স্পৰ্টছ ডেস্ক, 21 জুন : বিস্ফোৰক ভাৰতীয় বেটাৰ সূৰ্যকুমাৰ যাদৱে এক ঈৰ্ষণীয় ৰেকৰ্ড সৃষ্টি কৰিছে । তেওঁ ভাৰতৰ প্ৰাক্তন অধিনায়ক তথা দলৰ অভিজ্ঞ তথা নিৰ্ভৰযোগ্য বেটাৰ বিৰাট কোহলীৰ টি-20 ক্ৰিকেট ইতিহাসৰ সৰ্বাধিক 'প্লেয়াৰ অব দ্য মেচ' বঁটা লাভৰ অভিলেখ স্পৰ্শ কৰে । বৃহস্পতিবাৰে কেনিংটন অভেল ষ্টেডিয়ামত ভাৰত আৰু আফগানিস্তানৰ মাজত অনুষ্ঠিত মেচৰ সময়ত তেওঁ এই অবিশ্বাস্য কৃতিত্ব অৰ্জন কৰে ।
উল্লেখ্য, টুৰ্ণামেণ্টখনৰ ছুপাৰ এইটৰ ভাৰতৰ প্ৰথমখন মেচত সূৰ্যকুমাৰে এক বিস্ফোৰক ইনিংছ উফহাৰ দিয়ে । তেওঁ মাৰমুখী বেটিং আৰু অসাধাৰণ শৈলীৰে 28 টা বলত 53 ৰাণ সংগ্ৰহ কৰে । তেওঁৰ ইনিংছটো পাঁচটা চাৰি আৰু তিনিটা ছয়েৰে সজ্জিত আছিল । ইয়াৰ উপৰি উপ-অধিনায়ক হাৰ্দিক পাণ্ডিয়াৰ সৈতে সূৰ্যকুমাৰে 60 ৰাণৰ এক পাৰ্টনাৰশ্বিপ গঢ়ি মেচখন ভাৰতৰ পক্ষলৈ লৈ গৈছিল । যাৰ বাবে চলিত টি-20 বিশ্বকাপত ভাৰতে সৰ্বাধিক স্ক'ৰ 8 উইকেটৰ বিনিময়ত 181 ৰাণ সংগ্ৰহ কৰিবলৈ সক্ষম হয় । আনহাতে, ইয়াৰ প্ৰত্যুত্তৰত আফগানিস্তান দলটো 134 ৰাণতে স্তব্ধ হয় আৰু ভাৰতে 47 ৰাণৰ বৃহৎ ব্যৱধানত মেচখনত জয়লাভ কৰে ।
ভাৰতৰ এই উল্লেখনীয় বিজয়ৰ পিচত 33 বছৰীয়া খেলুৱৈগৰাকী যথাৰ্থভাৱেই এই অভিজাত টুৰ্ণামেণ্টখনৰ ক্ৰমাগত দ্বিতীয়টো অৰ্ধশতকৰ বাবে 'প্লেয়াৰ অব দ্য মেচ' হিচাপে বিবেচিত হয় । আনহাতে, তেওঁ এতিয়ালৈকে ১৫ বাৰ 'প্লেয়াৰ অব দ্য মেচ' বঁটা লাভ কৰিছে, যিটো হৈছে ক্ৰিকেটৰ আটাইতকৈ হ্ৰস্ব ফৰ্মেটত সৰ্বাধিকবাৰ কোহলীয়ে লাভ কৰা পুৰস্কাৰৰ সমান ।
লক্ষণীয়ভাৱে এই বঁটা লাভ কৰাৰ পিচত তেওঁ চলিত টি-20 বিশ্বকাপত ভাৰতৰ হৈ প্লেয়াৰ অব দ্য মেচ বঁটা জয় কৰা প্ৰথমগৰাকী বেটাৰ হিচাপে পৰিগণিত হয় । আনহাতে, মেচৰ অন্তত অনুষ্ঠিত বঁটা বিতৰণী অনুষ্ঠানত এইগৰাকী একক শৈলীৰ 33 বছৰীয়া যুৱ বেটাৰে কয় যে তেওঁ মেচখনৰ বাবে চলোৱা প্ৰস্তুতিত তেওঁ অনুসৰণ কৰা প্ৰক্ৰিয়া আৰু ৰুটিনৰ গভীৰতালৈ গৈছিল ।
তেওঁ এইটোও উল্লেখ কৰে যে তেওঁৰ ভূমিকাৰ বিষয়ে স্পষ্ট ধাৰণা থকা আৰু তেওঁ খেলপথাৰত কি কৰিবলৈ গৈ আছে সেইটোৱে তেওঁক নিজৰ প্ৰদৰ্শন উজ্জ্বল কৰাত সহায় কৰিছে ।
