গুৱাহাটী: পোহৰৰ উৎসৱ দীপাৱলীৰ উছাহ-উদ্দীপনা দ্বিতীয় দিনাও ৰাজ্যজুৰি অব্যাহত থাকে । চাকি-বন্তি জ্বলাই, ফটকা আতচবাজীৰে দীপাৱলী উদ্যাপন কৰা হয় । লক্ষণীয়ভাৱে গুৱাহাটীৰ কোনো কোনো অঞ্চলত পোহৰৰ উৎসৱক প্ৰদূষণ আৰু শব্দৰ উৎসৱলৈ ৰূপান্তৰিত কৰি ওৰেনিশা ফটকা-আতচবাজী জ্বলোৱা পৰিলক্ষিত হয় ।
উল্লেখ্য যে বায়ু আৰু শব্দ প্ৰদূষণ ৰোধ কৰাৰ বাবে উচ্চতম ন্যায়ালয়ৰ নিৰ্দেশনাৰ ভিত্তিত নিশা ১০ বজাৰ পাছত ফটকা-আতচবাজী ফুটোৱাত মহানগৰ আৰক্ষীয়ে নিষেধাজ্ঞা আৰোপ কৰিছিল যদিও বৃহস্পতিবাৰে সন্ধিয়াৰে পৰা আজি পুৱতি নিশালৈকে ফাঁচী বজাৰ, গণেশগুৰি আদি অঞ্চলত ফটকা-আতচবাজীৰ শব্দ শুনা পোৱা যায় । এইক্ষেত্ৰত মহানগৰ আৰক্ষীয়ে কোনো কঠোৰ পদক্ষেপ গ্ৰহণ কৰা পৰিলক্ষিত নহ'ল ।
ইপিনে অসম প্ৰদূষণ নিয়ন্ত্ৰণ পৰিষদৰ কাৰ্যালয়ৰ তথ্য মতে, দীপাৱলীৰ পিছত গুৱাহাটীত বায়ুৰ গুণমান সূচকাংক (এ কিউ আৰ) বৃদ্ধি হৈছে । অৱশ্যে বায়ুৰ গুণমান সূচকাংক দীপাৱলীৰ পিছত গুৱাহাটীত শনিবাৰে মধ্যম (moderate) অৱস্থাত থকা ৰেকৰ্ড কৰা হৈছে । অসম প্ৰদূষণ নিয়ন্ত্ৰণ পৰিষদৰ কাৰ্যালয়ৰ তথ্য মতে, যোৱা দুবছৰৰ পিছত গুৱাহাটীত দীপাৱলীৰ পিছদিনাখন বায়ুৰ গুণমান সূচকাংক সামান্য বৃদ্ধি হৈছে ।
দীপাৱলীৰ পিছত গুৱাহাটীত বায়ুৰ গুণমান সূচকাংক বৃদ্ধি:
পৰিষদৰ কাৰ্যালয়ৰ তথ্য মতে ২০২০ চনত দীপাৱলীৰ আগদিনা গুৱাহাটীত বায়ুৰ গুণমান সূচকাংক আছিল ১১৭ ,দীপাৱলীৰ দিনা বায়ুৰ গুণমান সূচকাংক আছিল ১২০, দীপাৱলীৰ পিছৰ দিনা বায়ুৰ গুণমান সূচকাংক আছিল ১৭৩ ।
ঠিক সেইদৰে ২০২১ চনত দীপাৱলীৰ আগদিনা গুৱাহাটীত বায়ুৰ গুণমান সূচকাংক আছিল ১০৬ ,দীপাৱলীৰ দিনা বায়ুৰ গুণমান সূচকাংক আছিল ১১০, দীপাৱলীৰ পিছৰ দিনা বায়ুৰ গুণমান সূচকাংক আছিল ২৩০ । ২০২২ চনত দীপাৱলীৰ আগদিনা গুৱাহাটীত বায়ুৰ গুণমান সূচকাংক আছিল ৮১ ,দীপাৱলীৰ দিনা বায়ুৰ গুণমান সূচকাংক আছিল ৪৭ , দীপাৱলীৰ পিছৰ দিনা বায়ুৰ গুণমান সূচকাংক আছিল ১৩৯ ।
২০২৩ চনত দীপাৱলীৰ আগদিনা গুৱাহাটীত বায়ুৰ গুণমান সূচকাংক আছিল ৬৫ ,দীপাৱলীৰ দিনা বায়ুৰ গুণমান সূচকাংক আছিল ৭১ , দীপাৱলীৰ পিছৰ দিনা বায়ুৰ গুণমান সূচকাংক আছিল ১৪৩ । এইবাৰ অৰ্থাৎ ২০২৪ চনত দীপাৱলীৰ আগদিনা গুৱাহাটীত বায়ুৰ গুণমান সূচকাংক আছিল ৭৩ ,দীপাৱলীৰ দিনা বায়ুৰ গুণমান সূচকাংক আছিল ৮৫ , দীপাৱলীৰ পিছৰ দিনা বায়ুৰ গুণমান সূচকাংক আছিল ১৫৫ ।
নিয়ম অনুসৰি বায়ুৰ গুণমান সূচকাংক ০ ৰ পৰা ৫০ ভিতৰত থাকিলে ভাল (good) বুলি ধৰা হয় । বায়ুৰ গুণমান সূচকাংক ৫১ ৰ পৰা ১০০ ভিতৰত থাকিলে সন্তোষজনক (Satisfactory) বুলি ধৰা হয় । বায়ুৰ গুণমান সূচকাংক ১০১ ৰ পৰা ২০০ ভিতৰত থাকিলে মধ্যম (Moderate) বুলি ধৰা হয় ।
বায়ুৰ গুণমান সূচকাংক ২০১ ৰ পৰা ৩০০ ভিতৰত থাকিলে বেয়া (poor) বুলি ধৰা হয় । সেই অনুসৰি যোৱা পাঁচবছৰত (২০২১ চনক বাদ দি) গুৱাহাটীত দীপাৱলীৰ পিছদিনা বায়ুৰ গুণমান সূচকাংক ১০১ ৰ পৰা ২০০ ভিতৰত অৰ্থাৎ মধ্যম( Moderate) অৱস্থাত আছে ।
লগতে পঢ়ক: পোহৰৰ উৎসৱত জলমল সত্ৰপীঠ মাজুলী
