ৰঙিয়া, ১৪ আগষ্ট: সপ্তদশ বিত্ত আয়োগৰ অধ্যক্ষৰ দায়িত্ব গ্ৰহণ কৰা অৱসৰপ্ৰাপ্ত লেফটেনেণ্ট জেনেৰেল ৰাণা প্ৰতাপ কলিতাই মঙলবাৰে সন্ধিয়া ৰঙিয়া পৌৰসভাৰ বিভিন্ন কাম-কাজৰ বুজ লয় । সপ্তদশ বিত্ত আয়োগৰ নৱনিযুক্ত অধ্যক্ষগৰাকীয়ে ৰঙিয়া পৌৰসভাৰ অধীনত নিৰ্মাণ হৈ থকা ক্লক টাৱাৰ, পদুম পুখুৰী উদ্যানকে ধৰি বিভিন্ন এলেকা পৰিদৰ্শন কৰে ।
বিত্ত আয়োগৰ নৱ নিযুক্ত অধ্যক্ষক সম্বৰ্ধনা:
এই পৰিদৰ্শনৰ সময়চোৱাত বিত্ত আয়োগৰ নৱনিযুক্ত অধ্যক্ষগৰাকীক সংগ দিয়ে ৰঙিয়া সমষ্টিৰ বিধায়ক তথা ৰাজ্যিক বিজেপিৰ সভাপতি ভৱেশ কলিতাই । ৭৮ সংখ্যক স্বাধীনতা দিৱসৰ প্ৰস্তুতি চলি থকাৰ মাজতেই ৰঙিয়া পৌৰসভাই নতুনকৈ দায়িত্ব গ্রহণ কৰা সপ্তদশ বিত্ত আয়োগৰ অধ্যক্ষগৰাকীক পৌৰসভাৰ সভাকক্ষত আয়োজন কৰা এক অনুষ্ঠানত সম্বৰ্ধনা জ্ঞাপন কৰে ।
এই সম্বৰ্ধনা কাৰ্যসূচীত অংশগ্ৰহণ কৰে ৰাজ্যিক বিজেপিৰ সভাপতি তথা স্থানীয় বিধায়ক ভৱেশ কলিতাৰ উপৰিও মহকুমাধিপতি দেৱাশীষ গোস্বামী, পৌৰপতি অমৰেন্দ্ৰ লহকৰ, উপ-পৌৰপতি বিদ্যুৎ ডেকা, আন আন ৱাৰ্ডসমূহৰ পাৰিষদৰ লগতে বহুকেইগৰাকী চৰকাৰী বিষয়া আৰু কৰ্মচাৰীয়ে ।
জাতীয় পতাকা ক্ৰয়:
ইফালে, এই অনুষ্ঠানৰ অন্তত ৰাণা প্ৰতাপ কলিতা আৰু ৰঙিয়া সমষ্টিৰ বিধায়ক তথা ৰাজ্যিক বিজেপিৰ সভাপতি ভৱেশ কলিতাই পৌৰসভাৰ কাৰ্যালয়ৰ চৌহদত অস্থায়ীভাৱে স্থাপন কৰা মহিলা আত্মসহায়ক গোটৰ বিপণীৰ পৰা ক্ৰয় কৰে ৫ খনকৈ জাতীয় পতাকা । উল্লেখ্য় যে, ৰাজ্য়ৰ আন ঠাইৰ লগতে ৰঙিয়াতো মহিলা আত্মসহায়ক গোটসমূহে জাতীয় পতাকা প্ৰস্তুত কৰি কম মূল্য়তেই বিক্ৰী কৰি আছে । বৃহস্পতিবাৰে দেশে পালন কৰিব ৭৮ সংখ্যক স্বাধীনতা দিৱস ৷ যাৰ বাবে ব্যাপত প্ৰস্তুতি চলা দেখিবলৈ পোৱা গৈছে সৰ্বত্ৰে ৷
