বিশ্বনাথ, 20 এপ্ৰিল: শুকুৰবাৰে দেশৰ ভিন্ন ৰাজ্যৰ লগতে অসমৰো পাঁচখনকৈ ৰাজ্যত অনুষ্ঠিত হৈ যায় 18 সংখ্যক লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণ । সমগ্র দেশতেই 102 টা সমষ্টিত অনুষ্ঠিত হৈছে এই প্ৰথম পৰ্যায়ৰ ভোটদান ।
কালি পুৱা 7 বজাৰ পৰা ৰাজ্যৰ 5 টা সংসদীয় সমষ্টিত আৰম্ভ হৈছিল ভোটদান । এই 5 টা সংসদীয় সমষ্টিৰ ভিতৰত 11 নং শোণিতপুৰ লোকসভা সংসদীয় সমষ্টিত বিগত নিৰ্বাচনৰ তুলনাত কম সংখ্যক ভোটাৰে অংশগ্ৰহণ কৰা পৰিলক্ষিত হয় । 11 নং সংসদীয় সমষ্টিটোৰ 9 টা বিধানসভা সমষ্টিৰ তুলনাত আটাইতকৈ কম সংখ্যক লোকে শুকুৰবাৰে ভোটদান কৰাক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে সমষ্টিটোত ।
ইটিভি ভাৰত অসমে ৰাইজৰ মতামতৰ ভিত্তিত চলোৱা এক তদন্তত পোহৰলৈ আহে যে কা-ৰ প্ৰতি থকা অসমবাসীৰ ক্ষোভৰ ফলস্বৰূপে ভোটাৰসকলে গণতান্ত্ৰিক প্ৰক্ৰিয়াত অংশগ্ৰহণ কৰা নাই । সমান্তৰালভাৱে বিহালী সমষ্টিৰ চাহ বাগিচা অঞ্চলৰ অধিকাংশ লোক এইবাৰ ভোটদানত সহায় সহযোগিতা কৰা দেখা নগ’ল ।
আনহাতে, এই ভোটদানৰ হাৰ হ্ৰাস হোৱাৰ অন্য এক কাৰণ বিহালী সমষ্টিৰ বহু ভোটাৰ বহিঃৰাজ্যত কৰ্মৰত ৷ যাৰ ফলত ভোটাৰৰ হাৰ কমিছে বুলি ধাৰণা কৰা হৈছে । 11 নং শোণিতপুৰ লোকসভা সমষ্টিৰ অন্তৰ্গত বিহালীত কেৱল মাত্ৰ 58% লোকেহে ভোটদান কৰে । সৰ্বাধিক ভোটত জয়ৰ আশা আছে বুলি প্ৰকাশ কৰা ৰঞ্জিত দত্তৰ নিজৰ সমষ্টিতে ভোটাৰৰ এই অৱনতি নিশ্চয়কৈ এক লক্ষণীয় বিষয় হিচাপে বিবেচিত হৈছে ।
উল্লেখ কৰা প্ৰয়োজন যে, তিনিবাৰকৈ অসমৰ মুখ্যমন্ত্ৰী ড৹ হিমন্ত বিশ্ব শৰ্মা নিৰ্বাচনী প্ৰচাৰৰ বাবে আহিছিল সমষ্টিটোলৈ । ইয়াৰ পাচতো ভোটাৰৰ হাৰ হ্ৰাস হোৱা তথ্যই ৰাজনৈতিক মহলত লাভ কৰিছে বিশেষ চৰ্চা ৷ সমান্তৰালভাবে, দেশত গণতন্ত্ৰত আস্থা ৰখা নাগৰিকৰ সংখ্যা অৱনমিত হৈছে বুলিও ধাৰণা কৰা হৈছে ।
বিগত বৰ্ষৰ তুলনাত এইবাৰ ভোটাৰৰ সংখ্যা বৃদ্ধি হৈছে যদিও 2019 বৰ্ষৰ শোণিতপুৰ লোকসভা সমষ্টিটোত 79% ভোটদান হৈছিল যদিও এইবাৰ মাত্ৰ 69 শতাংশ । 155760 ভোটাৰ থকা সমষ্টিটোত 176 টা ভোটকেন্দ্ৰত শুকুৰবাৰে ভোটদান প্ৰক্ৰিয়া হৈছিল যদিও পূৰ্বৰ তুলনাত ভোটাৰ ৰাইজৰ সঁহাৰি অতি কম পৰিলক্ষিত হৈছে ।
সমষ্টিটোত সম্পূৰ্ণ ভোটদানৰ হাৰৰ তথ্য :
শোণিতপুৰ লোকসভা সমষ্টিত মুঠ ভোটৰ হাৰ 69.84% ৷ ইয়াৰে
- ঢেকীয়াজুলি 68.23%
- বৰচল্লা 67.2%
- তেজপুৰ 70 %
- ৰঙাপাৰা 74.12%
- নদুৱাৰ 73.82%
- বিশ্বনাথ 71%
- বিহালী 58%
- গহপুৰ 78.11%
- বিহপুৰীয়া 67%
লগতে পঢ়ক: পুলিং বিষয়াৰ বিৰুদ্ধে ইভিএম জালিয়াতিৰ অভিযোগ; ভুল স্বীকাৰ বিষয়াৰ - Lok sabha Election 2024
