স্প’ৰ্টছ ডেস্ক, 20 ছেপ্টেম্বৰ: ঘৰৰ মাটিত ইতিহাস ৰচনা কৰিলে ভাৰতীয় ক্ৰিকেট দলৰ অভিজ্ঞ দ্ৰুত বলাৰ যশপ্ৰীত বুমৰাহে । চেন্নাইৰ এম এ চিদাম্বৰম ষ্টেডিয়ামত ভাৰত আৰু বাংলাদেশৰ মাজত অনুষ্ঠিত হৈ থকা টেষ্ট শৃংখলাৰ প্ৰথমখন মেচত বুমৰাহে স্পৰ্শ কৰিছে মাইলৰ খুঁটি ।
যশপ্ৰীত বুমৰাহৰ ইতিহাস ৰচনা
400 উইকেট দখল কৰা ভাৰতৰ দশমগৰাকী বলাৰত পৰিগণিত হৈছে বুমৰাহ । ইয়াৰ লগে লগে তেওঁ সকলোতকৈ কম মেচ আৰু ইনিংছত 400 উইকেট দখল কৰা পঞ্চমগৰাকী ভাৰতীয় বলাৰত পৰিগণিত হয় । এই মেচখনত বুমৰাহে শদমান ইছলাম, মুছফিকুৰ ৰহিম, হাছান মাহমুদক ধৰাশায়ী কৰি এই কৃতিত্ব অৰ্জন কৰে ৷ পৰৱৰ্তী সময়ত টাস্কিন আহমেদৰো উইকেট দখল কৰে বুমৰাহে ৷ চেন্নাই টেষ্টত এই পৰ্যন্ত বুমৰাহে 11 অভাৰত 50 ৰাণ ব্যয় কৰি 4 টা উইকেট দখল কৰিছে ।
𝟒𝟎𝟎 𝐰𝐢𝐜𝐤𝐞𝐭𝐬 𝐟𝐨𝐫 𝐈𝐧𝐝𝐢𝐚 💥💥
— BCCI (@BCCI) September 20, 2024
A milestone to savour! @Jaspritbumrah93 has picked up his 400th wicket for #TeamIndia.
Hasan Mahmud is caught in the slips and Bangladesh are now 112-8.#INDvBAN @IDFCFIRSTBank pic.twitter.com/HwzUaAMOBt
টেষ্ট ক্ৰিকেটত ভাৰতৰ হৈ মুঠ 162 টা উইকেট দখল কৰাৰ বিপৰীতে এদিনীয়া ক্ৰিকেটত 23.55 গড়ে খেলুৱৈগৰাকীয়ে 149 টা উইকেট দখল কৰিছে । টি-20 ক্ৰিকেটত বুমৰাহৰ নামত 17.75 গড়ে আছে 89 টা উইকেট ।
এনে পৰিস্থিতিত 196 খন আন্তঃৰাষ্ট্ৰীয় মেচৰ 227 টা ইনিংছত যশপ্ৰীত বুমৰাহে মুঠ 400 টা উইকেট দখল কৰি অভিলেখ স্থাপন কৰে । বলাৰগৰাকীৰ সৰ্বশ্ৰেষ্ঠ প্ৰদৰ্শন হৈছে 19 ৰাণৰ বিনিময়ত 6 টা উইকেট দখল ।
ভাৰতৰ হৈ সৰ্বাধিক দ্ৰুততম 400 টা আন্তঃৰাষ্ট্ৰীয় উইকেট
অশ্বিন হৈছে ভাৰতৰ হৈ সৰ্বাধিক দ্ৰুততম 400 টা আন্তঃৰাষ্ট্ৰীয় উইকেট সম্পূৰ্ণ কৰা প্ৰথমজন বলাৰ । অশ্বিনে 216 টা ইনিংছত 400 টা আন্তঃৰাষ্ট্ৰীয় উইকেট দখল কৰিছে । তেওঁৰ পিছতে দ্বিতীয় স্থানত আছে কপিলদেৱ, যিয়ে মুঠ 220 ইনিংছত এই কৃতিত্ব অৰ্জন কৰিছিল ।
তৃতীয় ভাৰতীয় মহম্মদ ছামীয়ে 224 ইনিংছত দখল কৰিছিল 400 উইকেট । অনিল কুম্বলে 226 ইনিংছত 400 টা আন্তঃৰাষ্ট্ৰীয় উইকেট দখল কৰা চতুৰ্থজন ভাৰতীয় বলাৰ । সম্প্ৰতি এই তালিকাত নাম অন্তৰ্ভুক্ত হৈছে যশপ্ৰীত বুমৰাহৰ ৷ বুমৰাহ হৈছে সৰ্বনিম্ন মেচ আৰু ইনিংছত 400 টা আন্তঃৰাষ্ট্ৰীয় উইকেট দখল কৰা পঞ্চমজন ভাৰতীয় বলাৰ ।
বৰ্তমানলৈকে ভাৰত-বাংলাদেশৰ খেলৰ পৰ্যায়
ভাৰত আৰু বাংলাদেশৰ মাজত অনুষ্ঠিত হৈ থকা প্ৰথমখন টেষ্ট মেচৰ দ্বিতীয় দিনৰ খেলৰ ইতিমধ্যে সামৰণি পৰিছে ৷ মেচখনৰ প্ৰথম ইনিংছ আৰম্ভ হোৱাৰ পিছতে ৰবিচন্দ্ৰন অশ্বিনৰ 113 ৰাণ, ৰবীন্দ্ৰ জাদেজাৰ 86 ৰাণ আৰু যশস্বী জয়ছোৱালৰ 56 ৰাণৰ সহায়ত ভাৰতে সংগ্ৰহ কৰে 376 ৰাণ ।
প্ৰত্যুত্তৰত বাংলাদেশে 47.1 অভাৰত আটাইকেইটা উইকেটৰ বিনিময়ত সংগ্ৰহ কৰে 149 ৰাণ ৷ ভাৰতৰ হৈ যশপ্ৰীত বুমৰাহ, মহম্মদ চিৰাজ, আকাশদ্বীপ আৰু ৰবীন্দ্ৰ জাদেজাই 2 টাকৈ উইকেট দখল কৰে । বাংলাদেশৰ হৈ ছাকিব আল হাছানে সৰ্বাধিক 32 ৰাণ সংগ্ৰহ কৰে ।
লগতে পঢ়ক: ভাৰতত 5 টাকৈ উইকেট দখলকাৰী প্ৰথমগৰাকী বাংলাদেশী বলাৰত পৰিণত হাছান মাহমুদ - HASAN MAHMUD
