গুৱাহাটী: ৰাজ্যৰ পাঁচটা বিধানসভা সমষ্টিত উপ-নির্বাচনৰ ভোটগ্ৰহণ আজি পুৱাৰে পৰা আৰম্ভ হৈছে । বুধবাৰে পুৱা ৭ বজাৰপৰা চিদলী, বঙাইগাঁও, চামগুৰি, বিহালী আৰু ধলাই বিধানসভা সমষ্টিৰ ১,০৭৮ টা ভোটগ্রহণ কেন্দ্ৰত ভোটগ্রহণ আৰম্ভ হৈছে । উপ-নির্বাচনত সৰ্বমুঠ ৯,১২,০২৫ গৰাকী ভোটাৰে ভোটদান কৰিব । ইয়াৰে ৪,৫৫,১২৪ জন পুৰুষ, ৪,৫৬,৮৮২গৰাকী মহিলা আৰু ১৯ গৰাকী তৃতীয় লিংগৰ ভোটাৰ ।
বঙাইগাঁও সমষ্টিত আঠগৰাকী প্ৰাৰ্থী:
উপ-নির্বাচনত মুঠ ৩৪ গৰাকী প্রার্থী প্রতিদ্বন্দ্বিতাত অৱতীৰ্ণ হৈছে । ইয়াৰে আঠগৰাকীয়ে প্রতিদ্বন্দ্বিতা কৰিছে বঙাইগাঁৱত সমষ্টিত । বঙাইগাঁও সমষ্টিত অৱতীৰ্ণ হৈছে আঠগৰাকী প্ৰাৰ্থী :
- অগপৰ প্ৰাৰ্থী দীপ্তিময়ী চৌধুৰী (NDA)
- কংগ্ৰেছৰ প্ৰাৰ্থী ব্ৰজেনজিৎ সিংহ
- এছ ইউ চি আইৰ প্ৰাৰ্থী মৃত্যুঞ্জয় ৰাভা
- নিৰ্দলীয় প্ৰাৰ্থী শৈলেন্দ্ৰ সৰকাৰ
- নিৰ্দলীয় প্ৰাৰ্থী অনুপ কুমাৰ কৰ্মকাৰ
- নিৰ্দলীয় প্ৰাৰ্থী ভদ্ৰেশ্বৰ বৰ্মন
- নিৰ্দলীয় প্ৰাৰ্থী গৌতম ৰায়
- নিৰ্দলীয় প্ৰাৰ্থী দীপক দাস
বঙাইগাঁও সমষ্টিত ১,৮২,৩৫৪ গৰাকী ভোটাৰ
বঙাইগাঁও সমষ্টিত ভোটগ্রহণ কেন্দ্ৰত ভোটদান ইতিমধ্য়ে আৰম্ভ হৈছে । ৩২ নং বঙাইগাঁও বিধানসভা সমষ্টিৰ মুঠ ভোটাৰৰ সংখ্যা হৈছে ১,৮২,৩৫৪ গৰাকী । সমষ্টিটোত মুঠ ভোটকেন্দ্ৰৰ সংখ্যা হৈছে ২৪৬ টা । ইয়াৰে ৫৬ টা ভোটকেন্দ্ৰ নগৰ অঞ্চলত আৰু ১৯০ টা ভোটকেন্দ্ৰ গ্ৰামাঞ্চলত ।
বঙাইগাঁও সমষ্টিৰ ইতিহাস:
উল্লেখ্য যে যোৱা ১৯৮৫ চনৰ পৰা একেৰাহে অগপৰ ফণীভূষণ চৌধুৰীয়েই সমষ্টিটোৰ বিধায়ক হিচাপে জয়ী হৈ আহিছে । যোৱা ২০২১ চনৰ বিধানসভা নিৰ্বাচনত অগপ প্রার্থী ফণীভূষণ চৌধুৰীয়ে সমষ্টিটোত মুঠ ৮২,৮০০ টা ভোট লাভ কৰি জয়ী হৈছিল । আনহাতে, তেওঁৰ নিকটতম প্রতিদ্বন্দ্বী তথা কংগ্ৰেছ দলৰ প্ৰাৰ্থী শংকৰ প্ৰসাদ ৰায়ে লাভ কৰিছিল মুঠ ৪৪,৬৩৩টা ভোট ।
২০২১ৰ বিধানসভা নিৰ্বাচনত অগপ প্রার্থী ফণীভূষণ চৌধুৰীয়ে বঙাইগাঁৱত চৰকাৰী বি এড কলেজ নির্মাণকে ধৰি অতিৰিক্ত উন্নয়নৰ প্ৰতিশ্ৰুতিৰে সমষ্টিবাসী ৰাইজৰ সমৰ্থন বিচাৰিছিল । ইয়াৰ বিপৰীতে মূলতঃ সমষ্টিটোত ৰাজনৈতিক পৰিৱৰ্তন অর্থাৎ বিধায়ক হিচাপে চৌধুৰীৰ ৩৫ বছৰীয়া ক্ষমতাৰ অৱসান বিচাৰি আৰু সমষ্টিটোত ঔদ্যোগিকৰণৰ প্ৰতিশ্ৰুতিৰে ৰাইজৰ কাষ চাপিছিল কংগ্ৰেছ দলৰ প্রার্থী শংকৰ প্ৰসাদ ৰায়ে ।
