নতুন দিল্লী : ৮ নৱেম্বৰৰ পৰা কাৰ্যকৰী হোৱাকৈ ষ্টুডেণ্ট ডাইৰেক্ট ষ্ট্ৰীম (এছডিএছ) ভিছা কাৰ্যসূচী বাতিল কৰাৰ সিদ্ধান্ত লৈছে কানাডা চৰকাৰে । ইয়াৰ লগে লগে নিম্ন-স্তৰৰ শৈক্ষিক ডিগ্ৰী আৰু ইয়াৰ দ্বাৰা পশ্চিমীয়া দেশ এখনত স্থায়ী বাসস্থানৰ এক নিশ্চিত পথ প্ৰস্তুত কৰাৰ বহুতো ভাৰতীয় শিক্ষাৰ্থীৰ সপোন ভংগ হ'ব ।
কানাডিয়ান চৰকাৰে জাৰী কৰা এক বিবৃতি অনুসৰি, "কাৰ্যসূচীৰ অখণ্ডতা শক্তিশালী কৰা, শিক্ষাৰ্থীৰ সমস্যা দূৰ কৰা আৰু সকলো শিক্ষাৰ্থীক আবেদন প্ৰক্ৰিয়াত সম আৰু ন্যায্য প্ৰৱেশাধিকাৰ প্ৰদান কৰাৰ লগতে এক ইতিবাচক শৈক্ষিক অভিজ্ঞতা প্ৰদান কৰাৰ বাবে এছডিএছ ভিছা কাৰ্যসূচী শুকুৰবাৰে দুপৰীয়া ২ বজাৰ পৰা বাতিল কৰা হৈছে ।"
বিবৃতিটোত উল্লেখ কৰা হৈছে, "সম্ভাৱ্য শিক্ষাৰ্থীসকলক নিয়মীয়া অধ্যয়ন অনুমতি শাখাৰ জৰিয়তে আবেদন কৰিবলৈ আমন্ত্ৰণ জনোৱা হয় ৷ যি বিত্তীয় সমৰ্থনৰ প্ৰমাণ হিচাপে গেৰাণ্টিযুক্ত বিনিয়োগ প্ৰমাণপত্ৰ গ্ৰহণ কৰে । কানাডাই সমগ্ৰ বিশ্বৰ পৰা আন্তৰ্জাতিক শিক্ষাৰ্থীসকলক আদৰণি জনোৱা অব্যাহত ৰাখিব ।"
এছডিএছ ভিছা কাৰ্যসূচী কি ?
ষ্টুডেণ্ট ডাইৰেক্ট ষ্ট্ৰীম ভিছা কাৰ্যসূচী আছিল কানাডাত অধ্যয়ন কৰিব বিচৰা ভাৰতকে ধৰি নিৰ্দিষ্ট দেশৰ শিক্ষাৰ্থীসকল বাবে এক সুশৃংখল ভিছা আবেদন প্ৰক্ৰিয়া । ২০১৮ চনত কানাডা চৰকাৰে প্ৰৱৰ্তন কৰা এই কাৰ্যসূচীয়ে আন্তৰ্জাতিক শিক্ষাৰ্থীসকলৰ বাবে অধ্যয়নৰ অনুমতি আবেদন প্ৰক্ৰিয়া সৰল কৰিছিল । যাৰ ফলত যোগ্য আবেদনকাৰীসকলৰ বাবে দ্ৰুত প্ৰক্ৰিয়াকৰণৰ অনুমতি দিয়া হৈছিল ।
এছডিএছ আবেদনবোৰ নিয়মীয়া অধ্যয়ন অনুমতিতকৈ দ্ৰুতগতিত প্ৰক্ৰিয়া কৰা হৈছিল । যদি সকলো চৰ্ত পূৰণ হয় তেনেহ'লে সাধাৰণতে তিনি সপ্তাহৰ ভিতৰতে এই আবেদনৰ প্ৰক্ৰিয়া সম্পূৰ্ণ হৈছিল । ই শিক্ষাৰ্থীসকলক আগতীয়াকৈ কানাডাত তেওঁলোকৰ ভ্ৰমণ আৰু বাসস্থানৰ পৰিকল্পনা কৰাৰ ক্ষেত্ৰত সহায় কৰিছিল ।
এছডিএছয়ে গেৰাণ্টিযুক্ত বিনিয়োগ প্ৰমাণপত্ৰ (Guaranteed Investment Certificate) আৰু টিউচন মাচুল পৰিশোধৰ বাহিৰে অতিৰিক্ত বিত্তীয় প্ৰমাণৰ প্ৰয়োজনীয়তা নাইকিয়া কৰি নথিপত্ৰ প্ৰক্ৰিয়াটো সৰল কৰে । প্ৰয়োজনীয় তথ্য দাখিল কৰি আবেদনকাৰীয়ে এছডিএছৰ অধীনত ভিছা অনুমোদনৰ সম্ভাৱনা বৃদ্ধি কৰে ।
এতিয়া বন্ধ হোৱা এই কাৰ্যসূচীৰ অধীনত শিক্ষাৰ্থীসকলৰ ওচৰত কানাডিয়ান মনোনীত শিক্ষা প্ৰতিষ্ঠানৰ (ডিএলআই) পৰা এক প্ৰস্তাৱ বা গ্ৰহণপত্ৰ থাকিব লাগিছিল, যি হৈছে আন্তৰ্জাতিক শিক্ষাৰ্থীসকলক আতিথ্য দিয়াৰ বাবে কানাডিয়ান চৰকাৰৰ অনুমোদিত এক প্ৰতিষ্ঠান ।
আবেদনকাৰীয়ে ইংৰাজী বা ফৰাচী ভাষাত দক্ষতাৰ প্ৰমাণ প্ৰদান কৰাৰ প্ৰয়োজন আছিল । ইংৰাজীত ৬.০ বা অধিক আইইএলটিএছ নম্বৰৰ প্ৰয়োজন আছিল (বুজি পোৱা, পঢ়িব পৰা, লিখা, ক'ব পৰা)। ফৰাচী ভাষাৰ ক্ষেত্ৰত কানাডিয়ান লেংগুৱেজ বেঞ্চমাৰ্ক (চিএলবি) নম্বৰৰ সমান এক টেষ্ট ডি'এৰেভেলুৱেচন ডি ফ্ৰান্সটেকাইছ (টিইএফ) ফলাফলৰ প্ৰয়োজন আছিল ।
শিক্ষাৰ্থীসকলে অংশগ্ৰহণকাৰী কানাডিয়ান বিত্তীয় প্ৰতিষ্ঠান এটাৰ পৰা ১০,০০০ ডলাৰ মূল্যৰ জিআইচি ক্ৰয় কৰিব লাগিছিল । জিআইচিয়ে প্ৰমাণ হিচাপে কাম কৰে যে আবেদনকাৰীৰ প্ৰথম বছৰৰ বাবে কানাডাত জীৱন নিৰ্বাহৰ ব্যয়ৰ বাবে পৰ্যাপ্ত পুঁজি আছে ।
মূলতঃ এছডিএছ ভিছা কাৰ্যসূচীয়ে নিৰ্ধাৰিত দেশৰ যোগ্য আন্তৰ্জাতিক শিক্ষাৰ্থীসকলৰ বাবে কানাডাত অধ্যয়নৰ অনুমতি লাভ কৰাৰ বাবে এক সুশৃংখল, দ্ৰুত পথ আগবঢ়াইছিল । নিৰ্দিষ্ট প্ৰয়োজনীয়তা পূৰণ কৰি আবেদনকাৰীসকলে দ্ৰুত প্ৰক্ৰিয়াৰে সময়, সৰলীকৃত আবেদন পদক্ষেপ আৰু অনুমোদনৰ বৰ্ধিত সম্ভাৱনা গ্ৰহণ কৰিব পাৰিছিল ।
অৱশ্যে, সকলো চৰ্ত মানি চলা আৰু ইমিগ্ৰেচন, শৰণাৰ্থী আৰু নাগৰিকত্ব কানাডা (আইআৰচিচি) ৱেবছাইটত প্ৰয়োজনীয়তাৰ যিকোনো পৰিৱৰ্তনৰ হিচাপ ৰখাটো অত্যাৱশ্যকীয় আছিল ।
এছডিএছ ভিছা কাৰ্যসূচীৰ দ্বাৰা কিমান ভাৰতীয় শিক্ষাৰ্থী উপকৃত হৈছে ?
কানাডিয়ান চৰকাৰে প্ৰদান কৰা তথ্য অনুসৰি ২০১৮ চনত এছডিএছ ভিছা কাৰ্যসূচী আৰম্ভ হোৱাৰ পিছত ২০১৯ চনত ১,৭৩,০২৫ গৰাকীৰ ভিতৰত ১,১০,০৪৯ গৰাকী ভাৰতীয় শিক্ষাৰ্থীৰ ভিছা আবেদনত অনুমোদন জনোৱা হৈছিল । ২০২০ চনত ৭৪,৬৫৫ গৰাকীৰ ভিতৰত ৩৬,০৫৭ খন তেনে আবেদনত অনুমোদন জনোৱা হৈছিল ।
তাৰ পিছত পুনৰ ২০২১ চনত ভাৰতীয় শিক্ষাৰ্থীসকলে কৰা ২,৩০,৮৬০ খন আবেদনৰ ভিতৰত ১,৩৭,৫৩৫ খনত অনুমোদন জনোৱা হৈছিল । আইআৰচিচিয়ে ২০২১ চনৰ ৩১ ডিচেম্বৰৰ পিছত তথ্য প্ৰকাশ কৰা নাই ।
অৱশ্যে, ৰাজহুৱা ক্ষেত্ৰত উপলব্ধ তথ্য অনুসৰি ২০২২ চনত ভাৰতীয় শিক্ষাৰ্থীৰ পৰা লাভ কৰা নতুন অধ্যয়ন অনুমতি আবেদনৰ সংখ্যা ১,৮৯,০০০ অতিক্ৰম কৰিছিল । ২০২৩ চনলৈ আবেদনৰ সংখ্যা দ্ৰুতগতিত বৃদ্ধি পাইছিল । যাৰ ফলত বছৰটোৰ ভিতৰত ২,১৮,০০০ ৰো অধিক আবেদনত অনুমতি জনোৱা হৈছিল ।
কানাডিয়ান চৰকাৰে ২০২৩ চনৰ জানুৱাৰী আৰু আগষ্টৰ ভিতৰত নতুন অধ্যয়ন অনুমতিৰ বাবে ৬,০৮,০০০তকৈও অধিক আবেদন (সম্প্ৰসাৰণৰ বাহিৰে) লাভ কৰাৰ প্ৰতিবেদন দিছিল । যি ২০২২ চনৰ তুলনাত প্ৰায় ২৮ শতাংশ বৃদ্ধি পাইছিল । এই উত্থান ভাৰতৰ শিক্ষাৰ্থীৰ আগ্ৰহৰ প্ৰমাণ আছিল । কিয়নো শিক্ষাৰ্থীসকল কানাডাৰ স্নাতকোত্তৰ কৰ্ম বিকল্প আৰু স্থায়ী বাসস্থানৰ সম্ভাৱ্য পথৰ দ্বাৰা আকৰ্ষিত হৈছিল ।
এছডিএছ অনুমোদনত ভাৰতৰ অংশ অধিক আছিল । বেছিভাগ ভাৰতীয় আবেদনে ভাষাৰ দক্ষতা আৰু বিত্তীয় নথিপত্ৰৰ প্ৰয়োজনীয়তা সহ সুশৃংখল যোগ্যতাৰ চৰ্ত পূৰণ কৰিছিল ।
কানাডাই এছডিএছ ভিছা কাৰ্যসূচী কিয় বাতিল কৰিলে ?
কানাডাই অস্থায়ী বাসিন্দা হ্ৰাস কৰিবলৈ, গৃহ আৰু ৰাজহুৱা সেৱাৰ ওপৰত চাপ হ্ৰাস কৰিবলৈ আন্তৰ্জাতিক শিক্ষাৰ্থীসকলৰ সংখ্যা সীমিত কৰি ৰাখিছে । কানাডাৰ প্ৰধানমন্ত্ৰী জাষ্টিন ট্ৰুডোৱে ১৯ ছেপ্টেম্বৰত তেওঁৰ এক্সৰ পোষ্টত কৈছিল, "আমি এই বছৰ ৩৫ শতাংশ কম আন্তঃৰাষ্ট্ৰীয় শিক্ষাৰ্থীৰ অনুমতি প্ৰদান কৰিছো । আৰু অহা বছৰ সেই সংখ্যা আৰু ১০ শতাংশ হ্ৰাস পাব । ইমিগ্ৰেচন আমাৰ অৰ্থনীতিৰ বাবে এক সুবিধা – কিন্তু যেতিয়া একাংশই প্ৰণালীটোৰ অপব্যৱহাৰ কৰে আৰু শিক্ষাৰ্থীসকলৰ সুবিধা লয়, আমি কঠোৰ পদক্ষেপ লওঁ ।"
নতুন দিল্লীস্থিত ইমেজইণ্ডিয়া (Imagindia) থিংক টেংকৰ অধ্যক্ষ ৰবিন্দৰ সচদেৱৰ মতে, এছডিএছ ভিছা কাৰ্যসূচী বাতিল কৰাৰ সিদ্ধান্তটো কানাডিয়ান চৰকাৰে সমগ্ৰ ভিছা কাৰ্যসূচীৰ ওপৰত পুনৰ দৃষ্টি দিয়াৰ পৰিণাম ।
তেওঁ কয়, "ডিপ্লোমা আৰু ছাৰ্টিফিকেট কাৰ্যসূচীৰ বাবে কানাডা ভিছাৰ ক্ষেত্ৰত কঠোৰ হৈছে । তেওঁলোকে কেৱল অধ্যয়নৰ বিশেষ ক্ষেত্ৰত হে শিক্ষাৰ্থীসকলক অনুমতি দিব বিচাৰিছে ।" তেওঁ কয় যে কানাডাই বিচাৰে যে শিক্ষাৰ্থীসকলে ৪ বছৰীয়া স্নাতক ডিগ্ৰী কাৰ্যসূচী বা দুবছৰীয়া স্নাতকোত্তৰ কাৰ্যসূচীৰ বাবে তালৈ যায় ।
সচদেৱে কয়, "যিকোনো প্ৰশিক্ষণ প্ৰতিষ্ঠানে আগবঢ়াব পৰা ডিপ্লোমা আৰু ছাৰ্টিফিকেট কাৰ্যসূচীৰ বাবে সমগ্ৰ বিশ্বৰ বহুলোকে এছডিএছৰ সুবিধা লৈছিল । এই লোকসকলে ৯ মাহৰ পাঠ্যক্ৰমৰ বাবে যায় আৰু তাৰ পিছত বাসস্থানৰ বাবে আবেদন কৰে । কানাডাই এনে শিক্ষাৰ্থীসকলক অৱৰোধ কৰিবলৈ চেষ্টা কৰি আছে ।"
একে সময়তে তেওঁ কয় যে যিসকল শিক্ষাৰ্থীয়ে ৮ নৱেম্বৰত এছডিএছ ভিছা কাৰ্যসূচী সমাপ্ত হোৱাৰ পূৰ্বে আবেদন কৰিছিল তেওঁলোক ইয়াৰ দ্বাৰা প্ৰভাৱিত নহয় ।
লগতে পঢ়ক :বাৰ্ড ফ্লুত আক্ৰান্ত প্ৰথমগৰাকী ৰোগী চিনাক্ত
