গুৱাহাটী, ৭ জুন: ‘‘এইবাৰৰ নিৰ্বাচনী ফলাফলে স্পষ্ট বাৰ্তা দিছে আৰু ইতিবাচক দিশৰ সংযোজন কৰিছে । মুখ্যমন্ত্ৰী হিমন্ত বিশ্ব শৰ্মাৰ বিভাজন তথা ঘৃণাৰ ৰাজনীতিক ৰাইজে পৰিহাৰ কৰিলে ।’’ এই মন্তব্য নগাঁৱৰ পৰা দ্বিতীয়বাৰ বাবে নিৰ্বাচিত সাংসদ প্ৰদ্যুৎ বৰদলৈৰ । শুকুৰবাৰে গুৱাহাটীৰ ৰাজীৱ ভৱনত সম্বৰ্ধনা গ্ৰহণ কৰি দিয়া ভাষণত সাংসদ বৰদলৈয়ে এইদৰে কয় ।
ৰাজীৱ ভৱনত শুকুৰবাৰে কংগ্ৰেছৰ তিনিগৰাকী নৱনিৰ্বাচিত সাংসদক উষ্ম আদৰণি জনোৱাৰ লগতে বিপুলভাৱে সম্বৰ্ধনা জনোৱা হয় । ভাষণত তেওঁ কয় যে ২০১৬ চনৰ পৰা বৰ্তমানৰ মুখ্যমন্ত্ৰী হিমন্ত বিশ্ব শৰ্মাই অসমৰ জনজীৱনক দুটা ভাগত বিভক্ত কৰি পেলালে । একছত্ৰী ৰাজত্ব কৰাৰ লক্ষ্যৰে বিভাজনৰ ৰাজনীতিৰে ঘৃণাৰ পৰিৱেশ সৃষ্টি কৰিলে । মুখ্যমন্ত্ৰীয়ে ধৰ্মীয় সংখ্যালঘুসকলক দৃশ্যমান শত্ৰু হিচাপে ঘৃণাৰ ৰাজনীতি কৰি আহিছে বুলি মন্তব্য কৰে প্ৰদ্যুৎ বৰদলৈয়ে ৷
তেওঁ কয় যে এইবাৰৰ নিৰ্বাচনত ৰাইজে স্পষ্ট বাৰ্তা দিছে । মুখ্যমন্ত্ৰীৰ এ আই ইউ ডি এফৰ লগত গোপন বুজাপৰা আছিল আৰু বদৰুদ্দিন আজমলক সন্মুখত ৰাখি মুছলমানক আক্ৰমণ কৰি আহিছিল মুখ্যমন্ত্ৰীয়ে । এইবাৰৰ নিৰ্বাচনত সেই শক্তিটোক ধৰ্মীয় সংখ্যালঘু ৰাইজে প্ৰত্যাখ্যান কৰিলে আৰু এইটো এটা ইতিবাচক কথা বুলি সাংসদ বৰদলৈয়ে কয় । বিভাজন আৰু পৰিৱেশৰ বিৰুদ্ধে এইটো এটা বাৰ্তা ।
তেওঁ লগতে কয় যে ৰকিবুল হুছেইনে ধুবুৰীত গৈ বদৰুদ্দিন আজমলক শক্তিশালীভাৱে পৰাভূত কৰিলে । যাৰ বাবে এতিয়া মুখ্যমন্ত্ৰী হিমন্ত বিশ্ব শৰ্মাই ৰকিবুল হুছেইনক টাৰ্গেট কৰি লৈছে ৷ মুখ্যমন্ত্ৰীয়ে ৰকিবুল হুছেইন অসমীয়া নহয় বুলি কোৱাৰ ধৃষ্টতা কৰিছে । হিমন্ত বিশ্ব শৰ্মাৰ দৰে ব্যক্তিৰ ঘৃণাৰ ৰাজনীতিৰ অৱসান ঘটাব লাগিব বুলি উল্লেখ কৰি তেওঁ কয়, ‘‘আমি ঐক্যবদ্ধভাৱে বিজেপিৰ বিকল্প গঢ়িব লাগিব ।’’ 2026 ত কংগ্ৰেছক কোনো শক্তিয়ে প্ৰতিহত কৰিব নোৱাৰিব বুলি তেওঁ দৃঢ়তাৰে কয় ।
লগতে পঢ়ক: ৰাজীৱ ভৱনত বিজয় উৎসৱ : নৱ-নিৰ্বাচিত তিনি সাংসদক বিপুল সম্বৰ্ধনা - APCC victory celebration
