তেজপুৰ: বুধবাৰে উপ-নিৰ্বাচন চলি থকাৰ মাজতে বিহালীত কংগ্ৰেছৰ নেতা তথা চৰাইদেউ জিলা কংগ্ৰেছৰ সভাপতি উৎপল গগৈক আটক কৰে জিনজিয়া আৰক্ষীয়ে । ফলত জিনজিয়া থানাৰ সন্মুখত ১৫ নং ৰাষ্ট্ৰীয় ঘাইপথ অৱৰোধ কৰে কংগ্ৰেছ কৰ্মীয়ে ।
উল্লেখযোগ্য যে চৰাইদেউ জিলা কংগ্ৰেছৰ সভাপতি উৎপল গগৈক বুধবাৰে দিনৰভাগতে নিৰ্বাচনী বিধি উলংঘাৰ অভিযোগত জিনজিয়া আৰক্ষীয়ে আটক কৰে । ইফালে জিলা সভাপতিগৰাকীক আটক কৰা পিছতে শতাধিক কংগ্ৰেছ কৰ্মীয়ে জিনজিয়া আৰক্ষী থানা ঘেৰাও কৰি প্ৰতিবাদ সাব্যস্ত কৰে উৎপল গগৈৰ মুক্তিৰ দাবীত ।
ইফালে সাংসদ গৌৰৱ গগৈ আৰু তিতাবৰৰ বিধায়ক ভাস্কৰ বৰুৱা, লাহৰীঘাটৰ বিধায়ক ডাঃ আছিফ নাজাৰ জিনজিয়া আৰক্ষী থানাত উপস্থিত হৈ উৎপল গগৈৰ কাষত বহি পৰে ।
আনহাতে শতাধিক কংগ্ৰেছ কৰ্মীয়ে জিনজিয়া আৰক্ষী থানাত উপস্থিত হৈ প্ৰতিবাদ সাব্যস্ত কৰে । এগৰাকী মহিলা কংগ্ৰেছ কৰ্মীৰ মন্তব্য, "ইউ পি, বিহাৰৰ দৰে পৰিস্থিতি হৈছে অসমত, অসমৰ ৰাইজ জাগক এতিয়া ।" ঘটনা সন্দৰ্ভত ই টিভি ভাৰতৰ তৰফৰ পৰা বিশ্বনাথ জিলাৰ আৰক্ষী অধীক্ষকক কেইবাবাৰো যোগাযোগ কৰা হৈছিল যদিও কোনো সঁহাৰি পোৱা নগ'ল । ইফালে নিৰ্বাচনৰ পূৰ্বে মঙলবাৰে নিশা আৰক্ষীয়ে বিহালী কংগ্ৰেছৰ প্ৰাৰ্থী জয়ন্ত বৰাৰ দুখন হোটেলত অভিযান চলাইছিল ।
বিশ্বনাথ চাৰিআলিত অৱস্থিত হোটেল ৰয়েল পেলেচ আৰু হোটেল ৰয়েল আবাসত হঠাতে মঙলবাৰে নিশা দলে-বলে আহি উপস্থিত হয় বিশ্বনাথ আৰক্ষী আৰু অৰ্ধ সামৰিক বাহিনী ৷ বিশ্বনাথৰ জিলা অতিৰিক্ত আয়ুক্তৰ উপস্থিতিত কেবা ঘণ্টাজুৰি দুয়োখন হোটেলতে চলোৱা হয় এই অভিযান ।
