শ্ৰীলংকা ভ্ৰমণৰ সময়ত ভাৰতীয় দলে লাভ কৰিব নতুন প্ৰশিক্ষক - Indian team new coach

Indian team new coach : প্ৰশিক্ষক হিচাপে ভাৰতীয় দলৰ সৈতে ৰাহুল দ্ৰাবিড়ৰ টি-২০ বিশ্বকাপ আছিল অন্তিমটো যাত্ৰা । বিচিচিআইয়ে শীঘ্ৰে নতুন প্ৰশিক্ষক নিযুক্তি দিব । সচিব জয় শ্বাহৰ মতে নতুন প্ৰশিক্ষকৰ সৈতে ভাৰতীয় দলে শ্ৰীলংকা ভ্ৰমণ কৰিব ।

স্পৰ্টছ ডেস্ক,১ জুলাই : বিচিচিআইৰ সচিব জয় শ্বাহে শেহতীয়াকৈ উল্লেখ কৰা মতে ভাৰতীয় ক্ৰিকেট দলে এই মাহৰ শেষৰ ফালে টি-২০ শৃংখলাৰ বাবে শ্ৰীলংকা ভ্ৰমণ কৰিব । এই শৃংখলাটো ভাৰতৰ নতুন মুখ্য প্ৰশিক্ষক থাকিব । কিন্তু বিদায়ী ৰাহুল দ্ৰাবিড়ৰ স্থান কোনে ল'ব সেয়া তেওঁ প্ৰকাশ কৰা নাই ।

অৱশ্যে প্ৰাক্তন ভাৰতীয় অপেনাৰ গৌতম গম্ভীৰে দ্ৰাবিড়ৰ স্থান ল'ব বুলি আশা কৰা হৈছে । ক্ৰিকেট উপদেষ্টা সমিতিয়ে হাই-প্ৰফাইল নিযুক্তিৰ বাবে চৰ্ট লিষ্টত থকা গম্ভীৰ আৰু ভাৰতৰ প্ৰাক্তন মহিলা প্ৰশিক্ষক ডব্লিউ ভি ৰমনৰ বাবে সাক্ষাৎকাৰ অনুষ্ঠিত কৰিছে । ভাৰতীয় দলে শনিবাৰে টি-২০ বিশ্বকাপৰ খিতাপ অৰ্জন কৰাৰ পিচতে জয় শ্বাহে কয় যে এগৰাকী নিৰ্বাচকৰ নিযুক্তিও শীঘ্ৰেই কৰা হ'ব ।

তেওঁ উল্লেখ কৰা মতে ভাৰতীয় দলৰ প্ৰশিক্ষক আৰু নিৰ্বাচক দুয়োৰে নিযুক্তি সোনকালেই কৰা হ'ব । ক্ৰিকেট উপদেষ্টা সমিতিয়ে ইতিমধ্যে সাক্ষাৎকাৰ লৈছে আৰু মুম্বাইত উপস্থিত হোৱাৰ পিচতে সিদ্ধান্তৰ বিষয়ে জানিব পাৰিব বুলি তেওঁ উল্লেখ কৰে । তেওঁ উল্লেখ কৰা মতে ভিভিএছ লক্ষ্মণ জিম্বাবোৱেলৈ দলৰ প্ৰশিক্ষক হিচাপে ভ্ৰমণ কৰিব যদিও নতুন প্ৰশিক্ষকে শ্ৰীলংকা শৃংখলাত যোগদান কৰিব ।

উল্লেখ্য যে ভাৰতীয় দলটোৱে ২৭ জুলাইৰ পৰা টি-২০ আৰু এদিনীয়া শৃংখলাৰ বাবে শ্ৰীলংকা ভ্ৰমণ কৰিব । ১১ বছৰৰ অন্তত ভাৰতে আইচিচি খিতাপ লাভ কৰাৰ পিচত বিচিচিআইৰ সচিব জয় শ্বাহে তেওঁৰ আনন্দ প্ৰকাশ কৰে ।

তেওঁ ফাইনেলত বিজয়ী ইনিংছ খেলা ৰোহিত শৰ্মা আৰু বিৰাট কোহলীৰো যথেষ্ট প্ৰশংসা কৰে । ইফালে দুয়োগৰাকী খেলুৱৈয়ে বিশ্বকাপ জয়ৰ পিচতে টি-২০ৰ পৰা অৱসৰৰ কথা ঘোষণা কৰে । আনহাতে অলৰাউণ্ডাৰ ৰবীন্দ্ৰ জাদেজাও টি-২০ ফৰ্মেটৰ পৰাও অৱসৰ লোৱাৰ কথা ঘোষণা কৰে ।