গুৱাহাটী, 14 ফেব্ৰুৱাৰী : লোকসভা নিৰ্বাচনৰ প্ৰাকক্ষণত অসম প্ৰদেশ কংগ্ৰেছত এক মোক্ষম আঘাত । কংগ্ৰেছৰ দুজনকৈ বিধায়কে পোনপটীয়াকৈ সমৰ্থন জনাইছে বিজেপিক । থাকিব কংগ্ৰছতে, সমৰ্থন জনাই যাব বিজেপি চৰকাৰক । অসম বিধানসভা চৌহদত বুধবাৰে মুখ্যমন্ত্ৰী হিমন্ত বিশ্ব শৰ্মাক গামোচা পিন্ধাই কংগ্ৰেছৰ দুই বিধায়ক বসন্ত দাস আৰু কমলাক্ষ দে’ পুৰকায়স্থই মুকলিকৈ অসমৰ বিজেপি চৰকাৰৰ সকলো কাম-কাজলৈ নিজৰ সহযোগিতাৰ কথা প্ৰকাশ কৰে ৷
আনহাতে, প্ৰদেশ কংগ্ৰেছৰ কাৰ্যকৰী সভাপতিৰ পদত থকা কমলাক্ষ দে’ পুৰকায়স্থই কাৰ্যকৰী সভাপতিৰ পদৰ পৰা পদত্যাগ কৰে ৷ ইতিমধ্যেই কমলাক্ষ দে’ পুৰকায়স্থই অসম প্ৰদেশ কংগ্ৰেছৰ সভাপতি ভূপেন বৰালৈ নিজৰ পদত্যাগ পত্ৰ প্ৰেৰণ কৰিছে ৷ পত্ৰখনত বিধায়ক কমলাক্ষই উল্লেখ কৰে যে তেওঁ কংগ্ৰেছ দলৰ প্ৰাথমিক সদস্য ৰূপে দলটোতে থাকিব । কংগ্ৰেছৰ কাৰ্যবাহী সভাপতিৰ পদৰ পৰা পদত্যাগ কৰি মুখ্যমন্ত্ৰীক সাক্ষাৎ কৰে কমলাক্ষ দে’ পুৰকায়স্থই ।
মুখ্যমন্ত্ৰী হিমন্ত বিশ্ব শৰ্মাক বিধানসভা চৌহদত আজি দুপৰীয়া সাক্ষাৎ কৰে কংগ্ৰেছৰ মঙলদৈৰ বিধায়ক বসন্ত দাস আৰু কৰিমগঞ্জৰ বিধায়ক তথা এপিচিচিৰ কাৰ্যকৰী সভাপতি কমলাক্ষ দে’ পুৰকায়স্থই ৷ দুয়োগৰাকী কংগ্ৰেছ বিধায়কে মুখ্যমন্ত্ৰীক গামোচা পিন্ধায় ৷ মুখ্যমন্ত্ৰীৰ চৰণ চুই আশীৰ্বাদ বিচাৰিলে বসন্ত দাসে ।
অসমৰ বিজেপি চৰকাৰলৈ নিজৰ সমৰ্থন আগবঢ়াই নিজৰ সপক্ষে দুয়োগৰাকী কংগ্ৰেছী বিধায়কে আগবঢ়ালে যুক্তি । নিজৰ সমষ্টি উন্নয়নৰ স্বাৰ্থতে হিমন্ত বিশ্ব শৰ্মা নেতৃত্বাধীন বিজেপি চৰকাৰখনক সমৰ্থন জনোৱা বুলি মন্তব্য আগবঢ়ালে দুই বিজেপিমুখী কংগ্ৰেছী বিধায়কে । ইয়াৰ পূৰ্বেও কংগ্ৰেছৰ আন দুগৰাকী বিধায়ক ৰহাৰ শশীকান্ত দাস আৰু ছিদ্দিক আহমেদে ৰাজ্যৰ বিজেপি চৰকাৰৰ প্ৰতি সমৰ্থন আছে বুলি মন্তব্য প্ৰকাশ কৰিছিল ।
কমলাক্ষ দে’ পুৰকায়স্থ আৰু বসন্ত দাসকে ধৰি এতিয়া কংগ্ৰেছ দলত থাকি বিজেপি চৰকাৰলৈ সমৰ্থন আগবঢ়োৱা বিধায়কৰ সংখ্যা চাৰিজনলৈ বৃদ্ধি হ’ল ৷ চাৰিওজন কংগ্ৰেছী বিধায়কক কাষত বহুৱাই বুধবাৰে সংবাদ মাধ্যমক সম্বোধন কৰিলে মুখ্যমন্ত্ৰী ড° হিমন্ত বিশ্ব শৰ্মাই ।
