টকিঅ’ত দ্ৰুতগতিত চিফিলিছ ভাইৰাছৰ সংক্ৰমণৰ উন্মেষ ঘটিছে ৷ চৰকাৰী তথ্য অনুসৰি চলিত বৰ্ষত এই পৰ্যন্ত ২৪০০ৰো অধিক ৰোগী ধৰা পৰিছে ৷ সংবাদ সংস্থা ছিনহুয়াৰ মতে, টকিঅ’ মেট্ৰ’পলিটান ইনফেকচিয়েছ ডিজিজ চাৰ্ভিলেন্স চেণ্টাৰৰ তথ্য অনুসৰি ৰাজধানী চহৰখনত প্ৰায় ২৪৬০ জন আক্ৰান্ত হৈছে ৷ বিশেষজ্ঞসকলে কৈছে যে এই ভাইৰাছত আক্ৰান্তৰ ঘটনা দ্ৰুতগতিত বৃদ্ধি পাইছে ৷ বিগত বৰ্ষত ৩৭০১টা ৰোগীৰ সংখ্যা আছিল যিটো অভিলেখ আছিল ৷
চিফিলিছ ভাইৰাছৰ লক্ষণ: প্ৰধানকৈ যৌন সংস্পৰ্শৰ দ্বাৰা বিয়পি পৰা চিফিলিছ জন্মৰ পৰা উপস্থিত থাকিলে নৱজাত শিশুৰ ফোঁহা আৰু অন্য কিছুমান সমস্যাৰ সৃষ্টি কৰিব পাৰে ৷
আক্ৰান্ত শিশুৰ কম বয়সতে কোনো লক্ষণ দেখা নাযায় যদিও কেইবছৰমানৰ ভিতৰত চকু ফুলা আৰু শ্ৰৱণ ক্ষমতা হেৰুৱাৰ দৰে লক্ষণ দেখা দিব পাৰে ৷ যদি এই ভাইৰাছৰ প্ৰাৰম্ভিক অৱস্থাত সঠিকভাৱে চিকিৎসা কৰা হয় তেন্তে ই নিৰাময় কৰিব পৰা যায়, কিন্তু চিফিলিছৰ চিকিৎসা নকৰিলে মগজু আৰু হৃদযন্ত্ৰত গুৰুতৰ জটিলতাৰ সৃষ্টি হ’ব পাৰে ৷
এই ৰোগৰ প্ৰাৰম্ভিক লক্ষণ হ’ল যৌনাংগ, মলদ্বাৰ, মুখত দেখা দিয়া ফোঁহা । চিকিৎসা নকৰিলে এই ৰোগ জটিল হৈ পৰিব পাৰে আৰু হৃদযন্ত্ৰ, স্নায়ুতন্ত্ৰ, হাড় আদিত প্ৰভাৱ পেলাব পাৰে । লক্ষণসমূহ হ’ব পাৰে জ্বৰ, ভাগৰুৱা, পেশীৰ বিষ, ওজন কমি যোৱা । ৰোগৰ তীব্ৰ পৰ্যায়ত চিফিলিছৰ ফলত দৃষ্টিহীনতা আৰু মগজুৰ ক্ষতি হ’ব পাৰে ।
পৰিসংখ্যা অনুসৰি চিফিলিছ ৰোগীৰ প্ৰায় ৭০ শতাংশই পুৰুষ ৷ এই ভাইৰাছে বিশেষকৈ ২০ৰ পৰা ৫০ বছৰৰ ভিতৰৰ পুৰুষ আৰু ২০ৰ পৰা ৩০ বছৰৰ ভিতৰৰ মহিলাক আক্ৰান্ত কৰিছে ৷
প্ৰতিষ্ঠানটোৰ মতে, বহু সংক্ৰমিত ব্যক্তিয়ে বছৰ বছৰ ধৰি সংক্ৰমণৰ বিষয়ে অজ্ঞাত হৈ থকাৰ বাবে ভুলকৈ নিজকে নিৰাপদ বুলি বিশ্বাস কৰে, যাৰ ফলত চিফিলিছ সততে আওকাণ কৰা ৰোগ ৷
চিফিলিছ ৰোগীৰ অভিলেখ ভংগকাৰী বৃদ্ধি ৰোধ কৰিবলৈ টকিঅ’ই শ্বিনজুকু আৰু টামাৰ দৰে অঞ্চলত বিনামূলীয়া পৰীক্ষা আৰু পৰামৰ্শ কক্ষ স্থাপন কৰিছে ৷ জনস্বাস্থ্য কেন্দ্ৰতো পৰীক্ষাৰ ব্যৱস্থা আছে, শ্বিনজুকু কেন্দ্ৰত ২৪ ঘণ্টীয়া অনলাইন বুকিং আৰু ছুটিৰ দিনত পৰীক্ষাৰ ব্যৱস্থা আছে ৷ টকিঅ’ মহানগৰ চৰকাৰে বাসিন্দাসকলক কোনো সমস্যা হ’লে তৎকালীনভাৱে পৰীক্ষা কৰিবলৈ আহ্বান জনাইছে ৷
