক সমস্বৰে গৰিহণা দিয়া উচিত ৷ এনে ঘটনাই মানৱীয় প্ৰমূল্যক কুঠাৰাঘাট কৰে আৰু সমাজৰ পৰা এনে জঘন্য অপৰাধ নিৰ্মূল কৰাৰ বাবে একেলগে কাম কৰাটো আমাৰ সকলোৰে দায়িত্ব ৷ আমাৰ সমাজখনত এনে নিৰ্যাতনৰ ঘটনা সংঘটিত নোহোৱাটো নিশ্চিত কৰিবলৈ আমি একত্ৰিত হোৱা উচিত আৰু ইয়াৰ জৰিয়তেহে সুৰক্ষা ন্যায় আৰু সহানুভূতিৰ বাতাবৰণ গঢ়ি উঠিব ৷
তালিকাখন প্ৰকাশ কৰি মুখ্যমন্ত্ৰী ড৹ হিমন্ত বিশ্ব শৰ্মাই লগতে কয়, ‘‘ওপৰৰ তালিকাখনে সকলোৰে বাবে বিশেষকৈ আমাৰ মহিলাসকলৰ বাবে এক নিৰাপদ আৰু অধিক ন্যায়সংগত পৰিৱেশ সৃষ্টিৰ বাবে আমাৰ চলি থকা প্ৰচেষ্টা আৰু দায়বদ্ধতাক প্ৰতিফলিত কৰে । আহক আমি একত্ৰিত হওঁ যাতে পৃথিৱীত এনে অত্যাচাৰে কোনো স্থান নাপায় আৰু যাতে নিৰাপত্তা, ন্যায় আৰু মমতাই প্ৰাধান্য পায় ।’’
লগতে পঢ়ক : ঘৰৰ চোতালতে গচকি গচকি ভায়েকে হত্যা কৰিলে ককায়েকক
