নিউজ ডেস্ক, ১৫ মে' : লোকসভা নিৰ্বাচনৰ বাবে মনোনয়ন দাখিল প্ৰক্ৰিয়াৰ অন্তিম পৰ্যায়ত মনোনয়নসমূহ বৰ্তমান পৰীক্ষা কৰা হৈছে । এই মনোনয়ন পৰীক্ষাৰ সময়ত পঞ্জাবৰ খাদুৰ চাহিবৰ পৰা নিৰ্দলীয় প্ৰাৰ্থী হিচাপে মনোনয়ন দাখিল কৰা কাৰাবন্দী অমৃতপাল সিঙৰ মনোনয়ন-পত্ৰ বৈধ হিচাপে বিবেচিত হৈছে । ইয়াৰ অৰ্থ হৈছে যে এতিয়া অমৃতপাল সিঙে কাৰাগাৰত থকা সত্ত্বেও নিৰ্বাচনত প্ৰতিদ্বন্দ্বিতা কৰিবলৈ সক্ষম হ'ব । অৰ্থাৎ অমৃতপাল সিঙৰ মনোনয়ন-পত্ৰত অনুমোদন জনোৱা হৈছে । প্ৰণিধানযোগ্য যে অমৃতপাল সিং বৰ্তমান ডিব্ৰুগড় কাৰাগাৰত কাৰাবন্দী হৈ আছে ।
উল্লেখ্য যে হৰপাল সিং বালেৰক পূৰ্বতে শিৰোমণি অকালি দলে খাদুৰ চাহিবৰ পৰা প্ৰাৰ্থিত্ব প্ৰদান কৰিছিল । ইয়াৰ কাৰণ হিচাপে প্ৰকাশ কৰা হৈছে যে যদি অমৃতপালৰ মনোনয়ন নাকচ কৰা হয় তেন্তে হৰপাল সিং বালেৰে তাৰ পৰা প্ৰতিদ্বন্দ্বিতা কৰিব । কিন্তু যদি অমৃতপাল সিঙৰ মনোনয়ন পত্ৰ নাকচ কৰা নহয়, তেন্তে হৰপাল সিং বালেৰৰ নাম প্ৰত্যাহাৰ কৰিব । অৱশেষত বুধবাৰে অমৃতপাল সিঙৰ মনোনয়ন-পত্ৰ অনুমোদিত হয় ।
ইফালে অমৃতপাল সিঙৰ মনোনয়ন-পত্ৰ শুদ্ধ হিচাপে বিবেচিত হোৱাৰ পিচত শিৰোমণি অকালি দলে খাদুৰ চাহিবৰ পৰা হৰপাল সিং বালেৰৰ মনোনয়ন প্ৰত্যাহাৰ কৰিছে । আনহাতে, নিৰ্বাচন আয়োগৰ ৱেবছাইটত অমৃতপাল সিঙৰ নাম আপডেট কৰা হৈছে । জিলা ৰিটাৰ্ণিং বিষয়াৰ কাৰ্যালয়ত লোকসভা সমষ্টি খাদুৰ চাহিবৰ বাবে অমৃতপাল সিঙে মনোনয়ন দাখিল কৰিছিল । অমৃতপাল সিঙৰ খুৰাক আৰু আত্মীয় সুখচেইন সিঙে মনোনয়ন-পত্ৰ দাখিল কৰিছিল ।
উল্লেখ্য যে অমৃতপাল সিঙৰ অধিবক্তাই মনোনয়ন দাখিল কৰিবলৈ পঞ্জাব আৰু হাৰিয়ানা উচ্চ ন্যায়ালয়ত এখন আবেদন দাখিল কৰিছিল । এই আবেদনত অমৃতপালে মনোনয়ন দাখিল কৰিবলৈ ৭ দিনৰ সময় বিচাৰিছিল । পঞ্জাব আৰু হাৰিয়ানা উচ্চ ন্যায়ালয়ে এই সম্পৰ্কীয় ৰায়টোত কৈছিল যে অমৃতপালৰ মনোনয়নৰ সমগ্ৰ প্ৰক্ৰিয়াটো ডিব্ৰুগড় কাৰাগাৰৰ অধীক্ষকে চম্ভালিব ।
