গুৱাহাটী, ১৫ আগষ্ট : ‘‘অসম আৰক্ষীয়ে আজি সমগ্ৰ ৰাজ্যতে বিস্ফোৰক সামগ্ৰীৰ সন্ধানত ব্যাপক অনুসন্ধান চলাইছে । গুৱাহাটীৰ দুটা ঠাইত সন্দেহজনক সামগ্ৰী উদ্ধাৰ কৰা হয়, যিবোৰ আৰক্ষীৰ বোমা নিষ্কাশন স্কোৱাডে খুলি পেলায় । এই সামগ্ৰীবোৰৰ ভিতৰত কিছুমান চাৰ্কিট আৰু বেটাৰী দেখা যায় যদিও ইগনিচন ডিভাইছ পোৱা নাই । ভিতৰৰ পদাৰ্থখিনি ফৰেনছিক/কেমিকেল পৰীক্ষাৰ বাবে প্ৰেৰণ কৰা হৈছে । লখিমপুৰ, শিৱসাগৰ, নলবাৰী আৰু নগাঁৱত একেধৰণৰ সামগ্ৰী দেখা গৈছে, যিবোৰ নিৰাপদে নিষ্ক্ৰিয় কৰা হৈছে । এই সন্দৰ্ভত উপযুক্ত বৈধ তদন্ত আৰম্ভ কৰা হৈছে ।’’ ৰাজ্যৰ ২৫ টা স্থানত আলফা(স্বা)ই বোমা সংস্থাপন কৰা সন্দৰ্ভত সামাজিক মাধ্যমযোগে এই মন্তব্য আগবঢ়াইছে আৰক্ষী সঞ্চালক প্ৰধান জিপি সিঙে ৷
Assam Police has carried out extensive searches throughout the State today for Explosive devices. At two places in Guwahati suspicious articles were found which were opened by Bomb Disposal Squad of Police. These articles do not have ignition device inside through some circuits…
— GP Singh (@gpsinghips) August 15, 2024
‘‘গুৱাহাটী মহানগৰীৰ আঠটা স্থানৰ ভিতৰত দুটা স্থানত বোমা সদৃশ বস্তু পোৱা গৈছে । কিন্তু এতিয়াও বোমা হয় নে নহয় সেয়া নিশ্চিত হোৱা নাই ।’’ এই মন্তব্য গুৱাহাটী আৰক্ষী আয়ুক্ত দিগন্ত বৰাৰ । বৃহস্পতিবাৰে স্বাধীনতা দিৱসৰ দিনা ৰাজ্যৰ বিভিন্ন স্থানত ২৫ টা বোমা সংস্থাপন কৰাৰ কথা সংবাদ মাধ্যমত বিবৃতি যোগে সদৰী কৰিছিল আলফা স্বাধীনে । কাৰিকৰী কাৰণত বোমাকেইটা বিস্ফোৰিত নোহোৱাৰ কথা উল্লেখ কৰি আলফা স্বাধীনে বোমা সংস্থাপনৰ স্থানসমূহ নিৰ্দিষ্ট কৰি দিছিল ।
আলফা স্বাধীনে বোমা সংস্থাপনৰ কথা ৰাজহুৱা কৰাৰ লগে লগে অসম আৰক্ষীয়ে যেন থৰকাচুতি হেৰুৱায় । লগে লগে সংশ্লিষ্ট স্থানসমূহত অভিযান চলাই আৰক্ষীয়ে । আলফা স্বাধীনে গুৱাহাটী মহানগৰীৰ আঠটা স্থানত বোমা সংস্থাপনৰ কথা সদৰী কৰিছিল । সেই অনুসৰি আঠটা স্থানত আৰক্ষীয়ে অভিযান চলায় । এই অভিযান সন্দৰ্ভত গুৱাহাটীৰ আৰক্ষী আয়ুক্ত দিগন্ত বৰাই সংবাদ মাধ্যমৰ আগত কয়, ‘‘দুটা স্থানত বোমাসদৃশ যি বস্তু পোৱা গৈছে, সেইটো সাৱধানতা অৱলম্বন কৰি খোলা হৈছে । খোলাৰ পিছত তাত দেখা গ'ল যে চাৰ্কিট আছে আৰু বোমাসদৃশ যিটো চাৰ্কিট থাকিব লাগে সেইটো চাৰ্কিট আছে । কিন্তু তাত যিটো ফিগাৰিং মেকানিজিম তথা ডিটনেটিং মেকানিজিম থাকিব লাগে সেইটো নাই । বিস্ফোৰকৰ দৰে কিছুমান সামগ্ৰী তাত টেমাৰ ভিতৰত সংস্থাপিত কৰা পোৱা গৈছে । গতিকে আমি সাধাৰণভাৱে সেইটো বিস্ফোৰক হয় নে নহয় আমি ক'ব নোৱাৰো । সেইটো বিশেষজ্ঞই ক'ব পাৰিব কেমিকেল পৰীক্ষাৰ পাছত ।’’
‘‘গুৱাহাটীত যি আঠটা স্থানৰ কথা কোৱা হৈছিল তাৰ ভিতৰত ছটা স্থানত কোনো ধৰণৰ সন্দেহজনক বস্তু পোৱা নগ'ল । দুটা স্থান পানবজাৰ আৰু গান্ধীবস্তিত আমি বোমাসদৃশ বস্তু পাইছো । তাত চাৰ্কিট আছে আৰু ডিটনেটৰ আছে যদিও ফিগাৰিং মেকানিজম নাই । গতিকে কেমিকেল পৰীক্ষাৰ পাছতহে বোমা হয় নে নহয় বিতং ভাৱে ক'ব পৰা যাব ।’’ বৰাই লগতে কয় ৷
উল্লেখ্য যে আলফা স্বাধীনে গুৱাহাটীৰ দিছপুৰ লাষ্টগেট, গান্ধী মণ্ডপৰ সমীপত, নাৰেংগী, পানবজাৰ, যোৰাবাট, ভেটাপাৰা, মালিগাঁও আৰু ৰাজগড়ত বোমা সংস্থাপন কৰা বুলি দাবী কৰিছিল ।
লখিমপুৰৰ দুটা স্থানত উদ্ধাৰ সন্দেহজনক বোমা - ULFA I bomb plans
