বোকাখাত, 5 জুলাই: বৃহস্পতিবাৰে বংকোৱালত উপস্থিত হয় অসম প্ৰদেশ কংগ্ৰেছৰ সভাপতি ভূপেন বৰা ৷ বংকোৱালত মথাউৰি চিগা পৰিদৰ্শন কৰি ভূপেন বৰাই অসম চৰকাৰক তীব্ৰ সমালোচনা কৰি মহুৰামুখৰ 1 নং গৰৈমাৰীৰ মাজ চাপৰিত দুজন কিশোৰৰ সলিল সমাধি ঘটা ঘটনাত দুখ প্ৰকাশ কৰে ৷
বৰাই কয় যে, "দুৰ্যোগ ব্যৱস্থাপনা বিভাগ সম্পূৰ্ণ বিফল হৈছে ৷ বানে কালৰূপ ধৰাৰ পাচতো এই পৰ্যন্ত কৃষি বিভাগ আৰু জলসম্পদ বিভাগে কোনো পৰিকল্পনা যুগুত নকৰা কাৰ্য গৰিহণাযোগ্য ৷ বংকোৱালৰ এক লাখ কৃষক পৰিয়ালক কিদৰে চৰকাৰে পুনৰ কৃষি কৰ্মৰ প্ৰতি উৎসাহিত কৰিব তাৰ কোনো পৰিকল্পনা নাই চৰকাৰৰ হাতত ৷"
সমান্তৰালভাবে, বৰাই কয়, "কোন দলৰ চৰকাৰ থাকিব সেয়া ৰাইজে নিৰ্ণয় কৰিব । ৰাইজে সমস্যাসমূহৰ কথা কওঁতে মন্ত্ৰীয়ে ধমক দিব সেয়া ৰাইজে মানি নলয় ৷ ডাবল ইঞ্জিনৰ চৰকাৰে ডাবল সাহায্য দিব লাগিছিল ৷ কিন্তু সেয়া হোৱা নাই ৷ বানত মৃত্যু হোৱা এগৰাকী লোকৰ পৰিয়ালেও এই পৰ্যন্ত ৰাজ সাহায্য নোপোৱাটো দুখৰ বিষয়" ৷
ভূপেন বৰাই শাসকীয় মন্ত্ৰী-বিধায়কসকলে বানাক্ৰান্ত এলেকা পৰিদৰ্শন কৰাৰ নামত পিকনিক খোৱাহে পৰিলক্ষিত হৈছে বুলি তীৰ্যক মন্তব্য প্ৰকাশ কৰে ৷
অসম প্ৰদেশ কংগ্ৰেছৰ সভাপতি ভূপেন বৰাই ক্ষতিগ্ৰস্ত ৰাইজৰ সৈতে মত বিনিময় কৰাৰ লগতে সাহায্য বিতৰণ কৰে ৷ কংগ্ৰেছৰ ৰাজ্যিক সাধাৰণ সম্পাদক বিতোপন শইকীয়া, ৰাজ্যিক নেত্ৰী মিনতি দলে, ইয়ং ব্ৰিগেডৰ কাৰ্যকৰী সভাপতি জিতু শইকীয়া, গোলাঘাট জিলাৰ সভাপতি গোলাপ শইকীয়া, উপ-সভাপতি উৎপল দলে, ৰত্ন গগৈ, ধৰ্মেশ্বৰ কুৰ্মী, উপাধ্যক্ষ সাহায্য আৰু পুনৰ সংস্থাপন অমৃত কুমাৰ বুঢ়াগোঁহাইকে ধৰি বহু দলীয় কৰ্মকৰ্তা উপস্থিত থাকে এই কাৰ্যসূচীত ৷
