গুৱাহাটী,৫ জুন: মাজত মাত্ৰ এটা দিন বাকী । মুক্তিৰ বাবে সাজু 'স্বৰ্গৰথ' । এ.এম টেলিভিশ্যনৰ বেনাৰত ৰাজেশ ভূঞাৰ পৰিচালনাৰে অহা ৭ জুনত ৰাজ্যৰ প্ৰতিটো ছবিগৃহতে মুক্তি লাভ কৰি এই নতুন অসমীয়া ছবিখনে । ছবিখনৰ মুক্তিৰ পূৰ্বে কলা-কুশলীয়ে উজনিৰ পৰা নামনিলৈ চলাইছে ব্যাপক প্ৰচাৰ । ৰাজ্যৰ চৌদিশে প্ৰচাৰ চলোৱাৰ পাচত বুধবাৰে মহানগৰীৰ ভিন্ন প্ৰান্ততো প্ৰচাৰ চলিল ছবিখনৰ । স্বৰ্গৰথৰ প্ৰচাৰত অংশগ্ৰহণ কৰে জনপ্ৰিয় অভিনেতা কমল লোচনে ।
ছবিখনৰ সন্দৰ্ভত অভিনেতা কমল লোচনে কয়, "ৰাইজক আকৃষ্ট কৰিব পাৰিম নে নোৱাৰো সেইটো ছবিখন চোৱাৰ পাচতহে গম পাম । উজনিৰ পৰা নামনিলৈ আমি ছবিখনৰ প্ৰচাৰ চলাইছো । আজি গুৱাহাটী মহানগৰীত প্ৰচাৰ চলাই থকা হৈছে । খুৱ মৰমত বনোৱা এখন ছবি 'স্বৰ্গৰথ'। ছবিখনৰ বিষয়বস্তু খুবেই প্ৰাসংগিক । আশাকৰো ৰাইজে ভাল পাব ।" ৭ জুনত মুক্তিলাভ কৰিবলগীয়া ছবিখনত অভিনয় কৰিছে জনপ্ৰিয় অভিনেতা সিদ্ধাৰ্থ শৰ্মা, ৰাষ্ট্ৰীয় পৰ্যায়ত নাম জিলিকাই তোলা অভিনেতা কেনি বসুমতাৰী, কমল লোচন , বনি দেউৰী, ৰিন্তু বৰা আদিকে ধৰি আন কেইগৰাকীও জনপ্ৰিয় অভিনেতা-অভিনেত্ৰীয়ে ।
আনহাতে 'স্বৰ্গৰথ' ছবিখনৰ কাহিনী আৰু চিত্ৰনাট্য ৰাজেশ ভূঞা আৰু শান্তনু ৰৌমূৰীয়াৰ । সহকাৰী পৰিচালক হিচাপে আছে মনোজ শইকীয়া । ছবিখনৰ দৃশ্যগ্ৰহণ কৰিছে প্ৰদীপ দৈমাৰীয়ে । সম্পাদনা কৰিছে প্ৰতীম খাউণ্ডে । ইফালে ছবিখন শীৰ্ষ গীতটিত কন্ঠদান কৰিছে জনপ্ৰিয় কণ্ঠশিল্পী অৰূপ জ্যোতি বৰুৱাই । ইতিমধ্যে বুক মাই শ্ব'ত মুকলি কৰা হৈছে ছবিখনৰ টিকট । আগতীয়াকৈ বুক কৰিব পাৰিব ছবিখনৰ টিকট । আনহাতে ছবিখনৰ শীৰ্ষ গীত আৰু ট্ৰেইলৰে যথেষ্ট জনপ্ৰিয়তা অৰ্জন কৰাৰ পাচত ছবিখনক লৈ অধিক আশাবাদী হৈ পৰিছে কলা-কুশলীসকল ।
