আমি প্ৰায়ে আমাৰ মাতৃ তথা বয়োজ্যেষ্ঠৰ পৰা শুনি আহিছো যে তুলসীৰ পাত আমাৰ স্বাস্থ্যৰ পক্ষে কিমান উপকাৰী ৷ ইতিমধ্যে বহু গৱেষণাত পোৱা গৈছে যে, যদি আপুনি পুৱা খালী পেটত তুলসীৰ পাত খায় তেন্তে আপুনি বহু ৰোগৰ পৰা হাত সাৰিব পাৰে ৷ হয়, আয়ুৰ্বেদতো ইয়াৰ বহু লাভালাভৰ বিষয়ে উল্লেখ আছে ৷
আয়ুৰ্বেদৰ মতে, তুলসীৰ পাতত এণ্টিবেক্টেৰিয়েল, এণ্টিভাইৰেল, এণ্টি-ফাংগাল গুণ থাকে ৷ যি ঔষধতকৈও অধিক কাৰ্যকৰী ৷ আজি তুলসীৰ স্বাস্থ্য উপকাৰিতাৰ বিষয়ে জানো আহক-
পেটৰ সমস্যা
খালী পেটত তুলসীৰ পাত খালে পেটৰ সমস্যা নহয় ৷ ইয়াৰ ফলত হজম ভাল আৰু পেট ফুলাৰ সমস্যা দূৰ হয় ৷ কেৱল এয়াই নহয়, তুলসীৰ পাত খালে ই আপোনাক এচিডিটি, কোষ্ঠকাঠিন্য, বদহজম, পেটৰ বিষ আদি সমস্যাৰ পৰাও সকাহ দিয়াত সক্ষম ৷
হৃদযন্ত্ৰৰ স্বাস্থ্য
তুলসীৰ পাতক হৃদযন্ত্ৰৰ ঔষধ বুলি কোৱা হয় ৷ খালী পেটত তুলসীৰ পাত খাই আপুনি হৃদযন্ত্ৰৰ স্বাস্থ্য উন্নত কৰিব পাৰি ৷ তুলসীৰ পাতে কলেষ্টেৰল, ৰক্তচাপ নিয়ন্ত্ৰণত ৰখাৰ লগতে হৃদ আক্ৰমণৰ দৰে ৰোগৰ পৰাও আপোনাক বচাই ৰাখিব পাৰে ৷
ছালৰ যত্ন
প্ৰতি পুৱা তুলসীৰ পাত খাই আপুনি আপোনাৰ ছালখনক উজলাই তুলিব পাৰে ৷ তুলসীৰ পাতত পোৱা এণ্টিবেক্টেৰিয়েল আৰু এণ্টিভাইৰেল গুণাগুণবোৰ ছালৰ গভীৰতালৈ গৈ ইয়াক পৰিস্কাৰ কৰে ৷ যাৰ ফলত শালমন, দাগ আদিৰ সমস্যাও দূৰ হয় ৷
মূৰৰ বিষ
অত্যধিক কাম কৰা বা অধিক চাপত থকাৰ ফলত আজিকালি অধিকাংশ লোকেই মূৰৰ বিষত ভোগে ৷ যদি আপুনিও প্ৰায়ে মূৰৰ বিষত ভোগে, তেন্তে তুলসীৰ পাত খাই এই সমস্যাটো দূৰ কৰিব পাৰিব ৷
দাঁতৰ বিষ
দাঁতৰ বিষ উপশম কৰাতো তুলসীৰ পাত কাৰ্যকৰী ৷ দাঁতৰ বিষৰ পৰা সকাহ পাবলৈ জালুক আৰু তুলসীৰ পাত পিহি দাঁতৰ বিষ হোৱা অংশত লগাই ৰাখিব ৷ ই দাঁতৰ বিষৰ পৰা আপোনাক খুব সোনকালে সকাহ দিব ৷
