ধেমাজি: স্বাস্থ্যই পৰম ধন বুলি লিখা চৰকাৰী আয়ুষ্মান আৰোগ্য কেন্দ্ৰ অৰ্থাৎ চৰকাৰী চিকিৎসাৰ নামত স্বাস্থ্যকেন্দ্ৰত ব্যাপক অৰাজকতা । গ্ৰামাঞ্চলৰ জনসাধাৰণৰ স্বাস্থ্যক ধেমাজি স্বাস্থ্য বিভাগে তিলমানো গুৰুত্ব নিদিয়াৰ অভিযোগ উঠিছে । কেবল ফাঁকিৰেই যেন চলি আছে চৰকাৰী কৰ্মসংস্কৃতি !
স্থানীয় ভুক্তভোগী ৰাইজে অভিযোগ কৰা মতে ধেমাজি জিলা যুটীয়া স্বাস্থ্য সেৱা সঞ্চালকৰ অধীনৰ বৃহত্তৰ লক্ষীপথাৰৰ স্বাস্থ্য খণ্ডত আয়ুষ্মান আৰোগ্য মন্দিৰ স্বাস্থ্য কেন্দ্ৰটোত নাথাকে স্বাস্থ্য কৰ্মী । ধেমাজি জিলাৰ প্ৰায় ৪৫ খন গাঁৱৰ জনসাধাৰণৰ বাবে এই লক্ষীপথাৰ আয়ুষ্মান আৰোগ্য মন্দিৰ চিকিৎসালয় স্থাপন কৰা হৈছিল ৷
জৰুৰীকালীন সেৱাৰ বাবে চিকিৎসক, নাৰ্চ, স্বাস্থ্যকৰ্মীৰ বাবে চৰকাৰী আৱাসগৃহৰ ব্যৱস্থা আছে যদিও কৰ্মচাৰীয়ে সেই সুবিধা গ্ৰহণ নকৰি নিজৰ কৰ্মক্ষেত্ৰত বিভিন্ন অজুহাত দেখুৱাই অনুপস্থিত থাকে । জানিব পৰা মতে স্বাস্থ্যকেন্দ্ৰটোত চিকিৎসক-নাৰ্চকে ধৰি ১৫জন কৰ্মচাৰী থাকিব লাগে যদিও ৫/৬জনহে উপস্থিত থাকে । যাৰ ফলত চিকিৎসাৰ অভাৱত সামান্য অসুখ হ’লেই সুদুৰ ১০/১২ কিঃমিঃ অতিক্ৰম কৰি ৰোগীয়ে ধেমাজি সদৰলৈ আহিবলগীয়া হয় ।
এইক্ষেত্ৰত গুৰুত্ব নাই জিলাখনৰ সংশ্লিষ্ট স্বাস্থ্য বিভাগৰ । খোদ স্বাস্থ্যকৰ্মীয়ে কয়,“চাৰিখন বিচনাযুক্ত স্বাস্থ্য কেন্দ্ৰটোত আছে ১৫জন কৰ্মচাৰী । এতিয়া পাঁচজনহে আছে । তেওঁলোক কোনো কোনো ছুটীত আছে । কোনোৱে ট্ৰেইনিঙত আছে ৷" ইফালে স্থানীয় ৰাইজে অভিযোগ উত্থাপন কৰি কয়,"ডাক্তৰজন প্ৰায়ে উপস্থিত নাথাকে । আমাক স্থায়ী ডাক্তৰ এজন লাগে ৷ ৰোগী আহি বিমুখ হ’বলগীয়া হয় । জিলাখনৰ ভিতৰুৱা পিছপৰা অঞ্চলটোৰ একমাত্ৰ এইখন চিকিৎসা কেন্দ্ৰত স্থায়ী চিকিৎসক এজন লাগে ।"
প্ৰশ্ন হয় এয়া ৰোগমুক্তিৰ মন্দিৰ নে ৰোগ ব্যাধি বাহ লোৱা জনসাধাৰণক উপহাস কৰা এটা চৰকাৰী জিৰণি ঘৰ ?
