নিউজ ডেস্ক, ২৪ জুলাই : বহু প্ৰতীক্ষিত বিশ্ব ক্ৰীড়া মহাৰণৰ বাবে আৰু মাত্ৰ কেইটামান দিনৰ অপেক্ষা । আনহাতে, অলিম্পিক দৰ্শনাৰ্থীসকলৰ বৃহৎ মাত্ৰাত আগমনৰ বাবে নিজকে প্ৰস্তুত বুলি ঘোষণা কৰিছে ফ্ৰান্সে । ইফালে পেৰিছৰ ড্ৰাগছ ব্যৱসায়ীসকলেও নিজকে সম্পূৰ্ণ সাজু বুলি ঘোষণা কৰিছে । ড্ৰাগছৰ ডীলাৰসকলে সামগ্ৰীৰ সুস্থিৰ যোগানৰ প্ৰতিশ্ৰুতি প্ৰদান কৰিছে । কিন্তু তাৰ মাজতে এইটোও সতৰ্ক কৰি দিছে যে অলিম্পিকৰ সময়ত ব্যাপক চাহিদাৰ বাবে ড্ৰাগছৰ মূল্যবৃদ্ধি হ'ব পাৰে । লগতে ব্যাপক নিৰাপত্তা বেষ্টনীৰ বাবে ড্ৰাগছ বিতৰণৰ বাবে প্ৰয়োজনীয় সময় প্ৰভাৱিত হ'ব পাৰে । কিয়নো সেই সময়ত হাজাৰ হাজাৰ নিৰাপত্তা বাহিনীয়ে সমগ্ৰ চহৰখন আৱৰি ৰাখিব ।
ইফালে পেৰিছবাসীয়ে তেওঁলোকৰ এপাৰ্টমেণ্ট ভাড়াত দিয়াৰ বাবে প্ৰস্তুতি আৰম্ভ কৰিছে । আনহাতে, পৰিবহণ ব্যৱস্থাত টিকটৰ মূল্য বৃদ্ধি কৰি হ'লেও সকলোৱে অলিম্পিক গেমছৰ সময়ত ধন উপাৰ্জন কৰিব বিচাৰিছে । ইয়াত আণ্ডাৰৱৰ্ল্ডো অন্তৰ্ভুক্ত আছে । পেৰিছৰ এগৰাকী ব্যৱসায়ীয়ে এ এফ পিক কয়, "আমি এইক্ষেত্ৰত সদায় সাজু ।" চলিত সপ্তাহত ফ্ৰান্সৰ নেতা ইমানুৱেল মেক্ৰ'নৰ দাবী পুনৰ উত্থাপন কৰি তেওঁ কয় যে ৰাষ্ট্ৰখন অলিম্পিকৰ বাবে সম্পূৰ্ণ সাজু ।
আনহাতে, নাম প্ৰকাশ নকৰাৰ চৰ্তত এগৰাকী ডীলাৰে কয়, "ইয়াৰ বাবে সদায় কোনোবা নহয় কোনোবা সাজু থাকে, টকা উপাৰ্জন কৰিব লাগিলে এইটোৱেই হয় ।" আনহাতে, প্ৰায় 45,000 নিৰাপত্তা বাহিনীয়ে ৰাজপথত সুৰক্ষা ব্যৱস্থা নিয়ন্ত্ৰণ কৰি থকাৰ সময়ত বিশেষজ্ঞসকলে আশা কৰে যে ডেলিভাৰী সেৱাবোৰে গ্ৰাহকসকলক অতিষ্ঠ হোৱাৰ পৰা এৰাই চলিবলৈ বিশেষ তৎপৰতা প্ৰদৰ্শন কৰিব ।
উল্লেখ্য, মহামাৰীৰ সময়ত লকডাউনে ব্যৱসায়ৰ গতিপথ সলনি কৰাৰ সময়ত দোকানৰ পৰা ব্যৱসায় স্মাৰ্টফোনৰ স্ক্ৰীণলৈ ঠেলি দিয়ে । ইয়াৰ পিচত ফ্ৰান্সত ইতিমধ্যে মেছেজিং এপ আৰু ছ'চিয়েল মিডিয়া পৰিচালিত ড্ৰাগছ বিতৰণ বৃদ্ধি পাইছে । একে সময়তে দেশখনে ড্ৰাগছৰ ব্যৱসায় আৰু প্ৰতিদ্বন্দ্বী গোটবোৰৰ মাজত হ'ব পৰা বৰ্ধিত মাৰাত্মক হিংসাৰ বাবেও সতৰ্কবাণী প্ৰদান কৰিছে ।
অপৰাধ শাখাৰ এটৰ্ণী এড্ৰিয়েন গাবিউডে কয়, "টেলিগ্ৰাম বা প্ৰচাৰমূলক লেনদেনৰ দৰে এপ্লিকেশ্বনত ডিজিটেল অফাৰ বৃদ্ধি পোৱাৰ বাবে ড্ৰাগছ সৰবৰাহৰ একপ্ৰকাৰৰ বৰ্ধিত সম্ভাৱনা আছে ।"
