কলিয়াবৰ, 9 মে’: অসমত পুনৰ প্ৰাদুৰ্ভাৱ ঘটিছে ডেংগুৰ সংক্ৰমণ ৷ এই সন্দৰ্ভত বৃহস্পতিবাৰে মন্তব্য প্ৰকাশ কৰে ৰাজ্যৰ স্বাস্থ্যমন্ত্ৰী কেশৱ মহন্তই ৷
স্বাস্থ্যমন্ত্ৰীগৰাকীয়ে কয় যে এই পৰ্যন্ত অসমত ১০৬ জন লোক ডেংগুত আক্ৰান্ত হৈছে । চলিত বৰ্ষৰ জানুৱাৰী মাহৰ পৰা পৰা চলিত মে’ মাহলৈকে এইসংখ্যক লোক আক্ৰান্ত হৈছে ডেংগুত । ইয়াৰে বাক্সা জিলাত ২ গৰাকী, বৰপেটাত ৫ গৰাকী, বঙাইগাঁৱত এগৰাকী, কাছাৰত ছগৰাকী, চৰাইদেউত তিনি গৰাকী লোক ডেংগুত আক্ৰান্ত হোৱাৰ খবৰ লাভ কৰা হৈছে বুলি স্বাস্থ্যমন্ত্ৰীগৰাকীয়ে সদৰী কৰে ৷
অৱশ্যে এই পৰ্যন্ত এগৰাকীও ডেংগু ৰোগীৰ মৃত্যু হোৱা নাই বুলি স্বাস্থ্যমন্ত্ৰীয়ে উল্লেখ কৰে । তদুপৰি মন্ত্ৰীগৰাকীয়ে কয় যে বিগত বৰ্ষতকৈ চলিত বৰ্ষত ডেংগুত আক্ৰান্ত লোকৰ সংখ্যা কমিছে । আক্ৰান্তসকলৰ লগতে সংক্ৰমণ ৰোধৰ বাবে স্বাস্থ্য বিভাগৰ তৰফৰ পৰা সকলো যাৱতীয় ব্যৱস্থা গ্ৰহণ কৰা হৈছে বুলি সদৰী কৰে স্বাস্থ্যমন্ত্ৰীয়ে ।
সেই অনুসৰি ৰাজ্যৰ সকলো প্ৰায় স্থানতে স্বাস্থ্যবিভাগে ফ’গিঙৰ ব্যৱস্থা কৰিছে বুলি উল্লেখ কৰে কেশৱ মহন্তই । বিষয়টোৰ সন্দৰ্ভত ৰাজ্যৰ স্বাস্থ্য বিভাগ তৎপৰ হৈছে বুলি জানিবলৈ দিয়ে স্বাস্থ্যমন্ত্ৰীগৰাকীয়ে ৷ স্বাস্থ্যমন্ত্ৰীগৰাকীয়ে উল্লেখ কৰে যে এই সময়ত প্ৰত্যেক বছৰেই ডেংগুৰ প্ৰাদুৰ্ভাৱ দেখা যায় যদিও স্বাস্থ্য বিভাৱে যাৱতীয় ব্যৱস্থা গ্ৰহণ কৰাৰ ফলত ক্ৰমান্বয়ে সংক্ৰমণ কৰি আহিছে ৷
আনহাতে, বৃহস্পতিবাৰে ঘোষিত উচ্চতৰ মাধ্যমিক চূড়ান্ত পৰীক্ষাত উত্তীৰ্ণ প্ৰতিগৰাকী শিক্ষাৰ্থীক শুভেচ্ছা জ্ঞাপন কৰে স্বাস্থ্যমন্ত্ৰীগৰাকীয়ে ৷ তদুপৰি শিক্ষা বিভাগৰ খৰতকীয়া ব্যৱস্থাত সুখী অনুভৱ হোৱা বুলি কেশৱ মহন্তই মন্তব্য কৰে ৷ ফলাফলৰ সমগ্ৰ ব্যৱস্থাটো পৰিপাটিকৈ পৰিচালনা কৰাৰ বাবে শিক্ষামন্ত্ৰীক ধন্যবাদ জনালে স্বাস্থ্যমন্ত্ৰী কেশৱ মহন্তই ।
লগতে পঢ়ক: অসম চিকিৎসা মহাবিদ্যালয়ত ছিণ্ডিকেটৰ অভিযোগ বিজেপি নেতাৰ
