জোনাই, ২৫ ছেপ্টেম্বৰ : অব্যাহত আছে অসমীয়াৰ ওপৰত অৰুণাচলীৰ আক্ৰমণৰ অভিযোগ ৷ এইবাৰ অভিযোগ উত্থাপিত হৈছে অসমৰ গাড়ী চালকক প্ৰাণে মৰা চেষ্টা চলোৱাৰ ৷
কিছুদিন পূৰ্বে অৰুণাচল প্ৰদেশৰ দাপৰিজোত দুজনকৈ অসমৰ গাড়ী চালকক হত্যা কৰাৰ ঘটনা চাঞ্চল্য এতিয়াও মাৰ যোৱা নাই ৷ তেনে সময়তে পুনৰ অৰুণাচল প্ৰদেশৰ ল'ৱাৰ দিবাং ভেলীৰ দাম্বুকত ২৩ ছেপ্টেম্বৰত অসমৰ গাড়ী চালকক অৰুণাচলৰ এদল দুৰ্বৃত্তই প্ৰাণে মৰাৰ চেষ্টাৰ অভিযোগ উত্থাপিত হৈছে ।
অভিযোগ অনুসৰি দুৰ্বৃত্তৰ দলটোৱে হাতে হাতে চোকা অস্ত্ৰ লৈ খেদি আহি চালকগৰাকীৰ পৰা ধন দাবী কৰে ৷ তদুপৰি চালকগৰাকীৰ শৰীৰৰ বিভিন্ন অংশত চোকা অস্ত্ৰৰে আঘাত কৰি গাড়ীৰ চাবিৰ লগতে জেপত থকা সকলো ধন দুৰ্বৃত্তই কাঢ়ি লৈ যায় ৷ ইফালে প্ৰাণৰ মমতাত চালকগৰাকীয়ে জেপত থকা সকলো ধন দি কোনোমতে প্ৰাণৰক্ষা কৰি ঘটনাস্থলীৰ পৰা পলায়ন কৰিবলৈ সক্ষম হয় বুলি জানিবলৈ দিছে ।
উল্লেখযোগ্য যে, ইয়াৰ পূৰ্বেও অৰুণাচল প্ৰদেশৰ একাংশ দুৰ্বৃত্তই অসমৰ চালকসকলক বিভিন্নধৰণেৰে দাবী-ধমকি দি ধন সংগ্ৰহৰ অভিযোগ উত্থাপিত হৈছিল ৷ ধন নিদিলে গাড়ীৰ চকা, আইনা আদি ভাঙি দিয়াৰ ঘটনাও সংঘটিত কৰাৰ অভিযোগ আছে অৰুণাচলীৰ বিৰুদ্ধে ।
২৩ ছেপ্টেম্বৰৰ ঘটনা সন্দৰ্ভত অসমৰ গাড়ী চালক সন্থাই অৰুণাচল প্ৰদেশৰ দাম্বুকৰ নিবাসী কেদংজী দুমাৰ নামৰ ব্যক্তিজনৰ বিৰুদ্ধে গোচৰ দাখিল কৰিছে ৷ এই আক্ৰমণৰ লগত লোকজন জড়িত থকাৰ সন্দেহত ইতিমধ্যে জোনাই থানাত দাখিল কৰিছে গোচৰ । ইফালে অহা ২৪ ঘন্টাৰ ভিতৰত যদিহে দুৰ্বৃত্তক আটক কৰি উচিত শাস্তি প্ৰদান নকৰে, তেন্তে ৰাষ্ট্ৰীয় ঘাইপথ অৱৰোধ কৰাৰ হুংকাৰ দিছে জোনাইৰ গাড়ী চালক সন্থাই ।
লগতে পঢ়ক : চালকক হত্যাৰ প্ৰতিবাদ : ৩ দিনৰ ভিতৰত দাবী পূৰণ নকৰিলে ৰাষ্ট্ৰীয় ঘাইপথ অৱৰোধৰ হুংকাৰ
অৰুণাচলত পুতি থোৱা অৱস্থাত উদ্ধাৰ অসমৰ অপহৃত ট্ৰাক চালকৰ মৃতদেহ, গ্ৰেপ্তাৰ চাৰি
