স্প’ৰ্টছ ডেস্ক, 28 জুন: ডিফেণ্ডিং চেম্পিয়ন ইংলেণ্ডক টি-20 বিশ্বকাপ 2024 ৰ ছেমিফাইনেলত 68 ৰাণৰ ব্যৱধানত পৰাস্ত কৰি 2022 চনৰ টি-20 বিশ্বকাপৰ ছেমিফাইনেলত পৰাজয়ৰ প্ৰতিশোধ ল’লে ভাৰতে ৷ ইয়াৰ পিচতেই এক গুৰুত্বপূৰ্ণ মন্তব্য কৰিছে ভাৰতীয় দলৰ অধিনায়ক ৰোহিত শৰ্মাই ৷ ভাৰতৰ তাৰকা বেটাৰ বিৰাট কোহলীয়ে ফাইনেলত কি কৰিব এই সন্দৰ্ভত এই মন্তব্য কৰিছে হিটমেনে ৷ 29 জুনত কেনছিংটন অ’ভেল ষ্টেডিয়ামত অনুষ্ঠিত হ’ব ভাৰত আৰু দক্ষিণ আফ্ৰিকাৰ মাজত টি-20 বিশ্বকাপ 2024 ৰ ফাইনেল মেচ ৷
টি-20 বিশ্বকাপত এইবাৰ একেবাৰে দুৰ্বল ফৰ্মত দেখা গৈছে ভাৰতৰ প্ৰাক্তন অধিনায়ক তথা বিস্ফোৰক বেটাৰ বিৰাট কোহলীক ৷ যিকোনো দেশৰ বলাৰে ক্ৰীজত কোহলী থকা অৱস্থাত কিছু ভয় খাই থাকে যদিও এইবাৰৰ টি-20 বিশ্বকাপত কোহলীৰ সেই ‘বিৰাট ৰূপ’ প্ৰত্যক্ষ কৰাৰ পৰা বঞ্চিত হৈছে ক্ৰিকেট অনুৰাগী ৷
লগতে পঢ়ক: 2022 ৰ মধুৰ প্ৰতিশোধ পূৰ্ণ কৰি টি 20 বিশ্বকাপৰ ফাইনেলত মেন ইন ব্লু - T 20 WORLD CUP 2024
টি-20 বিশ্বকাপৰ 7 টা ইনিংছত 100 ষ্ট্ৰাইক ৰেটেৰে 75 টা বলত মাত্ৰ 75 ৰাণহে কৰিবলৈ সক্ষম হৈছে কোহলী ৷ নিজৰ ক্ৰিকেট কেৰিয়াৰত সম্ভৱতঃ এইটোৱেই হৈছে কোহলীৰ আটাইতকৈ দুৰ্বল প্ৰদৰ্শন ৷ অৱশ্য়ে এতিয়াও যিহেতু এখন খেল বাকী আছে, গতিকে সকলোৱে কোহলীৰ পৰা অন্ততঃ এটা অৰ্ধশতক আশা কৰিছে ৷
অৱশ্যে দুৰ্বল ফৰ্মত থাকিলেও ফাইনেলত মুখামুখি হ’বলগীয়া দঃ আফ্ৰিকাই কোহলীক সহজভাৱে নলয়, কাৰণ এবাৰ ছন্দ ঘূৰাই পালে খেলৰ দৃশ্যপট সলনি কৰিব পৰা ক্ষমতা আছে বিৰাটৰ ৷ সেই কথা দঃ আফ্ৰিকাই ভালদৰেই জানে ৷
লগতে পঢ়ক: লক্ষ্য ফাইনেল : বাৰ্বাডোছত উপস্থিত ভাৰতীয় দল - T20 World Cup 2024
ছেমিফাইনেলৰ শেষত যেতিয়া ভাৰতীয় অধিনায়ক ৰোহিত শৰ্মাক কোহলীৰ ফৰ্মৰ বিষয়ে সোধা হৈছিল, তেতিয়া ৰোহিতে কয় যে কোহলীৰ ফৰ্মক লৈ তেওঁ চিন্তিত নহয় ৷ লগতে তেওঁ দৃঢ়তা প্ৰকাশ কৰে যে সম্ভৱতঃ কোহলীয়ে নিজৰ সমস্ত শক্তি আৰু ৰাণ ফাইনেল মেচখনৰ বাবে সাঁচি ৰাখিছে ৷
‘‘তেওঁ এগৰাকী খ্যাতি থকা খেলুৱৈ ৷ যিকোনো খেলুৱৈয়েই এনে পৰিস্থিতিৰ সন্মুখীন হ’বলগীয়া হয় ৷ এনে এখন ডাঙৰ টুৰ্ণামেন্টত তেওঁৰ গুৰুত্ব আৰু তেওঁৰ স্থান আমি বুজি পোৱা উচিত ৷ যেতিয়া আপুনি 15 বছৰ ধৰি ক্ৰিকেট খেলে, তেতিয়া ফৰ্মটো কেতিয়াও এটা সমস্যা হ’ব নোৱাৰে ৷ তেওঁক ভালেই দেখা গৈছে ৷ উদ্দেশ্য তাতেই আছে, তেওঁ সম্ভৱতঃ ফাইনেলৰ বাবে ৰাণ আৰু শক্তি সাঁচি ৰাখিছে ৷’’ ৰোহিতে কয় ৷
লগতে পঢ়ক: দক্ষিণ আফ্ৰিকাৰ সন্মুখত প্ৰত্যাহ্বান হিচাপে থিয় দিব এইসকল ভাৰতীয় বলাৰ - India vs South Africa Final
ভাৰত আৰু ইংলেণ্ডৰ মাজত অনুষ্ঠিত টি-20 বিশ্বকাপৰ দ্বিতীয়খন ছেমিফাইনেলত প্ৰথমাৱস্থাত আক্ৰমণাত্মক দেখা গৈছিল বিৰাটক ৷ মিড-উইকেটৰ ওপৰেৰে ৰীচ টপলীৰ বলত এটা বিশাল ছিক্সাৰ কোবাইছিল বিৰাটে ৷ কিন্তু তাৰ পিচতেই তেওঁৰ ছন্দপতন ঘটে ৷ মাত্ৰ 9 ৰাণ কৰিয়েই পেভিলিয়নমুখী হোৱা কোহলীয়ে খেলপথাৰত তেওঁৰ সহযোগী অপেনাৰ ৰোহিতক এৰি গ’ল এটা ডাঙৰ কাম কৰিবলৈ ৷ সেয়া হ’ল ইংলেণ্ডৰ বিৰুদ্ধে এক শক্তিশালী স্ক’ৰ গঢ়া ৷
ৰোহিত শৰ্মাই এই টুৰ্ণামেন্টৰ ব্যক্তিগত তৃতীয়টো অৰ্ধশতক কোবাই আৰু তেওঁৰ পিচতে সুন্দৰ ফৰ্মত থকা সূৰ্য কুমাৰ যাদৱে 47 ৰাণৰ ইনিংছ খেলে ৷ নিৰ্ধাৰিত 20 অভাৰত 7 উইকেটৰ বিনিময়ত ভাৰতে 171 ৰাণ সংগ্ৰহ কৰে ৷
লগতে পঢ়ক: ছেমিত ভাৰতে জয় লাভ কৰাক লৈ প্ৰশংসাত পঞ্চমুখ প্ৰাক্তন ক্ৰিকেটাৰসকল - T20 World Cup 2024
ইয়াৰ প্ৰত্যুত্তৰত ইংলেণ্ডৰ অধিয়ানকে শক্তিশালী আৰম্ভণিৰে 13 টা বলত 22 ৰাণ সংগ্ৰহ কৰে ৷ কিন্তু ভাৰতীয় অধিনায়কে কৌশলগতভাৱে অক্ষৰ পেটেলৰ হাতত বলটো তুলি দিয়ে, এই কৌশল কামত আহিল আৰু বাটলাৰে উইকেট কীপাৰ পন্টৰ হাতত কেচ দি আউট হয় ৷ তাৰ পিচত ইংলেণ্ডৰ খেলুৱৈয়ে ভাৰতীয় স্পিন আক্ৰমণৰ সমুখত তিষ্ঠি থাকিবলৈ সংঘৰ্ষ কৰিবলগীয়া হয় ৷
দুই স্পীনাৰ আৰু পেচ স্পীয়াৰহেড যশপ্ৰীত বুমৰাহে নিয়মীয়া গতিত ইংলেণ্ডৰ উইকেট ল’বলৈ ধৰে ৷ 2022 চনৰ টি-20 বিশ্বকাপৰ ছেমিফাইনেলত 16 অভাৰতে 169 ৰাণৰ লক্ষ্য অতিক্ৰম কৰা ইংলেণ্ডক এইবাৰ ভাৰতে মাত্ৰ 103 ৰাণতে বান্ধি ৰাখে ৷ 68 ৰাণত ইংলেণ্ডক পৰাস্ত কৰি ফাইনেলৰ দৌৰৰ পৰা প্ৰস্থানৰ বাট দেখুৱাই দিলে ভাৰতে ৷
বাওঁহতীয়া স্পীনাৰ অক্ষম পেটেলক প্লেয়াৰ অৱ দ্য মেচ ঘোষণা কৰা হয় ৷ 4 অভাৰত 23 ৰাণ দি 3 টা উইকেট দখল কৰাৰ লগতে 6 টা বলত 10 ৰাণ সংগ্ৰহ কৰি দলৰ স্ক’ৰ ব’ৰ্ড শক্তিশালী কৰিছিল অক্ষৰ পেটেলে ৷ এতিয়া অপেক্ষা ফাইনেললৈ...৷
লগতে পঢ়ক: টি 20 বিশ্বকাপ : সৰ্বকালৰ সৰ্বাধিক সফল অধিনায়কত পৰিণত ৰোহিত শৰ্মা - T20 World Cup 2024
