গুৱাহাটী, ১৭ অক্টোবৰ : বলিউডৰ অভিনেত্ৰী তামান্না ভাটিয়াক ই ডিৰ জেৰা ৷ অসমৰ গুৱাহাটীত ই ডিৰ কাৰ্যালয়ত হাজিৰ হৈছে অভিনেত্ৰীগৰাকী ৷ প্ৰায় ৫ ঘণ্টা ধৰি গুৱাহাটীৰ খ্ৰীষ্টানবস্তিস্থিত ই ডিৰ কাৰ্যালয়ত আছে তামান্না । বৃহস্পতিবাৰে দিনৰ প্ৰায় ১:২৫বজাত গুৱাহাটীৰ ই ডিৰ কাৰ্যালয়ত আহি উপস্থিত হয় অভিনেত্ৰীগৰাকী । তেতিয়াৰে পৰা নিশা 9 বজালৈকে ই ডিয়ে তেওঁক ধাৰাবাহিক জেৰা চলায় ৷ ই ডিৰ কাৰ্যালয়ৰ পৰা ওলোৱাৰ পিছত পিতৃ-মাতৃসহ অভিনেত্ৰীগৰাকী ৰাওনা হয় হোটেল ৰেডিছন ব্লুলৈ ৷
অভিনেত্ৰীগৰাকীৰ লগত আহিছে তেওঁৰ পিতৃ-মাতৃ ৷ তামান্না ভাটিয়াৰ মাতৃক গুৱাহাটীৰ ই ডিৰ কাৰ্যালয়ৰ চৌহদত এখন বাহনত বহি থকা দেখা যায় দীৰ্ঘসময় ধৰি ৷ তামান্নাৰ সৈতে তেওঁৰ পিতৃও ই ডিৰ কাৰ্যালয়ৰ ভিতৰলৈ যায় ।
গুৱাহাটী বিমান বন্দৰৰ পৰা AS12 BC6327 নম্বৰৰ এখন বাণিজ্যিক বাহনত ই ডিৰ কাৰ্যালয়লৈ আহে পিতৃ-মাতৃসহ অভিনেত্ৰীগৰাকী ৷ কন্যাৰ জেৰা চলি থকা সমস্ত সময়ছোৱা এইখন বাহনতেই বহি থকা দেখা যায় তামান্নাৰ মাতৃক ।
উল্লেখ্য যে এটা অবৈধ ক্ৰিকেটৰ অনলাইন বিজ্ঞাপনৰ হৈ প্ৰচাৰ চলোৱাৰ অভিযোগত অভিযুক্ত অভিনেত্ৰীগৰাকী ৷ পূৰ্বেও কেইবাবাৰো মহাৰাষ্ট্ৰ ই ডিয়ে চমন দিছিল তামান্নাক । কিন্তু ই ডিয়ে গুৱাহাটীলে তেওঁক কিয় মাতিলে সেয়া ই ডিৰ তৰফৰ পৰা স্পষ্ট নকৰিলেও সন্দেহ কৰা হৈছে যে মহাৰাষ্ট্ৰৰ গোচৰৰ সংক্ৰান্ততে তেওঁক গুৱাহাটীত সোধা-পোছা কৰিছে ই ডিয়ে ৷
ই ডিৰ গুৱাহাটীৰ কাৰ্যালয়লৈ অনলাইন গেমিং সন্দৰ্ভতে চমন লাভ কৰি তামান্না আহি উপস্থিত হৈছে ৷ মহাদেৱ বেটিং এপৰ প্ৰমোচন সন্দৰ্ভত তামান্নাক গুৱাহাটীৰ কাৰ্যালয়লৈ চমন দিয়া হৈছে বুলি সন্দেহ কৰা হৈছে যদিও ই ডিয়ে এই পৰ্যন্ত একো কথাই সদৰী কৰা নাই ৷
উল্লেখ্য যে নিষিদ্ধ বেটিং এপটোৰ প্ৰমোচনৰ নামত তামান্নাই বৃহৎ পৰিমানৰ ধন লৈছিল বুলি অভিযোগ উঠিছিল ৷ ইতিমধ্যে মহাদেৱ বেটিং এপ গোচৰত মহাৰাষ্ট্ৰ আৰক্ষীৰ চমন লাভ কৰা তামান্নাৰ গুৱাহাটী লিংক কি সেয়া ৰহস্যৰ আৱৰ্ত ।
