নলবাৰী, 17 আগষ্ট : 'ৰাইজক সুৰক্ষা দিয়াই আৰক্ষীৰ কাম ৷ ৰাইজক সুৰক্ষা দিয়াৰ বাবেইতো আমাক দৰমহা দি আছে ৷' নলবাৰীত এই মন্তব্য অসম আৰক্ষীৰ উপ-মহা পৰিদৰ্শক ইন্দ্ৰাণী বৰুৱাৰ ৷ বোমাসদৃশ সামগ্ৰী উদ্ধাৰৰ পিছতেই আজি নলবাৰীত উপস্থিত হৈ এই মন্তব্য কৰে অসম আৰক্ষীৰ শীৰ্ষ বিষয়াগৰাকীয়ে ৷
উল্লেখ্য যে, 15 আগষ্টত নিষিদ্ধ ঘোষিত সংগঠন আলফা (স্বা)ই ৰাজ্যৰ 25 টা স্থানত বোমা সংস্থাপন কৰা আছে বুলি কোৱাৰ পিছতে মহানগৰীকে ধৰি নলবাৰীতো উদ্ধাৰ হৈছিল বোমাসদৃশ এটি টোপোলা ৷ আলফা (স্বা)ই কোৱাৰ দৰে নলবাৰীৰ শ্বহীদ মুকুন্দ কাকতি হাস্পতাললৈ যোৱা পুৰণি পথটোৰে সোমাই এখন পৰিত্যক্ত 108 এম্বুলেঞ্চৰ ভিতৰত উদ্ধাৰ হৈছিল বোমাসদৃশ টোপোলাটো ৷ তাৰ পিছতে সন্দেহজনক এই টোপোলাটো পাগলাদিয়া নদীৰ পাৰলৈ নিস্ক্ৰিয় কৰিবলৈ নিয়া হৈছিল ৷ কিন্তু ঘটনাৰ দুটা দিন অতিক্ৰম কৰি যোৱাৰ পিছতো এতিয়ালৈকে আৰক্ষীয়ে নিশ্চিত কৰিব পৰা নাই সেয়া আচলতে কি ৷ যাৰ বাবে এই সামগ্ৰীখিনি গুৱাহাটীলৈ প্ৰেৰণ কৰা বুলি মন্তব্য কৰে আৰক্ষীৰ উপ-মহা পৰিদৰ্শক ইন্দ্ৰাণী বৰুৱাই ৷
নলবাৰীৰ বোমাৰ আতংকৰ ঘটনাৰ বুজ লবলৈ তথা তদন্ত প্ৰক্ৰিয়া কিদৰে চলি আছে তাক চাবলৈ আজি নলবাৰীত উপস্থিত হয় বুলি মন্তব্য কৰে ইন্দ্ৰাণী বৰুৱাই ৷ আনহাতে এই ঘটনাৰ লগত জড়িতসকল অতি সোনকালে ধৰা পৰিব বুলিও সদৰী কৰে শীৰ্ষ আৰক্ষী বিষয়াগৰাকীয়ে ৷ ইতিমধ্যে এখন চাৰিজনীয়া তদন্ত সমিতিও গঠন কৰি জিলা অতিৰিক্ত আৰক্ষী অধীক্ষকগৰাকীক মূল দায়িত্ব দিয়াৰ লগতে আৰক্ষী অধীক্ষকগৰাকীয়ে সকলো দিশ নিৰীক্ষণ কৰিব বুলি জনায় তেওঁ ৷
লগতে পঢ়ক : চৰকাৰক শক্তিৰ উমান দিবলৈহে একেলগে ২৫ টা বোমা : আৰু কি কি ক’লে পৰেশ বৰুৱাই ? - ULFA I Bomb Plant
