সৰুপথাৰ, 4 আগষ্ট : আজি কোৱাৰ্টাৰ ফাইনেলত অৱতীৰ্ণ হ'ব লাভলীনা বৰগোঁহাই । মহিলাৰ 75 কেজি শাখাৰ কোৱাৰ্টাৰ ফাইনেলৰ খেলখনত বিয়লি 3.02 বজাত অৱতীৰ্ণ হ’ব অসম কন্যাগৰাকী ৷ ইয়াকে লৈ অসমবাসীৰ মনত উছাহ-উৎকণ্ঠাৰ সীমা নাই ৷ যিয়ে যেনেকৈ পাৰে শুভেচ্ছাবাণী প্ৰেৰণ কৰাৰ লগতে নেদেখাজনৰ আগত লাভলীনাৰ বিজয় কামনা কৰা পৰিলক্ষিত হৈছে ৷
কাৰ্বি আংলং জিলাৰ দেওপানীত অৱস্থিত ঐতিহ্যমণ্ডিত দেওপানী দুৰ্গা মন্দিৰত চুতীয়া যুৱ সন্মিলনে লাভলীনা বৰগোঁহাইৰ সাফল্য কামনা কৰি এখনি শৰাই আগবঢ়ায় । সন্মিলনৰ বিষয়ববীয়াই কয়, "এয়া আমাৰ বাবে যথেষ্ট গুৰুত্বপূৰ্ণ কথা যে আমাৰ ছোৱালীয়ে আজি অলিম্পিকত খেলি আছে ৷ আজিৰ খেলখন যথেষ্ট গুৰুত্বপূৰ্ণ খেল ৷ এই গুৰুত্বপূৰ্ণ খেলখনৰ বিষয়ে সৰ্বত্ৰে চৰ্চা চলিছে ৷ দুৰ্গা মাই লাভলীনাক খেলখনত জিকিবৰ বাবে শক্তি প্ৰদান কৰক ৷ সেই আশাৰেই আমি পুৱাই এই স্থানলৈ আহিছো ৷"
উল্লেখ্য যে, কাৰ্বি আংলং জিলাৰ দেওপানীস্থিত এই দুৰ্গা মন্দিৰটোৰ আছে বহু ঐতিহ্য । ৰঙা ফিটা বান্ধিলেই মনোকামনা পূৰণ হয় বুলি ৰাইজৰ মাজত জনশ্ৰুতি প্ৰচলিত ৷
উল্লেখ কৰা প্ৰয়োজন যে, আজি চীনৰ লি কিয়ানৰ সৈতে কোৱাৰ্টাৰ ফাইনেলত অৱতীৰ্ণ হ'ব লাভলীনা । মহিলাৰ 75 কেজি শাখাৰ 16 ৰাউণ্ডৰ মেচত নৰৱেৰ চুনিভা হফষ্টেডক পৰাস্ত কৰি লাভলীনাই কোৱাৰ্টাৰ ফাইনেলত প্ৰৱেশ কৰিছিল ৷ পদক জয়ৰ বাবে দুয়োজনে তীব্ৰ প্ৰতিদ্বন্দ্বিতা চলাব বুলি আশা কৰা হৈছে ৷
ইয়াৰ পূৰ্বে টকিঅ’ অলিম্পিকত 69 কেজি শাখাত ব্ৰঞ্জৰ পদক লাভ কৰিছিল লাভলীনা বৰগোঁহায়ে ৷ লাভলীনাই নিজৰ নতুন ওজন শ্ৰেণীত নিজৰ বহুমুখিতা আৰু দক্ষতা প্ৰদৰ্শন কৰিছে । যি দক্ষতা শেহতীয়া মেচখনত দেখিবলৈ পোৱা গৈছিল ৷
