শিৱসাগৰ, ২৩ জুলাই : অসমৰ ফুটবলপ্ৰেমীৰ বাবে এক অত্যন্ত সুখবৰ । ওড়িশাৰ ভুৱনেশ্বৰত অৱস্থিত সৰ্বভাৰতীয় ফুটবল ফেডাৰেচনৰ ফিফাৰ টেলেণ্ট ফুটবল একাডেমীলৈ নিৰ্বাচিত হৈছে শিৱসাগৰৰ ৰেহান আহমেদ । অসমৰ পৰা একমাত্ৰ ফুটবলাৰ হিচাপে ১৭ বছৰ অনূৰ্ধ্ব ফুটবল খেলুৱৈ ৰেহান আহমেদ নিৰ্বাচিত হৈছে ।
উল্লেখ্য যে এই সন্মানীয় ফুটবল প্ৰশিক্ষণ শিবিৰলৈ উত্তৰ-পূব আৰু জম্মু-কাশ্মীৰ মণ্ডলৰ পৰা সৰ্বমুঠ ২০ গৰাকী খেলুৱৈ নিৰ্বাচিত হৈছে । তাৰে ভিতৰত ৰেহান হৈছে অসমৰ পৰা নিৰ্বাচিত একমাত্ৰ খেলুৱৈ । দুবাৰকৈ অনুষ্ঠিত নিৰ্বাচনী শিবিৰৰ পৰা এই ২০ গৰাকী খেলুৱৈক বাছনি কৰা হৈছে ।
উল্লেখ্য যে নিৰ্বাচিত এই ২০ গৰাকী খেলুৱৈৰ ভিতৰত অসমৰ পৰা ৰেহান একমাত্ৰ খেলুৱৈ হোৱাৰ বিপৰীতে মণিপুৰৰ পৰা ১২ গৰাকী, মিজোৰামৰ পৰা ৬ গৰাকী আৰু জম্মু-কাশ্মীৰৰ পৰা এগৰাকী খেলুৱৈ নিৰ্বাচিত হৈছে । ৰাজ্যিক পৰ্যায়ৰ খেলত ৰেহান আহমেদৰ হাফ-ভলী শ্বট ইতিমধ্যে ফুটবল বিশেষজ্ঞৰ মাজত যথেষ্ট চৰ্চিত হৈছিল ।
ইফালে ৰেহানৰ এই সফলতাত শিৱসাগৰ ক্ৰীড়া সন্থা, শিশু ফুটবল কোচিং চেণ্টাৰৰ সকলো বিষয়ববীয়া তথা শিৱসাগৰৰ ৰাইজে আনন্দ প্ৰকাশ কৰিছে । লগতে খেলুৱৈগৰাকীৰ উজ্জ্বল ভৱিষ্যৎ কামনা কৰিছে ।
শিৱসাগৰ নগৰৰ সমীপৰ আমগুৰি গাঁৱৰ নিবাসী চিৰাজুল আহমেদ আৰু আৰিফা আহমেদৰ পুত্ৰ ৰেহান আহমেদে শিৱসাগৰ শিশু ফুটবল কোচিং চেণ্টাৰৰ প্ৰশিক্ষক অনিল আচাৰ্যৰ তত্ত্বাৱধানত ফুটবল খেলৰ প্ৰাথমিক জ্ঞান অৰ্জন কৰিছিল । ৰেহানে শিৱসাগৰ কেন্দ্ৰীয় বিদ্যালয়ৰ অষ্টম শ্ৰেণীত শিক্ষা গ্ৰহণ কৰি আছে ।
উল্লেখযোগ্য যে ভাৰতৰ বিভিন্ন প্ৰান্তৰ পৰা ১৪ বছৰ বয়সৰ ভিতৰৰ মুঠ ৫০ গৰাকী খেলুৱৈক এই শিবিৰলৈ নিৰ্বাচন কৰা হৈছে । ওড়িশাত তিনি বছৰ প্ৰশিক্ষণৰ অন্তত এইসকল খেলুৱৈৰ মাজৰ পৰা ২০২৭ চনৰ ১৭ বছৰ অনূৰ্ধ্ব ফিফা বিশ্বকাপৰ বাবে ভাৰতীয় ফুটবল দলটো বাছনি কৰা হ'ব বুলি জানিব পৰা গৈছে ।
