প্ৰেমিক-প্ৰেমিকাৰ বাবে ফেব্ৰুৱাৰী মাহটো অতি বিশেষ ৷ কাৰণ এই মাহৰ ৭ তাৰিখৰ পৰা ১৪ তাৰিখলৈকে গোলাপ দিৱসৰ পৰা আৰম্ভ কৰি ভেলেণ্টাইন সপ্তাহ পালন কৰা হয় ৷ এই সপ্তাহত মানুহে নিজৰ সংগীক বিভিন্ন ধৰণৰ উপহাৰ দিয়ে আৰু তেওঁলোকক বিশেষ অনুভৱ কৰিবলৈ ফুৰিবলৈ যোৱাৰ পৰিকল্পনা কৰে ৷
সংগীৰ সৈতে ভ্ৰমণলৈ যোৱাৰ ফলত ইজনে সিজনক বুজিবলৈ ভাল সুযোগ পায় ৷ গতিকে যদি আপুনিও ভেলেণ্টাইন সপ্তাহত আপোনাৰ সংগীৰ সৈতে ভ্ৰমণ কৰাৰ পৰিকল্পনা কৰিছে, তেন্তে আপুনি উত্তৰ-পূৱৰ ‘Mini Switzerland’ৰ দৰে এই ৰোমান্টিক ঠাইখনলৈ ভ্ৰমণ কৰিবলৈ যাব পাৰে ৷ ইয়ালৈ গৈ আপুনি আপোনাৰ সংগীৰ সৈতে শান্তিৰে সময় কটাবলৈ সুযোগ পাব ৷
হাফলঙৰ মনোৰম দৃশ্যই মন্ত্ৰমুগ্ধ কৰিব আপোনাক ৷ প্ৰকৃতিৰ এই সৌন্দৰ্যই সকলোকে যেন হাত বাউলি মাতে সকলোকে ৷ হাফলং ভাৰতৰ অসমৰাজ্যৰ অন্তৰ্ভুক্ত ডিমা হাছাও জিলাৰ সদৰ ঠাই ৷ অসমৰ পৰ্বতীয়া অঞ্চলসমূহৰ ভিতৰত হাফলং অন্যতম৷ হাফলঙৰ জলবায়ু সেমেকা অৰ্ধক্ৰান্তীয় জলবায়ু ৷ ইয়াত বাছ বা ৰে’লেৰে যাব পাৰে ৷ পোনপটিয়াভাৱে আকাশীযানৰ ব্যৱস্থা নাই ৷ গুৱাহাটী বা শিলচৰৰ পৰা নিউ হাফলং ষ্টেচনলৈ ৰে’লৰ চলাচল আছে ৷
পৰ্যটকৰ আকৰ্ষণ বৃদ্ধিৰ উদ্দেশ্যে উত্তৰ-পূব সীমান্ত ৰে’লৱেই আৰম্ভ কৰিছে ভিষ্টাড’ম (Vistadome) ৰে’ল সেৱা ৷ এই ট্ৰেইনখনৰ খিৰিকীবোৰত ডাঙৰ ডাঙৰ গ্লাছ থকাৰ বাবেই যাত্ৰীসকলে যাত্ৰাৰ প্ৰাকৃতিক সৌন্দৰ্য সুন্দৰকৈ উপভোগ কৰিব পাৰে ৷ লগতে যাত্ৰীয়ে ৰে’লৰ আসনবোৰ ১৮০ ডিগ্ৰী পৰ্যন্ত ঘূৰাই নিজৰ ইচ্ছা মতে বহিব পাৰিব ৷ গুৱাহাটীৰ পৰা নিউ হাফলং ষ্টেচনলৈ সপ্তাহত প্ৰতি বুধবাৰ আৰু শনিবাৰে চলে এই ট্ৰেইনখন ৷ ভিষ্টাড’ম ৰে’ল সেৱাৰ আমেজ ল’বলৈ পৰ্যটকসকলে IRCTCৰ অফিচিয়েল টিকট বুকিং ৱেবছাইটৰ জৰিয়তে টিকট বুক কৰিব লাগে ৷ যদি আপুনিও প্ৰিয়জনৰ সৈতে এই স্থানলৈ যাব বিচাৰে, তেন্তে এই স্থান আপোনাৰ বাবে অন্যতম ৷
উপভোগ কৰিবলৈ বিশেষ ঠাইসমূহ কি কি ?
- হাফলং হ্ৰদ
- জাতিংগা
- পৰম্পৰাগত গাওঁসমূহ
- ফিয়াংপুই বাগান
- মউলপং
- ফিয়াংপুই (Fiangpui) গীৰ্জা
- টুমজাং (Tumjang)
ইয়াৰোপৰি, হাফলঙৰ একেবাৰে ওচৰত আছে মাইবং ৷ হাফলঙলৈ আহিলে এবাৰ মাইবঙলৈ যাব নাপাহৰিব ৷ মাইবং ১৬ আৰু ১৮ শতিকাত ডিমাচা ৰাজত্বৰ সময়ত ৰাজধানী আছিল বুলি জনা যায়৷ এই সময়ৰ বিভিন্ন ধ্বংসাৱশেষ এতিয়াও মাইবঙৰ বিভিন্ন অঞ্চলত দেখিবলৈ পোৱা যায়৷ মাইবঙত থকা ষ্টোন হাউছে দেশী-বিদেশী পৰ্যটকক আকৰ্ষণ কৰিব পাৰে ৷ ভেলেন্টাইন সপ্তাহত লং ড্ৰাইভটো প্ৰিয়জনৰ সৈতে এই স্থানত যাব পাৰে ৷
লগতে পঢ়ক
