সৰুপথাৰ,১১ অক্টোবৰ: আজি মহা অষ্টমী-নৱমী । সন্ধিপূজা-কুমাৰী পূজা অৰ্চনাৰে বন্দনা হৈছে মণ্ডপসমূহ । সৰুপথাৰত কণ্ঠশিল্পী আচুৰ্য বৰপাত্ৰক দেখা গ'ল পূজা-অৰ্চনা কৰা । দুৰ্গোৎসৱৰ অষ্টমী-নৱমীত কুমাৰী পূজা, সন্ধি পূজা, গোঁসানী নামৰ বিশেষ তাৎপৰ্য আছে । সৰুপথাৰৰ বাৰোৱাৰী পূজা মণ্ডপত কণ্ঠশিল্পী আচুৰ্য বৰপাত্ৰই আজি সপত্নীক পূজা-অৰ্চনা আগবঢ়ায় । মহা অষ্টমী-নৱমী পূজাৰ দিনৰ ভাগতেই কৰা হয় সন্ধি পূজা আৰু কুমাৰী পূজা ।
সৰুপথাৰৰ বাৰোৱাৰী পূজা মণ্ডপত পুৱাৰে পৰা ভক্তৰ ভিৰ পৰিলক্ষিত হয় । সমান্তৰালভাৱে জনপ্ৰিয় কণ্ঠশিল্পী আচুৰ্য বৰপাত্ৰইও কুমাৰী পূজা আগবঢ়োৱা দেখা গ'ল । উল্লেখ্য যে ১৯৩৪ চনত স্থাপিত হোৱা সৰুপথাৰৰ বাৰোৱাৰী পূজা মণ্ডপে ৯০ বছৰ সম্পূৰ্ণ কৰিলে । পূজা আৰম্ভ হোৱাৰে পৰাই সৰুপথাৰৰ বাৰোৱাৰী পূজা মণ্ডপ গোঁসানী নামেৰে মুখৰিত হয় ।
আজি বাৰোৱাৰী পূজা মণ্ডপত কণ্ঠশিল্পী আচুৰ্য বৰপাত্ৰই প্ৰথমবাৰৰ বাবে গোঁসানী নাম পৰিৱেশন কৰি আয়তীসকলৰ লগত সহযোগিতা আগবঢ়ায় । গোঁসানী নামৰ জৰিয়তে দেৱীক আৰাধনা কৰিলে দেৱী অধিক তুষ্ট হয় । শাৰদীয় দুৰ্গোৎসৱত চণ্ডীপাঠৰ দ্বাৰাই দেৱীক বিভিন্ন ৰূপত তুষ্ট কৰি থকা হয় । এই কথা জানিবলৈ দিয়ে মণ্ডপৰ পুৰোহিত অখিল চন্দ্ৰ শৰ্মাৰ লগতে উদযাপন সমিতিৰ সম্পাদক পৰাগ খাউণ্ডে ।
কুমাৰী পূজা:
কুমাৰী পূজা মূলত ৪-৫ বছৰীয়া ছোৱালীক দেৱী হিচাপে প্ৰতিষ্ঠা কৰি ৰীতি-নীতিৰে পূজা কৰা হয় । দেৱীক কুমাৰী হিচাপে পূজা কৰিলে সম্পূৰ্ণ পূজাভাগৰ শক্তি বৃদ্ধি হয় লগতে সম্পূৰ্ণ ফলপ্ৰাপ্তি হয় ।
সন্ধি পূজা:
সন্ধি পূজা অষ্টমীৰ শেষ হোৱাৰ শেষৰ ২৪ মিনিটৰ লগতে নৱমী আৰম্ভ হোৱাৰ প্ৰথম ২৪ মিনিটৰ সন্ধিক্ষণ, মুঠ ৪৮ মিনিট সময়ছোৱাত কৰা হয় সন্ধি পূজা । এই পূজাত ভক্তই ১০৮ গছি চাকি নতুবা ৯ গছি চাকি জ্বলাই পূজা কৰিলে অশুভ গ্ৰহৰ ৰিষ্ট বিশেষকৈ শনি ৰিষ্ট নাশ হয় বুলি বিশ্বাস আছে ।
