চিটাৰা ডেস্ক, ১ মাৰ্চ: দেশৰ অন্যতম ধনী অভিনেতাৰ ভিতৰত নাম অন্তৰ্ভুক্ত আছে দক্ষিণৰ ছুপাৰষ্টাৰ ৰজনীকান্তৰ । নিজৰ কঠোৰ পৰিশ্ৰমৰ বাবেই তেওঁ আজি সফলতাৰ শীৰ্ষত উপনীত হৈছে । অৱশ্যে ইমান ধনী হোৱা স্বত্বেও অভিনেতাগৰাকীয়ে পাহৰা নাই নিজৰ সৰলতাক ৷ এতিয়াও ছুপাৰষ্টাৰগৰাকীয়ে বিলাসী জীৱনৰ পৰিৱৰ্তে এজন সাধাৰণ মানুহৰ দৰেই জীৱন যাপন কৰি ভাল পায় । এই কাৰণেই হয়তো তেওঁক দক্ষিণ ভাৰতৰ মানুহে দেৱতাৰ দৰে পূজা কৰে ।
শেহতীয়াকৈ ৰজনীকান্তৰ এটা ভিডিঅ’ ছ’চিয়েল মিডিয়াত প্ৰকাশ পাইছে, যিটো ভিডিঅ’ই এতিয়া হৃদয় জয় কৰিছে অনুৰাগীৰ ৷ আমি প্ৰায়ে দেখিছো যে তাৰকাসকলে বিজিনেছ ক্লাছ বা নিজৰ প্ৰাইভেট জেটত ভ্ৰমণ কৰে । কিন্তু বিলাসী জীৱনৰ পৰিৱৰ্তে ৰজনীকান্তে এখন বিমানৰ ইক'নমি ক্লাছত ভ্ৰমণ কৰা দেখা গৈছে । তেওঁৰ এই ভিডিঅ’টো ছ’চিয়েল মিডিয়াত ভাইৰেল হৈ পৰিছে ।
ভিডিঅ’টোত দেখা গৈছে যে ৰজনীকান্তে সাধাৰণ মানুহৰ মাজত ইক'নমি ক্লাছত ভ্ৰমণ কৰি আছে । বিমানখনৰ খিৰিকীৰ চিটত তেওঁ নীৰৱে আৰু আৰামত বহি আছে । নিজৰ সহজ সৰল শৈলীৰে পুনৰবাৰ অনুৰাগীৰ হৃদয় জয় কৰিবলৈ সক্ষম হৈছে অভিনেতাগৰাকীয়ে । ভিডিঅ’টো প্ৰসংগত এতিয়া সকলোৱে মন্তব্য কৰা দেখা গৈছে । সকলোৱে তেওঁৰ সৰলতাৰ বাবে প্ৰশংসা কৰিছে ৷ অৱশ্যে এয়াই প্ৰথম নহয়, যেতিয়া ৰজনীকান্তে নিজৰ সৰলতাৰে অনুৰাগীৰ হৃদয় জয় কৰিছে ৷ ইয়াৰ পূৰ্বেও বহুবাৰ নিজৰ সহজ-সৰল শৈলীৰে অনুৰাগীৰ হৃদয় জয় কৰিছে অভিনেতাগৰাকীয়ে ।
