স্প’ৰ্টছ ডেস্ক, 29 আগষ্ট: আই পি এল 2025 ক কেন্দ্ৰ কৰি ব্যস্ত হৈ পৰিছে ফ্ৰেঞ্চাইজি দলসমূহ ৷ যাক কেন্দ্ৰ কৰি কিছুদিন পিছত অনুষ্ঠিত হ’ব খেলুৱৈসকলৰ সৰ্ববৃহৎ নিলাম ৷ কোনটো দলে কোনগৰাকী খেলুৱৈক নিলামত ক্ৰয় কৰিব তাক লৈ অব্যাহত আছে চৰ্চা । যাৰ ওপৰত তীক্ষ্ণ দৃষ্টি ৰাখিছে ক্ৰিকেটপ্ৰেমী তথা অনুৰাগীসকলে ৷
ভাৰতীয় ক্ৰিকেটাৰ ৰোহিত শৰ্মাক লৈও প্ৰচাৰ হৈছে বহু খবৰ ৷ খবৰ অনুসৰি, লক্ষ্ণৌ চুপাৰ জায়েণ্টছে ৰোহিতক নিজৰ দলত অন্তৰ্ভুক্তি কৰিবলৈ সুকীয়াকৈ ৰাখিছে প্ৰায় 50 কোটি টকা ৷ পিছে এই সকলোবোৰ চৰ্চাৰ ওৰ পেলাই ৰোহিত শৰ্মাৰ সন্দৰ্ভত প্ৰতিক্ৰিয়া প্ৰকাশ কৰিছে দলটোৰ স্বত্বাধিকাৰী সঞ্জীৱ গোৱেংকাই ৷
স্প’ৰ্টছ টাকৰ সৈতে হোৱা এক সাক্ষাৎকাৰত, লক্ষ্ণৌ চুপাৰ জায়েণ্টছৰ স্বত্বাধিকাৰী সঞ্জীৱ গোৱেংকাই বহুতো গুৰুত্বপূৰ্ণ কথাৰ উত্তৰ দিয়ে । ৰোহিত শৰ্মা সন্দৰ্ভত সোধা এই প্ৰশ্নটো গোৱেংকাই উৰাবাতৰি বুলি অভিহিত কৰে ।
"মোক এটা কথা কওঁক, ৰোহিত শৰ্মা কাৰ্যত উপলব্ধ বুলি কোনোবাই জানে নেকি ? গোটেই উৰাবাতৰিটো ভিত্তিহীন" বুলি তেওঁ কয় ।
"মুম্বাই ইণ্ডিয়ানছে ৰোহিত শৰ্মাক দলৰ পৰা বাদ দিয়ে নে নাই আমি চাব লাগিব । তাৰপিছত আমি চাব লাগিব যে ৰোহিতে নিলামত অংশগ্ৰহণ কৰে নে নাই ৷ ক্ৰিকেটাৰগৰাকীয়ে নিলামত অংশগ্ৰহণ কৰিলেও বাজেটৰ আধা অংশ এজন খেলুৱৈৰ ওপৰত ব্যয় কৰিলে, বাকী 22 জন খেলুৱৈক কেনেকৈ ক্ৰয় কৰিব"? সাক্ষাৎকাৰটোত এনেদৰে ৰোহিত শৰ্মা সন্দৰ্ভত ব্যক্ত কৰে এল এছ জিৰ স্বত্বাধিকাৰীগৰাকীয়ে ৷
ৰোহিতক ফ্ৰেঞ্চাইজিত অন্তৰ্ভুক্ত কৰিব বিচৰা প্ৰশ্নৰ উত্তৰত গোৱেংকাই কয়, "নিজৰ দলটোত সৰ্বশ্ৰেষ্ঠ অধিনায়ক আৰু খেলুৱৈ ৰখাৰ বাবে সকলোৰে ইচ্ছাৰ এখন তালিকা আছে । মই যিয়েই নকৰো কিয় প্ৰতিটো ফ্ৰেঞ্চাইজিয়ে সেইটো বিচাৰিব" ।
গোৱেংকাই লগতে কৈছিল যে, লক্ষ্ণৌৱে মুম্বাই ইণ্ডিয়ানছৰ মানসিকতাৰ পৰাও শিকিব পাৰে ৷ খেলৰ শেষলৈকে এম আইয়ে কেতিয়াও নিজকে পৰাজিত বুলি বিবেচনা নকৰাটোত জোৰ দিয়ে । তেওঁ এল এছ জিক সফল হ’বলৈ একে ধৰণৰ দৃষ্টিভংগী অৱলম্বন কৰিবলৈ আহ্বান জনাইছিল ।
লগতে পঢ়ক: গৌতম গম্ভীৰৰ স্থানত ভাৰতৰ প্ৰাক্তন দ্ৰুত বলাৰ জাহিৰ খানক নিযুক্তি - IPL 2025
