কামৰ হেঁচা বা আন ব্যক্তিগত তথা পাৰিবাৰিক কাৰণসমূহৰ বাবে সাম্প্ৰতিক সময়ত অধিকাংশ লোকেই যথেষ্ট মানসিক চাপ আৰু উদ্বেগৰ ভুক্তভোগী হয় ৷ ইয়াৰ ফলত ব্যক্তিৰ নিজৰ জীৱনশৈলীতো নেতিবাচক প্ৰভাৱ পৰে ৷ মানসিক চাপৰ বাবে মগজুৱে ভালদৰে কাম কৰিব নোৱাৰে ৷
ফোনত, ছ’চিয়েল মিডিয়াত ঘণ্টাৰ পিচত ঘণ্টা সময় কটালে, গতানুগতিক জীৱনৰ প্ৰভাৱ আদি কাৰণৰ লগতে প্ৰকৃতিৰ পৰা বাঢ়ি অহা দূৰত্বৰ ফলতো মানুহে মানসিকভাৱে ভাগৰুৱা অনুভৱ কৰিব পাৰে ৷ এনে অৱসাদৰ পৰাই লাহে লাহে আৰম্ভ হয় বহুতো শাৰীৰিক আৰু মানসিক সমস্যা ৷
যেতিয়া আমি মানসিক অৱসাদ অনুভৱ কৰো, তেতিয়াই আমাৰ মাজত এলাহৰ ভাৱ আহে আৰু মানসিক স্বাস্থ্যও প্ৰভাৱিত হয় ৷ ইয়াৰ বাবেই দৈনন্দিন জীৱনতো সমস্যাৰ সৃষ্টি হ’বলৈ আৰম্ভ কৰে ৷ এনে পৰিস্থিতিত কিছুমান অভ্যাস মানি চলিব পাৰে, যি আপোনাক মানসিকভাৱে সবল আৰু সক্ৰিয় কৰি ৰাখিব ৷ এই অভ্যাসবোৰৰ বিষয়ে জানো আহক…
ৱৰ্ক আউট
যদি আপুনি নিজকে মানসিকভাৱে সক্ৰিয় কৰি ৰাখিব বিচাৰে তেন্তে দিনটোত কমেও এঘণ্টা সময় ৱৰ্ক আউট কৰক ৷ আপুনি সাঁতোৰা, দৌৰা, জগিং আৰু নৃত্যৰ দৰে কাম কৰিব পাৰে ৷ এনে কাৰ্যৰ দ্বাৰা আপোনাৰ শৰীৰটোও সুস্থ হৈ থাকিব ৷
খাদ্যাভাসৰ যতন
আপোনাৰ দৈনন্দিন খাদ্যাভ্যাস যিমান পাৰি স্বাস্থ্যকৰ কৰি ৰাখিবলৈ চেষ্টা কৰক ৷ খাদ্যত মছলা আৰু নিমখ কম ব্যৱহাৰ কৰক ৷ কেফেইন আৰু মদ্যপান পৰিহাৰ কৰিবলৈ আৰম্ভ কৰক ৷ খাদ্যতালিকাত অধিক পৰিমাণে ফল-মূল, শাক-পাচলি আৰু বাদাম জাতীয় খাদ্য বস্তু অন্তৰ্ভুক্ত কৰক ৷
যোগাসন
যদি আপুনি নিজকে মানসিকভাৱে সক্ৰিয় কৰি ৰাখিব বিচাৰে তেন্তে যোগাসন কৰিবলৈ আৰম্ভ কৰক ৷ লগতে যিবোৰ কামে আপোনাক সুখী কৰে, সেই কামবোৰ অধিক পৰিমাণে কৰক ৷ এনে কামে আপোনাৰ মানসিক চাপ পৰিচালনা কৰিব ৷ ইয়াৰ ফলত আপুনি ইতিবাচক অনুভৱ কৰিব ৷
জিৰণি
আমাৰ মনটোৱে কেতিয়াও চিন্তা কৰিবলৈ বন্ধ নকৰে ৷ এনে পৰিস্থিতিত মনকো জিৰণিৰ প্ৰয়োজন হয় ৷ সকলো গুৰুত্বপূৰ্ণ কাম সম্পূৰ্ণ কৰাৰ পিচত অন্ততঃ এঘণ্টাৰ বিৰতি লওক ৷ সেই সময়ত একো কথা নাভাবিব ৷ প্ৰাকৃতিক পৰিৱেশত বা নিৰ্জন কোনো স্থানত মন শান্ত কৰি কিছু সময় বহক বা জিৰণি লওক ৷ ইয়াৰ লগতে সদায় ৮ ঘণ্টাকৈ শোৱাটো নিশ্চিত কৰক ৷
