আমাৰ পৰিৱৰ্তিত জীৱনশৈলীত আমি প্ৰায়ে হজম শক্তিৰ লগত জড়িত বহু সমস্যাৰ সন্মুখীন হ’বলগীয়া হয় ৷ দৰাচলতে ইয়াৰ আঁৰৰ আটাইতকৈ ডাঙৰ কাৰণ হ’ল বেয়া খাদ্যাভ্যাস আৰু কম শাৰীৰিক কাৰ্যকলাপ ৷ সেয়েহে মানুহৰ মাজত কোষ্ঠকাঠিন্য, পেট ফুলা, বদহজম আদি বহু সমস্যা বৃদ্ধি পাবলৈ ধৰিছে ৷ এনে পৰিস্থিতিত হজম শক্তি সুস্থ কৰি ৰাখিবলৈ কিছুমান যোগাসনৰ সহায় ল’ব পাৰি ৷
পাচনতন্ত্ৰ সুস্থ কৰি ৰখাত যোগাসন অতি সহায়ক বুলি প্ৰমাণিত হ’ব পাৰে ৷ যোগৰ বহু উপকাৰিতাৰ বিষয়ে মানুহক সজাগ কৰাৰ উদ্দেশ্যে প্ৰতি বছৰে ২১ জুনত আন্তঃৰাষ্ট্ৰীয় যোগ দিৱস পালন কৰা হয় ৷ পাচনতন্ত্ৰ সুস্থ কৰি ৰাখিবলৈ কিছু যোগাসনৰ বিষয়ে জানো আহক-
পদহস্তাসন
পদহস্তাসনে ষ্ট্ৰেচ হ্ৰাস আৰু ৰক্ত সঞ্চালন উন্নত কৰে ৷ ইয়াৰ উপৰিও ই পেটত মৃদু চাপ প্ৰয়োগ কৰি পাচন অংগসমূহক উদ্দীপিত কৰে আৰু পাচনতন্ত্ৰ উন্নত কৰে ৷ গতিকে দৈনিক পদহস্তাসন কৰিলে পাচনতন্ত্ৰৰ সমস্যাৰ পৰা হাত সাৰিব পাৰি ৷
এই আসনটো কৰিবলৈ ভৰি দুখন ভাঁজ কৰি থিয় হৈ দীঘলকৈ উশাহ এটা লৈ হাত দুখন ওপৰলৈ টানক ৷ এতিয়া উশাহ এৰি দিওঁতে আগলৈ হাউলি হাতেৰে ভৰি দুখন স্পৰ্শ কৰিবলৈ চেষ্টা কৰক ৷ ১৫-২০ ছেকেণ্ড এই অৱস্থাত থাকিব আৰু তাৰ পিচত লাহে লাহে পোন হৈ দিয়ক ৷
ভূজংগাসন
ভূজংগাসন কৰিলে আপোনাৰ পেটৰ পেশীবোৰত টান পৰে আৰু পাচনতন্ত্ৰৰ ক্ৰিয়া উন্নত হয় ৷ ইয়াৰ ফলত পেটৰ চৰ্বি কমোৱাতো সহায় হয় ৷ গতিকে এই আসন দৈনিক কৰিলে হজম শক্তিৰ বাবে অতি উপকাৰী ৷
এই আসনটো কৰিবলৈ পেটটো মাটিত পেলাই শুই যাওক, পিচত হাত দুখন কান্ধৰ ওচৰত ৰাখি মূৰ আৰু বুকুখন লাহে লাহে ওপৰলৈ উঠাবলৈ চেষ্টা কৰক ৷ এনেদৰে কৰক যাতে মূৰ আৰু বুকুখন অলপ পিচলৈ বেঁকা হৈ থাকে ৷ ১৫-৩০ ছেকেণ্ড এই অৱস্থাত থাকিব আৰু তাৰ পিচত জিৰণি লওক ৷
ধনুৰাসন
ধনুৰাসন কৰিলে পেটৰ পেশীবোৰ ষ্ট্ৰেচিং হয় আৰু পেটৰ অংগবোৰৰ ভাল মালিচ হয় ৷ এনে কৰিলে কোষ্ঠকাঠিন্যৰ দৰে সমস্যাৰ পৰা সকাহ পোৱা যায় ৷ এই আসন পাচনতন্ত্ৰৰ লগত জড়িত সকলো অংগৰ বাবে উপকাৰী ৷
এই আসনটো কৰিবলৈ মাটিত পেট পেলাই শুই যাওক আৰু আপোনাৰ হাত দুখন কান্ধৰ ওচৰত ৰাখক ৷ এতিয়া লাহে লাহে নিজকে ওপৰলৈ তুলি নিয়াৰ চেষ্টা কৰক ৷ এতিয়া ভৰি দুখন বেঁকা কৰি নিতম্বৰ ওচৰলৈ আনি এখন হাতেৰে ভৰিখন ধৰি ৰাখক আৰু তাৰ পিচত আনখন হাতেৰেও একেদৰেই কৰক ৷ ইয়াৰ ফলত আপোনাৰ শৰীৰৰ আকৃতি ধনুৰ দৰে দেখা যাব ৷ এতিয়া এই অৱস্থাত ৩০ ছেকেণ্ড অপেক্ষা কৰক আৰু তাৰ পিচত দীঘল উশাহ লওক ৷
লগতে পঢ়ক: এই তিনিটা যোগাসন কৰিলে পাব পাৰে গেছৰ সমস্যাৰ পৰা পৰিত্ৰাণ
