তেজপুৰ, ১৮ অক্টোবৰ: ৰাজ্যৰ ৫ টা বিধানসভা সমষ্টিৰ উপ-নিৰ্বাচনৰ দিন ঘোষণা হোৱাৰ পাচতে তৎপৰ হৈ পৰিছে শাসকীয় বিজেপি আৰু বিৰোধী কংগ্ৰেছ দল ৷ বিশেষকৈ উপ-নিৰ্বাচন অনুষ্ঠিত হ’বলগীয়া বিহালী বিধানসভা সমষ্টিত বৃহস্পতিবাৰৰ পৰা মন্ত্ৰী পীযুষ হাজৰীকাই নিৰ্বাচনী প্ৰচাৰ আৰম্ভ কৰিছে ৷
কাতি বিহুৰ দিনটোতে বিহালীৰ ৰাংচালি, তিনিসুঁতি আৰু হাতীবন্ধাত মন্ত্ৰী পীযুষ হাজৰীকাই নিৰ্বাচনী প্ৰচাৰ চলায় ৷ বিৰোধী দল কংগ্ৰেছে সাংসদ গৌৰৱ গগৈক বিহালীৰ দায়িত্ব দিয়াৰ সমান্তৰালকৈ বিহালীত বিজেপিয়ে সেনাপতি হিচাবে দায়িত্ব অৰ্পন কৰিছে মন্ত্ৰী পীযুষ হাজৰীকাক । লোকসভা নিৰ্বাচনৰ সময়তো যোৰহাটত প্ৰচাৰৰ ক্ষেত্ৰত সমুখ সমৰত আছিল পীযুষ হাজৰীকা আৰু গৌৰৱ গগৈ ৷ এইবাৰ বিহালীতো সমুখ সমৰত অৱতীৰ্ণ হৈছে পীযুষ-গৌৰৱ ৷
বিৰোধীয়ে বিহালীত বিজেপিৰ অৱস্থা যোৰহাটৰ দৰেই হ’ব বুলি গৌৰৱে কৰা মন্তব্যৰ প্ৰতিক্ৰিয়া প্ৰকাশ কৰি মন্ত্ৰীiৰাকীয়ে কয় যে, ‘‘বিৰোধীয়ে সমগ্ৰ অসমত ১৪ টা সমষ্টিৰ ৩ টাতহে জিকিছিল আৰু আমি ১১ টাত জিকিছিলোঁ ৷ কেইদিনমান আগত হাৰিয়ানাত জিকিম বুলি খানা ৰেডী কৰিছিল যদিও অৱশেষত মুখত চেঁচা পানী পৰিল ৷ ক’ৰবাত নিৰ্বাচনত হৰা-জিকা থাকেই ৷’’
তেওঁ পুনৰ কয়, "যোৰহাটত ব্যস্ত থকাৰ বাবে মোৰ সমষ্টিত মই এদিন প্ৰচাৰ চলাইছিলো ৷ কিন্তু মোৰ সমষ্টিত বিজেপিয়ে ৭৭ হাজাৰ ভোটৰ ব্যৱধানত আগুৱাইছিল ৷ ক’ৰবাত ভাল হ’লে ক’ৰবাত বেয়া হয় ৷ সেয়া থাকিবই, কিন্তু এইবাৰ বিহালীত আমাৰ ভাল হ’ব ৷ আমাৰ নতুন ৰণ কৌশল একো নাই ৷ মানুহৰ লগত থকাটোৱেই আমাৰ ৰণ কৌশল ৷ ৰাইজৰ পৰা আশীৰ্বাদ লোৱাটোৱেই আমাৰ ৰণ কৌশল ৷"
প্ৰাক নিৰ্বাচনী হিংসা:
আনহাতে, চামগুৰিৰ ঘটনা সন্দৰ্ভত প্ৰতিক্ৰিয়া প্ৰকাশ কৰি মন্ত্ৰীগৰাকীয়ে কয়, "চামগুৰিত এনেকুৱা পৰিস্থিতি কংগ্ৰেছ দলেই কৰে ৷ চামগুৰিত প্ৰতিটো নিৰ্বাচনতে কংগ্ৰেছে বেয়া পৰিবেশৰ সৃষ্টি কৰে ৷ চামগুৰিৰ দৰে পৰিবেশ বেলেগ সমষ্টিত হ’ব নালগে, তাৰ বাবে মই অসমৰ ৰাইজক অনুৰোধ জনাম ৷ নিৰ্বাচন আহিলে মাৰ-পিট হয়েই ৰকিবুল হুছেইনৰ সমষ্টিত ৷ হিমন্ত বিশ্ব শৰ্মাৰ গাড়ীত ২০১৬ চনত আক্ৰমণ কৰিছিল ৷ আক্ৰমণ তেওঁলোকেই কৰে, এইবাৰ কেৱল বিজেপিৰ মানুহ অলপ তাত বৃদ্ধি পোৱাৰ বাবে প্ৰতিৰোধ কৰিবলৈ চেষ্টা কৰিছিল ৷"
দিগন্ত ঘাটোৱাৰৰ প্ৰাৰ্থিত্বৰ সম্ভাৱনা:
যুৱ নেতা দিগন্ত ঘাটোৱাৰ বিজেপিৰ বিশ্বনাথ জিলাৰ সভাপতি তথা এগৰাকী সক্ৰিয় সদস্য হোৱাৰ লগতে প্ৰাৰ্থিত্বৰ দাবীদাৰ । তেওঁ প্ৰথমবাৰৰ বাবে বিহালী সমষ্টিৰ পৰা প্ৰাৰ্থিত্ব প্ৰত্যাশী । আনহাতে জয়ন্ত বৰাই এইবাৰ লোকসভা নিৰ্বাচনৰ সময়ত বিজেপি দলত আনুষ্ঠানিকভাৱে যোগদান কৰে ।
দিগন্ত ঘাটোৱাৰৰ বিশ্বনাথ জিলাৰ লগতে স্থানীয় লোকৰ মাজত যথেষ্ট পৰিমাণে জনপ্ৰিয়তা আছে, সেই অনুসৰি পাৰ্টীৰ পৰা দিগন্ত ঘাটোৱাৰে প্ৰাৰ্থিত্ব পোৱাৰ সম্ভাৱনীয়তা আছে ।
কংগ্ৰেছ নে চিপিআই এম এল :
আনহাতে বিৰোধী কংগ্ৰেছৰ তৰফৰ পৰা এই মুহূৰ্তত প্ৰাৰ্থিত্বৰ বাবে কাৰো নাম প্ৰচাৰ হোৱা নাই । কংগ্ৰেছ দলে বিজেপিৰ প্ৰাৰ্থিত্ব ঘোষণাৰ ওপৰত ভিত্তি কৰি তেওঁলোকে প্ৰাৰ্থিত্ব প্ৰদান কৰে যদিও প্ৰদেশ কংগ্ৰেছৰ সভাপতিয়ে এই আসনখন ভাষাৰ দিশৰ পৰা বেছি গুৰুত্ব প্ৰদান কৰাৰ সম্ভাৱনীয়তা আছে । এইবাৰ আম আদমী পাৰ্টিয়ে সমষ্টিটোৰ পৰা প্ৰাৰ্থিত্ব প্ৰদান কৰাৰ সম্ভাৱনীয়তা আছে ।
কংগ্ৰেছে মিত্ৰদলসমূহৰ লগত নাথাকি অকলশৰীয়া হৈ যদি প্ৰাৰ্থিত্ব প্ৰদান কৰে তেনেহ’লে সহযোগী দলসমূহেও প্ৰাৰ্থিত্ব প্ৰদান কৰাৰ সম্ভাৱনা নুই কৰিব নোৱাৰি । কাৰণ কংগ্ৰেছ দলটোৱে মিত্ৰদল তথা বিহালীত যথেষ্ট শক্তিশালী ভেটি থকা সত্বেও চিপিআই এম এল দলৰে কোনোধৰণৰ সম্পৰ্ক ৰক্ষা নকৰাকৈয়ে নিৰ্বাচনী তৎপৰতা অব্যাহত ৰাখিছে ৷ শেহতীয়াকৈ চিপিআই এম এল দলেও একাধিক ৰাজহুৱা সভা অনুষ্ঠিত কৰাৰ লগতে গণসংযোগ কাৰ্যসূচী ৰূপায়ণ কৰিছে আৰু বিবেক দাসে চিপিআই এম এলৰ তৰফৰ পৰা প্ৰাৰ্থিত্ব লাভ কৰাৰ সম্ভাৱনীয়তা প্ৰকট হৈ পৰিছে ।
সমষ্টিৰ ভোটাৰ প্ৰণালী :
আনহাতে, বিহালী সমষ্টিৰ যোৱা ২০২১ চনৰ বিধানসভা নিৰ্বাচনৰ তথ্য অনুসৰি ভাষিক জনগোষ্ঠীৰ ভোটাৰ তালিকা মতে মুঠ ১,২৫,৪৬ ভোটাৰ আছে । ইয়াৰ ভিতৰত অসমীয়া ভোটাৰ ১,৯১,১৬৫; চাহ বাগিচা আৰু আদিবাসী জনগোষ্ঠীৰ ভোটাৰ ৫৬,৩৯২; গোর্খা ভোটাৰ ২৪০৮৭; বঙালী ভোটাৰ ৯৫৭৩; বড়ো ভোটাৰ ৪৯২৬; কাৰ্বি ভোটাৰ ৫৬৫৪; হিন্দী ভাষী ভোটাৰ ৫৩৩১ গৰাকী সমষ্টিটোত আছে ।
লগতে পঢ়ক: চামগুৰিত ৰকিবুলৰ পুত্ৰৰ জয় বিচৰা নাই খোদ ভূপেন বৰাই: কোনে ঘটালে এই বিস্ফোৰণ ?
