স্পৰ্টছ ডেস্ক, 19 মে’ : শনিবাৰে আই পি এল 2024ত ৰয়েল ছেলেঞ্জাৰ্ছ বেংগালুৰু বনাম চেন্নাই চুপাৰ কিংছৰ মাজত অনুষ্ঠিত হোৱা হাই ভল্টেজ মেচখনত আৰ চি বিয়ে দৰ্শনীয় জয় অৰ্জন কৰে ৷ এই জয়েৰে আৰ চি বিয়ে প্লে’ অফৰ বাবে যোগ্যতা অৰ্জন কৰিছে ৷ এই হাই ভল্টেজ মেচখনত আৰ চি বিয়ে প্লে’ অফত প্ৰৱেশ কৰিবলৈ কেৱল চি এছ কেৰ বিৰুদ্ধে জয়ী হোৱাই নহয় 18 বা তাতকৈ অধিক ৰাণৰ ব্যৱধানত জয়ী হ’ব লাগিছিল ৷ কিন্তু এই উত্তেজনাপূৰ্ণ মেচখন দলটোৱে 27 ৰাণৰ ব্যৱধানত জয়লাভ কৰি প্লে’ অফৰ যোগ্যতা অৰ্জন কৰে ৷
বৰষুণে আৰ চি বিৰ অনুৰাগীৰ উশাহ বন্ধ কৰিছিল-
বৰষুণে আৰ চি বিৰ অনুৰাগীসকলৰ উশাহ বন্ধ কৰি দিছিল ৷ চেন্নাইৰ বিৰুদ্ধে খেলখনত প্ৰথমে বেটিং কৰা বেংগালুৰু দলে এক সুন্দৰ আৰম্ভণি কৰিছিল ৷ বেটিং কৰিবলৈ অহা বিৰাট কোহলী আৰু ফাফ ডু প্লেচিছে প্ৰথম 2 অভাৰত 30 ৰাণ সংগ্ৰহ কৰে ৷ তাৰ পিচতে বৰষুণে মেচখনত বাধাৰ সৃষ্টি কৰাত খেলখন সাময়িকভাৱে স্থগিত কৰিব লগা হৈছিল ৷ বৰষুণ অহাৰ লগে লগে অনুৰাগীসকল হতাশ হৈ পৰে আৰু তেওঁলোকে বৰষুণ বন্ধ হোৱাৰ বাবে প্ৰাৰ্থনা কৰিবলৈ আৰম্ভ কৰিছিল ৷
আৰ চি বিৰ বিস্ফোৰক প্ৰদৰ্শন-
এই মেচখনত বিৰাট কোহলী, ফাফ ডু প্লেচিছ, ৰজত পাতিদাৰ, গ্লেন মেক্সৱেল, য়শ দয়াল সকলোৱে তেওঁলোকৰ গুৰুত্বপূৰ্ণ অৱদান আগবঢ়ায় ৷ বিৰাট কোহলীয়ে 29 টা বলত 47 ৰাণ সংগ্ৰহ কৰে ৷ আনহাতে প্লেচিছে 39 টা বলত 54 ৰাণ সংগ্ৰহ কৰে, ৰজত পাতিদাৰে 23 টা বলত 43 ৰাণ সংগ্ৰহ কৰে ৷ বলিং আক্ৰমণত গ্লেন মেক্সৱেলে প্ৰথম বলতে চি এছ কেৰ অধিনায়ক ৰুতুৰাজ গাইকোৱাডক পেভিলিয়নৰ পথ দেখুৱাইছিল ৷
য়শ দয়ালৰ নিয়ন্ত্ৰিত স্পেল-
এই হাই-ভল্টেজ মেচখনত য়শ দয়ালে নিয়ন্ত্ৰিত বলিঙেৰে মেচখন আৰ চি বিৰ হাতলৈ আনে ৷ তেওঁ 4 অভাৰত 42 ৰাণ খৰছ কৰি 2 টা উইকেট দখল কৰে ৷ প্লে’ অফৰ বাবে যোগ্যতা অৰ্জন কৰিবলৈ চি এচ কেক 1 অভাৰত 17 ৰাণৰ প্ৰয়োজন আছিল ৷ এম এছ ধোনীয়ে য়শ দয়ালৰ প্ৰথম বলত এটা ছয় মাৰিছিল ৷ তাৰ পাচৰ বলত দয়ালে মাহীক পৰৱৰ্তী বলত পেভিলিয়নলৈ যোৱাৰ পথ দেখুৱাইছিল ৷ অৱশেষত, দয়ালে সুন্দৰ বলিঙেৰে চি এছ কেক 191 ৰাণত স্তব্ধ কৰি দিয়ে ৷
বিৰাট কোহলীৰ প্লে’ অফৰ বাবে যোগ্যতা অৰ্জনৰ উদযাপন ভাইৰেল হৈ পৰিছে-
যেতিয়া আৰ চি বিয়ে চি এছ কেক 200 তকৈ কম ৰাণত ৰখাইছিল, কোহলীয়ে খেলপথাৰত অকলে গৰ্জন কৰিছিল ৷ যিটো সামাজিক মাধ্যমত যথেষ্ট ভাইৰেল হৈ পৰিছে ৷ এই বিজয়ৰ পিচত তেওঁৰ উদযাপন দৰ্শনীয় আছিল যেতিয়া তেওঁৰ চকুত আনন্দৰ চকুপানী আছিল ৷ তেওঁ এইবাৰ বিশ্বকাপৰ পৰাজয়ৰ দৰে মুখত টুপীটো ৰাখিছিল কিন্তু এইবাৰ তেওঁৰ জয়ৰ আনন্দৰ চকুপানী ওলাইছিল, পৰাজয়ৰ নহয় ৷
ৰয়েল চেলেঞ্জাৰ্ছ বেংগালুৰুৰ বিজয় খেলপথাৰৰ ভিতৰৰ পৰা বাহিৰৰ ৰাস্তালৈ উদযাপন কৰা হৈছিল ৷ অনুৰাগীসকল নিশা তেওঁলোকৰ ঘৰৰ পৰা ওলাই আহিছিল আৰু উদযাপন কৰিছিল ৷ নিশা এনে বহুতো ভিডিঅ' বেংগালুৰুৰ পৰা আহিছিল য'ত অনুৰাগীসকলে ঘৰৰ পৰা ওলাই আহি বিজয় উদযাপন কৰি আছিল ৷
