চিটাৰা ডেস্ক, 28 আগষ্ট : বলীউডৰ অভিনেত্ৰী স্বৰা ভাস্কৰে এতিয়া জাষ্টিছ হেমা কমিটীৰ প্ৰতিবেদনৰ ওপৰত প্ৰতিক্ৰিয়া ব্যক্ত কৰিছে, যিখন প্ৰতিবেদনে মালায়ালম চলচ্চিত্ৰ উদ্যোগত অভিনেত্ৰীসকলৰ ওপৰত হোৱা উৎপীড়নৰ কথা প্ৰকাশ কৰিছে । সমিতিখনে প্ৰকাশ কৰা প্ৰতিটো ঘটনাৰ দ্বাৰাই স্বৰা ভাস্কৰ বহুত প্ৰভাৱিত হৈছে । অভিনেত্ৰীগৰাকীয়ে মহিলাসকলক সমৰ্থন কৰাৰ বাবে ৱমেন ইন চিনেমা কালেক্টিভ (ডব্লিউচিচি)ৰ প্ৰতি আন্তৰিক কৃতজ্ঞতা জ্ঞাপন কৰিছে । অভিনেত্ৰীগৰাকীয়ে চলচ্চিত্ৰ উদ্যোগত মহিলাৰ প্ৰতি হোৱা অত্যাচাৰ আৰু শোষণৰ বিৰুদ্ধে মাত মাতি থকাসকলৰ এই প্ৰচেষ্টাকো প্ৰশংসা কৰিছে । এই সন্দৰ্ভত, স্বৰাই ছ'চিয়েল মিডিয়াত এটা পোষ্ট শ্বেয়াৰ কৰিছে আৰু লগতে তেওঁৰ লগত ঘটা ভয়ানক অভিজ্ঞতাও শ্বেয়াৰ কৰিছে ।
স্বৰাই তেওঁৰ ইনষ্টাগ্ৰাম পোষ্টত লিখিছে, “জাষ্টিছ হেমা কমিটীৰ প্ৰতিবেদন পঢ়াৰ পিচত মোৰ হৃদয় সম্পূৰ্ণৰূপে ভাঙি গৈছে ৷ আটাইতকৈ দুখ এইটো কাৰণেও লাগিছে কিয়নো এনে বহু ঘটনা মোৰ সৈতেও ঘটিছে, প্ৰতিবেদনৰ সকলোবোৰ ঘটনা মোৰ জীৱনত সংঘটিত ঘটনাবোৰৰ সৈতে সাদৃশ্যপূৰ্ণ নহয় যদিও কিছুমান এনে ঘটনা আছে, যিবোৰ মোৰ সৈতে সম্পৰ্কিত ।”
শ্ব'বিজৰ আভ্যন্তৰীণ জগতখন সন্দৰ্ভত কি ক’লে স্বৰা ভাস্কৰে
অভিনেত্ৰীগৰাকীয়ে লগতে আৰু উল্লেখ কৰে যে পুৰুষত্ববাদে কেনেদৰে ছবি জগতখনক আগুৰি ধৰি আছে । অভিনেত্ৰীগৰাকীয়ে লিখিছে, ‘শ্ব’বিজ পুৰুষৰ নিয়ন্ত্ৰণত ৰৈ গৈছে, ইয়াত পিতৃতন্ত্ৰ প্ৰতিষ্ঠা হৈছে, ই এক অতি চিন্তনীয় পৰিস্থিতি, প্ৰডাকশ্যনৰ প্ৰতিটো দিন, শ্বুটিং ডে’, লগতে প্ৰি আৰু প’ষ্ট প্ৰডাকশ্যনৰ দিনো, এনেকুৱা দিন আছে যেতিয়া কাম চলি থাকে আৰু টকা-পইচা খৰচ হয়, বাধা কোনেও ভাল নাপায়, কোনোবাই সত্য আৰু প্ৰকৃত কথাৰ বাবে মাত মাতিলেও, ইয়াক অব্যাহত ৰখাটো অধিক সুবিধাজনক আৰু অৰ্থনৈতিকভাৱে ব্যৱহাৰিক হৈ পৰিছে ।”
ৰাঞ্জনা অভিনেত্ৰীগৰাকীয়ে মনোৰঞ্জন উদ্যোগৰ পুৰুষতান্ত্ৰিক আৰু সামন্ততান্ত্ৰিক প্ৰকৃতিৰ সমালোচনা কৰিছে । তেওঁ আঙুলিয়াই দিছে যে উদ্যোগটোৰ গাঁথনিটোৱে প্ৰায়ে নৈতিক বিবেচনাতকৈ বিত্তীয় আৰু কাৰ্যকৰী সুবিধাক প্ৰাথমিকতা দিয়ে, যাৰ ফলত নীৰৱতা আৰু সহযোগিতা সংস্কৃতিৰ সৃষ্টি হয় । তেওঁ উল্লেখ কৰে যে উদ্যোগটোৰ সফল ব্যক্তিসকলক প্ৰায়ে কঠিন পৰিস্থিৰ পৰা ৰক্ষা কৰা হয়, আনহাতে যিসকলে স্থিতিক প্ৰত্যাহ্বান জনাই তেওঁলোকক সমস্যা সৃষ্টিকাৰী বুলি লেবেল দিয়া হয় ।
ভাস্কৰে ভাৰতৰ আন আন চলচ্চিত্ৰ উদ্যোগসমূহেও একেধৰণৰ সমস্যা সমাধান কৰিছে নেকি বুলি প্ৰশ্ন উত্থাপন কৰি ক্ষমতাৰ অপব্যৱহাৰৰ সমাধানৰ ওপৰত গুৰুত্ব আৰোপ কৰে । তেওঁৰ পোষ্টটোৱে উদ্যোগটোৰ ভিতৰত ব্যৱস্থাগত পৰিৱৰ্তনৰ বাবে এক আহ্বান প্ৰতিফলিত কৰাৰ লগতে ক্ষমতাৰ পদত থকাসকলৰ পৰা অধিক জবাবদিহিতাৰ আহ্বান জনায় । সমান্তৰালকৈ অভিনয় ক্ষেত্ৰৰ পৰা ৰাজনীতিলৈ যোৱা খুশবু সুন্দৰে কেৰেলাৰ চলচ্চিত্ৰ জগতত #MeToo আন্দোলনৰ বিষয়ে মুকলিকৈ কয় । এই আহ্বান উত্থাপন কৰা মহিলাসকলৰ প্ৰতি তেওঁ শ্ৰদ্ধা প্ৰকাশ কৰে, লগতে পিতৃৰ হাতত হোৱা অসৎ আচৰণৰ ব্যক্তিগত অভিজ্ঞতাও শ্বেয়াৰ কৰে ।
হেমা কমিটীৰ প্ৰতিবেদনে ৰাজহুৱা আলোচনা আৰু ক্ষোভৰ সৃষ্টি কৰিছে, তনুশ্ৰী দত্ত আৰু পাৰ্বতী থিৰুভোথুকে ধৰি অসংখ্য চেলেব্ৰিটীয়ে নিজৰ মতামত প্ৰকাশ কৰিছে । এই প্ৰতিবেদনৰ ফলত মালয়ালম ছবি উদ্যোগত অভিযুক্ত অপৰাধীৰ বিৰুদ্ধে পুনৰ তদন্ত আৰু ব্যৱস্থা গ্ৰহণৰ দাবী উত্থাপন হৈছে ।
19 আগষ্টত জাষ্টিছ হেমা কমিটীৰ 296 পৃষ্ঠাৰ প্ৰতিবেদন ৰাজহুৱা কৰা হয় । ইয়াত সাক্ষী আৰু বহু অভিনেত্ৰীৰ চাঞ্চল্যকৰ প্ৰকাশ অন্তৰ্ভুক্ত কৰা হৈছে । যদিও এই প্ৰতিবেদনত কোনো অভিনেতাৰ নাম উল্লেখ কৰা হোৱা নাই, কিন্তু মালয়ালম চলচ্চিত্ৰ জগতৰ এই অন্ধকাৰ সত্যটো ওলাই অহাৰ পিচত সমগ্ৰ দেশতে ইয়াক লৈ চৰ্চা চলি আছে ।
লগতে পঢ়ক : মালায়ালম চলচ্চিত্ৰ উদ্যোগৰ অন্ধকাৰ দিশ উদঙালে হেমা কমিটীৰ প্ৰতিবেদনে - Malayalam Film Industry Dark Side
