ধেমাজি: আজি আন্তঃৰাষ্ট্ৰীয় ব্ৰেইলী দিৱস । দৃষ্টিহীনসকলৰ মানৱাধিকাৰৰ গুৰুত্ব উপলব্ধি কৰি ২০১৮ চনত ৰাষ্ট্ৰসংঘৰ সাধাৰণ পৰিষদে লুই ব্ৰেইলীৰ জন্মদিন ৪ জানুৱাৰীৰ দিনটোক ব্ৰেইলী দিৱস হিচাপে ঘোষণা কৰে । ইয়াৰ পিছতেই ২০১৯ চনৰে পৰা দৃষ্টিহীনসকলৰ যোগাযোগৰ মাধ্যম হিচাপে ব্ৰেইলী লিখন পদ্ধতিৰ গুৰুত্ব সম্পৰ্কে সচেতনতা বৃদ্ধিৰ উদ্দেশ্যে এই দিৱস উদযাপন কৰা হয় ।
এই ব্ৰেইলী দিৱসৰ দিনটোত চিনাকি কৰি দিব খুজিছোঁ ব্ৰেইলী পদ্ধতিৰে শিক্ষাগ্ৰহণ কৰা এগৰাকী দৃষ্টিহীন লোকক ।
ধেমাজি ভৰালীচুকৰ এজন দৃষ্টিহীন ব্যক্তি হেমচন্দ্ৰ বৰাই ১৯৮০ চনতেই বিহপুৰীয়া অন্ধ বিদ্যালয়ত ভৰ্তি হৈছিল । ১১ বছৰে ব্ৰেইলী পদ্ধতিৰে শিক্ষাগ্ৰহণ কৰি অহা বৰাই ব্ৰেইলী পদ্ধতিত লিখন আৰু পঠন সম্পৰ্কে জনালে ই টিভি ভাৰতৰ আগত । তেওঁ কয়, “মই ১৯৮০ চনতেই বিহপুৰীয়াৰ অন্ধ বিদ্যালয়ত নামভৰ্তি কৰিছিলোঁ । এঘাৰ বছৰৰ পিছত ওলাই আহিলোঁ । আমি সেই শিক্ষাৰ জৰিয়তে বহুতো নজনা কথা জানিব পাৰিলোঁ । আমি যদি পঢ়া শুনা নকৰিলোহেতেন তেন্তে নাজানিলোহেতেন । এতিয়া পৃথিৱীৰ কিছু কথা জানিব পাৰিলোঁ ।"
তেওঁ লগতে কয়, “দৃষ্টিহীনসকলে ব্ৰেইলী পদ্ধতিত লিখা-পঢ়া কৰি জ্ঞান অৰ্জন কৰিব পাৰে ৷ সেয়ে দৃষ্টিহীন অথবা দৃষ্টি প্ৰতিবন্ধীসকলক ব্ৰেইলী পদ্ধতিত লিখা-পঢ়া কৰিবলৈ আহ্বান জনালোঁ । লগতে সকলো দৃষ্টিহীনক স্কুলত পঢ়াৰ সুবিধা কৰি দিবলৈ চৰকাৰক অনুৰোধ জনাইছোঁ ।" ইয়াৰ উপৰিও দৃষ্টিহীন ব্যাক্তিসকলক চৰকাৰে সা-সুবিধা প্ৰদান কৰিবলৈ আহ্বান জনাই বৰাই ৷ মন কৰিবলগীয়া যে চৰকাৰে এটা দিন ধুমধামেৰে এই দিৱস উদযাপন কৰাৰ সময়তে ধেমাজিৰ এইগৰাকী ব্ৰেইলীত শিক্ষা আহৰণ কৰা ব্যক্তিয়ে কটাইছে দুবিৰ্ষহ জীৱন । ৰে'লত ভিক্ষাবৃত্তিৰে পৰিয়াল পোহপাল দিবলগীয়া হৈছে ।
